అమెరికా ముక్కలు చేసిన విమానం.. ఇరాన్ లో ఇంకా ఎగురుతోంది! ఎలా సాధ్యం?

అమెరికా పడేసిన 'టాప్ గన్' విమానం.. ఇప్పుడు ఇరాన్ చేతిలో వజ్రాయుధం! అసలు కథ ఇదే

మీరు 'టాప్ గన్' (Top Gun) సినిమా చూశారా? అందులో హీరో టామ్ క్రూజ్ నడిపే పవర్ ఫుల్ విమానం F-14 టాం క్యాట్ (F-14 Tomcat). విచిత్రం ఏంటంటే.. ఈ విమానాన్ని తయారు చేసిన అమెరికా ఎప్పుడో దీన్ని రిటైర్ చేసి తుక్కు కింద పడేసింది. కానీ, అమెరికాకు బద్ధ శత్రువైన ఇరాన్ మాత్రం ఇంకా ఈ విమానాలను ఎంతో ప్రాణప్రదంగా చూసుకుంటోంది. ప్రపంచంలోనే F-14లు ఉన్న ఏకైక దేశం ఇరాన్ మాత్రమే. అసలు అమెరికా విమానం ఇరాన్ చేతికి ఎలా చిక్కింది?

స్నేహం ఉన్నప్పుడు కొన్నారు.. శత్రుత్వం వచ్చాక దాచారు

1970లలో ఇరాన్ మరియు అమెరికా మధ్య స్నేహం ఉండేది. అప్పుడు ఇరాన్ పాలకుడిగా ఉన్న 'షా' (Shah), అమెరికా నుంచి 79 అత్యాధునిక F-14 విమానాలను కొనుగోలు చేశారు. కానీ 1979లో ఇరాన్ విప్లవం రావడంతో కథ అడ్డం తిరిగింది. అమెరికా మిత్రదేశం కాస్తా శత్రుదేశంగా మారింది. అప్పటికే డెలివరీ అయిన విమానాలు ఇరాన్ చేతిలో ఉండిపోయాయి.

అమెరికా భయం.. సొంత విమానాలనే నాశనం చేసుకుంది

ఇరాన్ దగ్గర ఉన్న F-14లకు స్పేర్ పార్ట్స్ దొరక్కుండా చేయాలని అమెరికా కంకణం కట్టుకుంది. ఇందుకోసం అమెరికా తన దగ్గర ఉన్న మిగిలిన F-14 విమానాలన్నింటినీ ముక్కలు ముక్కలుగా చేసి, ఒక్క నట్టు, బోల్టు కూడా బ్లాక్ మార్కెట్ ద్వారా ఇరాన్ చేతికి చిక్కకుండా జాగ్రత్త పడింది.

ఇరాన్ 'జుగాడ్' టెక్నాలజీ

స్పేర్ పార్ట్స్ లేకపోయినా ఇరాన్ వెనక్కి తగ్గలేదు. ఉన్న విమానాల్లో కొన్నింటిని విప్పేసి, వాటి పార్ట్స్ ను మిగిలిన వాటికి బిగించి (Cannibalization) నడుపుతోంది. అంతేకాదు, రివర్స్ ఇంజనీరింగ్ (Reverse Engineering) ద్వారా కొన్ని పార్ట్స్ ను స్వయంగా తయారు చేసుకుంటూ, గత 40 ఏళ్లుగా ఈ 'టాప్ గన్' విమానాలను ఆకాశంలో ఎగురవేస్తోంది. అమెరికాకు ఇరాన్ ఇస్తున్న అతిపెద్ద షాక్ ఇదే.

బాటమ్ లైన్ 

ఇది కేవలం విమానం కాదు.. ఇరాన్ ఆత్మగౌరవం!

1. అమెరికా ఆంక్షలు ఎన్ని ఉన్నా.. తాము తలవంచలేదని చెప్పడానికి ఇరాన్ ఈ విమానాలను ఒక సింబల్ గా వాడుకుంటోంది.

2. ఇరాన్ దగ్గర F-14లు ఉన్నా, అవి ఇప్పుడున్న అమెరికా లేటెస్ట్ జెట్స్ (F-35, F-22) ముందు నిలబడలేవు. యుద్ధంలో పాతదైనా సరే, ఆయుధం ఆయుధమే!

ఇది కూడా చదవండి (Also Read):

ఇరాన్ నుంచి భారతీయుల తరలింపు: రేపే తొలి విమానం ఢిల్లీకి