పిల్లల చేతిలో ఫోన్ ఉంటే 'అడవిలో' వదిలేసినట్లే! 15 ఏళ్ల లోపు వాళ్లకు నో సోషల్ మీడియా.. ఫ్రాన్స్ సంచలన నిర్ణయం!
సోషల్ మీడియా అనేది ఇప్పుడు ఒక వినోద సాధనం కాదు, అది పిల్లల పాలిట ఒక వ్యసనంగా, కొన్నిసార్లు విషంగా మారుతోంది. ఈ ప్రమాదాన్ని ముందుగానే పసిగట్టిన ఫ్రాన్స్ ప్రభుత్వం ఒక సంచలన నిర్ణయం తీసుకుంది. ఇకపై ఆ దేశంలో 15 ఏళ్లలోపు పిల్లలు సోషల్ మీడియా వాడటానికి వీల్లేదు. ఈ డిజిటల్ యుగంలో పిల్లల భవిష్యత్తు గురించి ఆందోళన చెందుతున్న తల్లిదండ్రులందరికీ ఫ్రాన్స్ అధ్యక్షుడు ఇమ్మాన్యుయేల్ మేక్రాన్ తన నూతన సంవత్సర ప్రసంగంలో ఈ భరోసా ఇచ్చారు. మన పిల్లలను, కౌమార దశలో ఉన్నవారిని డిజిటల్ స్క్రీన్ల దుష్ప్రభావాల నుంచి కాపాడుకోవాల్సిన బాధ్యత ప్రభుత్వంపై ఉందని ఆయన తేల్చిచెప్పారు.
ప్రపంచవ్యాప్తంగా ఇప్పుడు పిల్లల 'డిజిటల్ డిటాక్స్' ఉద్యమం ఊపందుకుంటోంది. ఇటీవలే ఆస్ట్రేలియా ప్రభుత్వం 16 ఏళ్లలోపు వారికి సోషల్ మీడియాను నిషేధిస్తూ ప్రపంచంలోనే మొదటిసారిగా కఠిన చట్టాన్ని తీసుకువచ్చింది. ఇప్పుడు ఫ్రాన్స్ కూడా అదే బాటలో నడుస్తూ 15 ఏళ్ల వయస్సును 'డిజిటల్ మెజారిటీ'గా నిర్ణయించింది. ఈ ప్రతిపాదిత చట్టంపై ఈ నెలలోనే ఫ్రాన్స్ పార్లమెంట్లో చర్చ జరగనుంది. అంతా అనుకున్నట్లు జరిగితే, 2026 సెప్టెంబర్ నాటికి ఈ కొత్త నిబంధనలు దేశవ్యాప్తంగా పూర్తి స్థాయిలో అమల్లోకి రానున్నాయి. పిల్లల మానసిక ఆరోగ్యాన్ని దెబ్బతీస్తున్న ఇంటర్నెట్ వాతావరణాన్ని ప్రక్షాళన చేయడమే దీని ప్రధాన ఉద్దేశం.
ఈ నిర్ణయం వెనుక అధ్యక్షుడు మేక్రాన్ చెప్పిన ఒక ఉదాహరణ ఇప్పుడు ప్రపంచవ్యాప్తంగా తల్లిదండ్రులను ఆలోచింపజేస్తోంది. సోర్బోన్ యూనివర్సిటీలో ఆయన మాట్లాడుతూ సోషల్ మీడియాను ఒక 'నియంత్రణ లేని అడవి'తో పోల్చారు. "ఎవరైనా తమ ఐదేళ్ల లేదా పదేళ్ల పిల్లలను రక్షణ లేకుండా ఒంటరిగా అడవిలోకి పంపిస్తారా?" అని ప్రశ్నించారు. సోషల్ మీడియా కూడా అలాంటిదేనని, అక్కడ పిల్లలు సైబర్ బుల్లియింగ్, అశ్లీలత, వేధింపులు అనే క్రూరమైన పరిస్థితులను ఎదుర్కొంటున్నారని హెచ్చరించారు. మితిమీరిన స్క్రీన్ టైమ్ వల్ల పిల్లల్లో నిద్రలేమి, ఏకాగ్రత తగ్గడం, తీవ్రమైన ఆందోళన వంటి సమస్యలు పెరుగుతున్నాయని ప్రభుత్వ నివేదికలు స్పష్టం చేస్తున్నాయి.
ప్రభుత్వం కేవలం సోషల్ మీడియా బ్యాన్తోనే సరిపెట్టడం లేదు. ఇప్పటికే ప్రైమరీ, మిడిల్ స్కూళ్లలో అమల్లో ఉన్న ఫోన్ల నిషేధాన్ని ఇప్పుడు హైస్కూళ్లకు కూడా విస్తరించాలని నిర్ణయించింది. అంతకంటే ఆసక్తికరమైన విషయం ఏమిటంటే, 15 నుంచి 18 ఏళ్ల వయసున్న టీనేజర్లకు రాత్రివేళల్లో 'డిజిటల్ కర్ఫ్యూ' విధించే ఆలోచనలో కూడా ప్రభుత్వం ఉంది. ఈ కఠిన నిర్ణయాలకు ఫ్రాన్స్లోని సుమారు 79 శాతం మంది తల్లిదండ్రులు పూర్తి మద్దతు తెలుపుతుండటం విశేషం. మలేషియా, డెన్మార్క్, స్పెయిన్, భారత్ వంటి దేశాలు కూడా ఇప్పుడు డిజిటల్ కంటెంట్ నియంత్రణపై సీరియస్గా దృష్టి పెడుతున్నాయి. ఫ్రాన్స్ తీసుకుంటున్న ఈ నిర్ణయం భవిష్యత్తులో మిగతా ప్రపంచానికి ఒక దిక్సూచిగా మారే అవకాశం ఉంది.
బాటమ్ లైన్..
పిల్లల చేతిలో స్మార్ట్ ఫోన్ పెట్టడం అంటే.. వారి చేతిలో బాంబు పెట్టినట్టే అని ఫ్రాన్స్ ప్రభుత్వం గుర్తించింది.
పేరెంటింగ్ vs పోలీసింగ్: ఇంట్లో తల్లిదండ్రులు చెప్పినా పిల్లలు వినని పరిస్థితి ఉంది. అందుకే ఇప్పుడు ప్రభుత్వమే చట్టం ద్వారా కంట్రోల్ చేయాల్సి వస్తోంది. ఇది తల్లిదండ్రుల వైఫల్యం అనుకోవాలా? లేక టెక్నాలజీ విజయం అనుకోవాలా?
అమలు సాధ్యమేనా?: 15 ఏళ్లు నిండాయా లేదా అని ఆన్లైన్లో నిర్ధారించడం అంత తేలిక కాదు. ఫేక్ ఏజ్ ప్రూఫ్స్తో పిల్లలు లాగిన్ అయితే ఎలా అడ్డుకుంటారు? అనేది ఫ్రాన్స్ ముందున్న అసలైన సవాలు.
భారత్కు పాఠం: మన దేశంలో పిల్లలు గంటల తరబడి రీల్స్ చూస్తూ కాలం గడిపేస్తున్నారు. ఆస్ట్రేలియా, ఫ్రాన్స్ లాంటి దేశాలు చేస్తున్న ప్రయోగాలను చూసైనా.. మన ప్రభుత్వం, తల్లిదండ్రులు మేల్కోవాల్సిన సమయం ఆసన్నమైంది.
