బంగారం.. ఇది ఇప్పుడు కేవలం అలంకరణ వస్తువు కాదు, అత్యంత సురక్షితమైన ఆస్తి! గతేడాది (2025) బంగారం ప్రపంచవ్యాప్తంగా సరికొత్త రికార్డులను తిరగరాసింది. ప్రపంచమంతా పోటీపడి మరీ బంగారాన్ని కొంటుంటే, ఎప్పుడూ బంగారం అంటే పడిచచ్చే భారతీయులు మాత్రం వెనకడుగు వేశారు. అసలు గ్లోబల్ మార్కెట్ లో ఏం జరుగుతోంది? బ్యాంకులు ఎందుకు టన్నుల కొద్దీ బంగారాన్ని దాచుకుంటున్నాయి? రికార్డు స్థాయి ధరల వల్ల మన దేశంలో బంగారం కొనుగోళ్లు ఎంత తగ్గాయి? వరల్డ్ గోల్డ్ కౌన్సిల్ (WGC) లేటెస్ట్ రిపోర్ట్ ఏం చెబుతోంది?
5 వేల టన్నుల మైలురాయి.. ఇన్వెస్ట్మెంట్ జాతర
ప్రపంచ స్వర్ణమండలి (WGC) నివేదిక ప్రకారం.. 2025లో ప్రపంచవ్యాప్తంగా బంగారం డిమాండ్ ఆల్ టైమ్ హైకి చేరింది. చరిత్రలో తొలిసారిగా 5,002 టన్నుల బంగారాన్ని కొనుగోలు చేశారు. ప్రపంచ దేశాల్లో రాజకీయ అస్థిరత, ఆర్థిక మాంద్యం భయాల వల్ల పెద్ద పెద్ద ఇన్వెస్టర్లు, దేశాలు బంగారాన్ని సేఫ్ జోన్ గా భావిస్తున్నాయి. అందుకే ఆభరణాల కంటే.. పెట్టుబడుల రూపంలోనే (బిస్కెట్లు, బాండ్లు) బంగారం డిమాండ్ భారీగా పెరిగింది. 2024లో 1,185 టన్నులుగా ఉన్న పెట్టుబడి డిమాండ్, 2025లో ఏకంగా 2,175 టన్నులకు చేరడం విశేషం.
బ్యాంకుల వేట.. ఆభరణాల కోత
మరో ఆసక్తికరమైన విషయం ఏంటంటే.. వివిధ దేశాల సెంట్రల్ బ్యాంకులు పోటీపడి బంగారం కొంటున్నాయి. 2025లో సెంట్రల్ బ్యాంకులు 863 టన్నుల బంగారాన్ని రిజర్వ్ చేసుకున్నాయి. ఇందులో పోలాండ్ నేషనల్ బ్యాంక్ అత్యధికంగా 102 టన్నులు కొనుగోలు చేసింది. అయితే, ధరలు మండిపోతుండటంతో సామాన్యులు ఆభరణాలు కొనడం తగ్గించారు. ప్రపంచవ్యాప్తంగా ఆభరణాల డిమాండ్ 18% తగ్గింది. కానీ ధరలు పెరగడం వల్ల.. అమ్మిన బంగారం విలువ మాత్రం 18% పెరిగి 172 బిలియన్ డాలర్లకు చేరుకుంది.
భారత్ లో సీన్ రివర్స్.. కొనుగోళ్లు డౌన్!
బంగారం వినియోగంలో టాప్ లో ఉండే భారత్ లో ఈసారి సీన్ రివర్స్ అయ్యింది. 2025లో మన దేశంలో బంగారం డిమాండ్ 11% పడిపోయింది. 2024లో 802.8 టన్నులు కొంటే, 2025లో అది 710.9 టన్నులకు పడిపోయింది. రికార్డు స్థాయి ధరలే ఇందుకు ప్రధాన కారణం. అయితే ఇక్కడొక ట్విస్ట్ ఉంది. మనం తక్కువ బంగారం కొన్నా.. దానికి పెట్టిన ఖర్చు మాత్రం భారీగా పెరిగింది. 2024లో రూ. 5.75 లక్షల కోట్లు ఖర్చు చేస్తే, 2025లో ఏకంగా రూ. 7.51 లక్షల కోట్లు వెచ్చించారు. అంటే తక్కువ బంగారానికి ఎక్కువ డబ్బులు చెల్లించాల్సి వచ్చిందన్నమాట.
2026లో పరిస్థితి ఏంటి?
డబ్ల్యూజీసీ అంచనా ప్రకారం.. 2026లో కూడా బంగారం ధరలు తగ్గే సూచనలు కనిపించడం లేదు. జనవరిలోనే ఔన్సు బంగారం ధర 5,000 డాలర్లు దాటింది. యుద్ధ వాతావరణం, రాజకీయ అనిశ్చితి కొనసాగుతుండటంతో ఇన్వెస్టర్లు బంగారం వైపే చూస్తున్నారు. 2026లో భారత్ లో డిమాండ్ 600 నుంచి 700 టన్నుల మధ్య ఉండొచ్చని అంచనా వేస్తున్నారు.
బంగారం ఇప్పుడు లగ్జరీ కాదు.. నెసెసిటీ!
ధరలు తగ్గుతాయని ఎదురుచూడటం అత్యాశే అవుతుంది. ప్రపంచమే బంగారాన్ని నమ్ముకుంటున్నప్పుడు, మన పోర్ట్ ఫోలియోలో కూడా ఎంతో కొంత బంగారం ఉండటం భవిష్యత్తు అవసరాలకు భరోసా ఇస్తుంది.
