ఇరాన్ నిరసనల్లో 2000 మంది మృతి: అధికారికంగా ఒప్పుకున్న ప్రభుత్వం!

ఇరాన్ అట్టుడుకుతోంది.. 2000 మంది మృతి! సొంత ప్రభుత్వమే ఒప్పుకున్న చేదు నిజం

సొంత ప్రజలపైనే ఒక ప్రభుత్వం ఇంత కసితో విరుచుకుపడుతుందా? రోడ్ల మీద రక్తం ఏరులై పారుతుంటే.. అది "ఉగ్రవాదుల పనే" అని బుకాయిస్తుందా? ఇరాన్‌లో ప్రస్తుతం జరుగుతున్నది ఇదే. ఇప్పటిదాకా ఎవరూ నోరు మెదపని నిజం.. ఇప్పుడు బయటపడింది. ఇరాన్‌లో జరుగుతున్న అల్లర్లలో దాదాపు 2,000 మంది చనిపోయారని సాక్షాత్తు ఆ ప్రభుత్వ అధికారే ఒప్పుకోవడం ఇప్పుడు ప్రపంచవ్యాప్తంగా ప్రకంపనలు సృష్టిస్తోంది. అసలు ఇరాన్ ఎందుకు రగులుతోంది?

మొట్టమొదటి సారి అధికారిక ప్రకటన: 

ఇన్నాళ్లూ మరణాల సంఖ్యను దాచిపెడుతూ వచ్చిన ఇరాన్ ప్రభుత్వం.. తొలిసారిగా నిజం ఒప్పుకుంది. "గత రెండు వారాలుగా జరుగుతున్న నిరసనల్లో దాదాపు 2,000 మంది ప్రాణాలు కోల్పోయారు" అని ఒక ఇరాన్ ఉన్నతాధికారి రాయిటర్స్ (Reuters) వార్తా సంస్థకు తెలిపారు. అయితే, ఇందులో ఆందోళనకారులతో పాటు భద్రతా సిబ్బంది కూడా ఉన్నారని, ఇదంతా "ఉగ్రవాదుల పనే" అని ఆయన సమర్ధించుకోవడం గమనార్హం.

ఎందుకు ఈ అల్లర్లు? : 

నిప్పు లేనిదే పొగ రాదు కదా! ఇరాన్ ప్రజలు రోడ్ల మీదకు రావడానికి బలమైన కారణాలు ఉన్నాయి:

• ఆర్ధిక సంక్షోభం: ఇరాన్ కరెన్సీ (Rial) విలువ పాతాళానికి పడిపోయింది. నిత్యావసరాల ధరలు ఆకాశాన్ని తాకుతున్నాయి. బతకడమే కష్టంగా మారిన సామాన్యుడు, ఇక భరించలేక రోడ్డెక్కాడు.

• ఆంక్షల వలయం: అమెరికా సహా పాశ్చాత్య దేశాల ఆంక్షలతో ఇరాన్ ఆర్థిక వ్యవస్థ కుప్పకూలింది. దీనికి తోడు ప్రభుత్వం తీసుకున్న కఠిన నిర్ణయాలు ప్రజాగ్రహానికి ఆజ్యం పోశాయి.

ప్రపంచ దేశాల వార్నింగ్: 

ఈ మారణహోమంపై ఐక్యరాజ్యసమితి (UN) తీవ్ర దిగ్భ్రాంతి వ్యక్తం చేసింది. "సొంత ప్రజలపైనే ఇలాంటి దారుణమా? ఇది ఆమోదయోగ్యం కాదు" అని మండిపడింది. మరోవైపు జర్మనీ ఛాన్స్ లర్ "ఇరాన్ ప్రభుత్వం తన చివరి రోజుల్లో ఉంది" అని సంచలన వ్యాఖ్యలు చేశారు. ఇంటర్నెట్ బంద్ చేసి మరీ ప్రభుత్వం చేస్తున్న ఈ అణచివేత చర్యలు.. 1979 విప్లవం తర్వాత ఇరాన్ ఎదుర్కొంటున్న అతిపెద్ద సవాలుగా నిపుణులు చెబుతున్నారు.

బాటమ్ లైన్ : 

ఇది కేవలం ఇరాన్ సమస్య కాదు.. రాబోయే పెనుమార్పుకు సంకేతం!

1. మానవ హక్కుల ఉల్లంఘన: 2000 మంది చనిపోవడం అంటే మాటలు కాదు. ఇది ఆధునిక చరిత్రలో ప్రభుత్వమే చేసిన అతిపెద్ద నరమేధాల్లో ఒకటిగా మిగిలిపోవచ్చు.

2. మార్పు తథ్యం: చరిత్ర చెబుతున్న సత్యం ఏంటంటే.. ఆకలి మంటల్లో నుంచి పుట్టిన విప్లవాన్ని ఏ సైన్యం కూడా ఆపలేదు. ఇరాన్ ప్రభుత్వం దిగిరాక తప్పని పరిస్థితి కనిపిస్తోంది.