యూట్యూబ్లో నేర్చుకున్నాడు.. రూ. 11 కోట్లు సంపాదించాడు! డిగ్రీలు లేకపోయినా.. కెనడా కుర్రాడి సక్సెస్ స్టోరీ వైరల్!
వ్యాపారం చేయాలంటే బిజినెస్ డిగ్రీలే ఉండాలా? కోడింగ్ రావాలంటే ఐఐటీలోనే చదవాలా? "అవసరం లేదు.. కేవలం యూట్యూబ్ ఉంటే చాలు" అని నిరూపించాడు కెనడాకు చెందిన టువాన్ లే (Tuan Le). ఎలాంటి అనుభవం లేకుండా, కేవలం యూట్యూబ్లో వీడియో ఎడిటింగ్ నేర్చుకుని.. నేడు 1.4 మిలియన్ డాలర్ల (సుమారు రూ. 11 కోట్లు) వ్యాపార సామ్రాజ్యాన్ని నిర్మించాడు. మొదట్లో నెలకు వెయ్యి డాలర్లు కూడా సంపాదించలేని స్థితి నుంచి.. నేడు 15 మంది ఉద్యోగులతో కార్పొరేట్ స్థాయికి ఎదిగిన అతని ప్రయాణం యువతకు ఒక కేస్ స్టడీ.
ఏమాత్రం బ్యాక్గ్రౌండ్ లేకుండా వీడియో ఎడిటింగ్ రంగంలోకి దిగిన టువాన్.. మొదట్లో స్థానిక వ్యాపారాలకు తక్కువ ధరకే వీడియోలు చేసి తన పోర్ట్ఫోలియోను పెంచుకున్నాడు. మొదటి ఏడాది అతని సంపాదన కేవలం $8,500 (సుమారు రూ. 7 లక్షలు). రెండో ఏడాది కాస్త పెరిగి $17,400కి చేరింది. కానీ, అంతలోనే కరోనా మహమ్మారి దెబ్బకొట్టింది. ఉన్న క్లయింట్లు కూడా వెళ్లిపోయారు. మూడో ఏడాది లాక్డౌన్లో ఉన్నప్పుడు అతని ఆదాయం $12,350కి పడిపోయింది. ఎవరైనా అయితే ఈ సమయంలో క్విట్ అయిపోయేవారు. కానీ టువాన్ అక్కడే తన పట్టుదలను చూపించాడు.
వచ్చిన ప్రతి రూపాయిని తిరిగి బిజినెస్లోనే పెట్టుబడి పెట్టాడు. వేల సంఖ్యలో 'కోల్డ్ ఈమెయిల్స్' (Cold Emails) పంపి కొత్త క్లయింట్లను వెతుక్కున్నాడు. ఆ కష్టానికి ఫలితం దక్కింది. ఆ ఏడాది చివర్లో అతని ఆదాయం ఏకంగా $1,10,000 (సుమారు రూ. 90 లక్షలు)కు ఎగబాకింది. నాలుగో ఏడాదిలో తన మొదటి ఉద్యోగిని నియమించుకున్నాడు, ఆదాయం $3,50,000కి చేరింది. ఇక ఐదో ఏడాదికి వచ్చేసరికి 15 మంది సభ్యుల టీమ్తో, పెద్ద పెద్ద బ్రాండ్లకు పని చేస్తూ ఏకంగా $1.4 మిలియన్ల రెవెన్యూని సాధించాడు. "నేను చాలాసార్లు వదిలేద్దాం అనుకున్నాను. కానీ అదృష్టం తలుపు తట్టేంత వరకు ఓపికగా ఉన్నందుకు సంతోషంగా ఉంది" అని టువాన్ చెప్పుకొచ్చాడు.
సోషల్ మీడియాలో ఈ స్టోరీ వైరల్ అవ్వగానే.. నెటిజన్లు ఆశ్చర్యపోతున్నారు. "కేవలం మూడో ఏడాదిలో అంత జంప్ ఎలా సాధ్యమైంది?" అని కొందరు అడుగుతుంటే.. "ఒకే పనిని ఏళ్ల తరబడి చేస్తే అందులో మాస్టర్ అవుతాం అనడానికి ఇదే నిదర్శనం. పివట్ (Pivot) అవ్వకుండా నిలబడటమే అసలైన విజయం" అని మరికొందరు ప్రశంసిస్తున్నారు.
బాటమ్ లైన్..
సక్సెస్ అనేది రాత్రికి రాత్రి రాదు.. అది బోరింగ్ పనులను, కష్టమైన రోజులను దాటుకుని వస్తుంది.
స్కిల్ ముఖ్యం: డిగ్రీల కంటే నైపుణ్యమే (Skill) గొప్పదని టువాన్ నిరూపించాడు. ఇంటర్నెట్ యుగంలో నేర్చుకోవడానికి ఆసక్తి ఉంటే యూట్యూబ్ ఒక యూనివర్సిటీ.
వదిలేయకూడదు: మొదటి మూడేళ్లు అతను సంపాదించింది చాలా తక్కువ. కరోనా టైమ్లో ఇంకా దారుణం. కానీ ఆ 'డిప్' (Dip)లో కూడా వదిలేయకుండా ఉండటమే అతన్ని మిలియనీర్ని చేసింది.
రీ-ఇన్వెస్ట్: వచ్చిన డబ్బును జల్సాలకు వాడకుండా, తిరిగి వ్యాపారంలోనే పెట్టడం (Reinvesting) వల్లే అతను సోలో ఎడిటర్ నుంచి కంపెనీ సీఈఓగా ఎదిగాడు.
