రైడ్ బుక్ చేద్దామని యాప్ ఓపెన్ చేస్తే.. సర్రున పెరిగే ధరలు, డ్రైవర్ల క్యాన్సిలేషన్లతో విసిగిపోయారా? ఓలా, ఉబెర్ వంటి ప్రైవేట్ యాప్ల బాదుడుకు భయపడి ఆటో, క్యాబ్ ఎక్కడమే మానేశారా? అయితే మీకో గుడ్ న్యూస్. ప్రైవేట్ యాప్ల దోపిడీకి కళ్లెం వేస్తూ, అటు డ్రైవర్లకు, ఇటు ప్రయాణికులకు లాభం చేకూర్చేలా ఆంధ్రప్రదేశ్ ప్రభుత్వం (AP Govt) సరికొత్త నిర్ణయం తీసుకుంది.
‘ఆంధ్రా యాత్రి’ (Andhra Yatri) పేరుతో ప్రభుత్వమే స్వయంగా ఓ యాప్ను రంగంలోకి దించుతోంది. ఈ యాప్ వస్తే.. అతి తక్కువ ధరకే ఆటో, కారు, బైక్ రైడ్స్ బుక్ చేసుకోవచ్చు. అసలు ఈ యాప్ స్పెషాలిటీ ఏంటి? కమిషన్ లేకుండా రైడ్స్ ఎలా సాధ్యం? విజయవాడ, తిరుపతి వాసులకు ఇది ఎప్పుడు అందుబాటులోకి వస్తుంది?
ప్రైవేట్ యాప్లు ప్రతి రైడ్కు డ్రైవర్ల నుంచి దాదాపు 20 శాతం వరకు కమిషన్ వసూలు చేస్తున్నాయి. దీనివల్ల డ్రైవర్లకు గిట్టుబాటు కాక, ఆ భారాన్ని ప్రయాణికులపై వేస్తున్నారు. ఈ సమస్యకు పరిష్కారంగా ఏపీ ప్రభుత్వం పీపీపీ (పబ్లిక్-ప్రైవేట్ పార్టనర్షిప్) విధానంలో ‘ఆంధ్రా యాత్రి’ యాప్ను తీసుకొస్తోంది. ఇందులో డ్రైవర్లు ఒక్క రూపాయి కూడా కమిషన్ ఇవ్వాల్సిన పనిలేదు.
కేవలం నిర్వహణ ఖర్చుల కింద అతి తక్కువ రుసుము చెల్లిస్తే చాలు. కారుకు రూ.11, ఆటోకు రూ.5, బైక్కు రూ.3 చొప్పున ఒక్కో ట్రిప్కు వసూలు చేయాలని ప్రభుత్వం యోచిస్తోంది. లేదా రోజు మొత్తానికి రూ.30 నుంచి రూ.50 వరకు చెల్లించి సబ్స్క్రిప్షన్ తీసుకుంటే.. ఎన్ని రైడ్స్ అయినా చేసుకోవచ్చు. దీనివల్ల డ్రైవర్లకు ఆదాయం పెరుగుతుంది, ప్రయాణికులకు చౌకగా ప్రయాణం దొరుకుతుంది.
ఈ యాప్ నిర్వహణ బాధ్యతలను టెండర్ల ద్వారా ఓ ప్రైవేట్ కాంట్రాక్ట్ సంస్థకు అప్పగిస్తారు. డ్రైవర్లు చెల్లించే చిన్నపాటి రుసుములో 10 శాతం కాంట్రాక్టర్కు వెళ్తుంది. మిగిలిన మొత్తాన్ని రవాణాశాఖ యాప్ బ్రాండింగ్, ప్రచారం కోసం ఉపయోగిస్తుంది. కేవలం రైడ్ బుకింగ్ మాత్రమే కాదు, భద్రత విషయంలోనూ ప్రభుత్వం రాజీపడటం లేదు.
ఈ యాప్ను రవాణాశాఖ, ఆర్టీసీ, టూరిజం, పోలీస్, ఆర్టీజీఎస్, కార్మిక శాఖలతో అనుసంధానం చేస్తారు. దీనివల్ల రియల్ టైమ్ ట్రాకింగ్ సాధ్యమవుతుంది. ప్రయాణికులు ఎలాంటి భయం లేకుండా సేఫ్గా గమ్యస్థానాలకు చేరుకోవచ్చు.
ముందుగా ఈ పైలట్ ప్రాజెక్టును రద్దీ ఎక్కువగా ఉండే విజయవాడ, తిరుపతి నగరాల్లో ప్రారంభించాలని ప్రభుత్వం భావిస్తోంది. అక్కడ వచ్చే ఫలితాల ఆధారంగా రాష్ట్రవ్యాప్తంగా విస్తరిస్తారు. కేంద్రం ఇప్పటికే కొన్ని రాష్ట్రాల్లో 'భారత్ యాత్రి'ని ప్రోత్సహిస్తున్న నేపథ్యంలో, భవిష్యత్తులో ఆంధ్రా యాత్రిని అందులో విలీనం చేసే ఆలోచన కూడా ఉంది.
ఇప్పటికే ఆటో డ్రైవర్ల కోసం 'ఆంధ్రా ట్యాక్సీ'ని తెచ్చిన కూటమి సర్కార్, ఇప్పుడు 'ఆంధ్రా యాత్రి'తో మరో ముందడుగు వేస్తోంది. ప్రస్తుతం విధివిధానాల రూపకల్పన జరుగుతోందని, త్వరలోనే టెండర్లు పిలిచి యాప్ను అందుబాటులోకి తెస్తామని అధికారులు చెబుతున్నారు.
కమిషన్ కష్టాలు ఉండవు.. ప్రయాణం భారం కాదు!
'ఆంధ్రా యాత్రి' వస్తే.. మధ్యవర్తుల దోపిడీకి చెక్ పడినట్లే. డ్రైవర్ జేబు నిండుతుంది, ప్రయాణికుడి జేబు చిల్ అవ్వదు.
