సొంతింటి కల నెరవేర్చుకోవాలని ప్లాన్ చేస్తున్నారా? అయితే మీ బడ్జెట్లో కాస్త భారం తగ్గించేలా ఏపీ ప్రభుత్వం అదిరిపోయే తీపికబురు చెప్పింది. ఇల్లు లేదా అపార్ట్మెంట్ కట్టే సమయంలో వసూలు చేసే ఖాళీ స్థలం పన్ను (VLT)ను సగానికి సగం తగ్గిస్తూ సంచలన నిర్ణయం తీసుకుంది. అసలు ఈ పన్ను తగ్గింపు సామాన్యుడికి ఎలా లాభిస్తుంది? ఈ ఆఫర్ పొందాలంటే ఉన్న కండిషన్స్ ఏంటి?
మున్సిపల్ మంత్రి నారాయణ అసెంబ్లీలో ప్రవేశపెట్టిన ఈ సవరణ బిల్లుకు ఏకగ్రీవ ఆమోదముద్ర పడింది. దీని ప్రకారం భవన నిర్మాణ సమయంలో ఇప్పటివరకు నూటికి నూరు శాతం వసూలు చేస్తున్న వీఎల్టీ (Vacant Land Tax) ఇకపై 50 శాతమే వసూలు చేస్తారు. మున్సిపాలిటీలకు ఆదాయం తగ్గినా సరే, నిర్మాణ రంగానికి ఊతం ఇవ్వాలన్నదే తమ లక్ష్యమని ప్రభుత్వం స్పష్టం చేసింది.
వాస్తవానికి 2019లోనే అప్పటి టీడీపీ ప్రభుత్వం ఈ పన్నును సగానికి తగ్గిస్తూ జీవో ఇచ్చినా, తర్వాత వచ్చిన ప్రభుత్వం దాన్ని పక్కనపెట్టేసింది. ఇప్పుడు కూటమి సర్కార్ చట్ట సవరణ చేయడంతో.. రాష్ట్రవ్యాప్తంగా ఇల్లు కట్టుకునే సామాన్యులతో పాటు బిల్డర్లకు ఏటా సుమారు రూ.30 కోట్ల మేర లబ్ధి చేకూరనుంది. ఇది రియల్ ఎస్టేట్ రంగానికి భారీ బూస్ట్ ఇస్తుందని నిపుణులు భావిస్తున్నారు.
ఇప్పటివరకు స్థలం రిజిస్ట్రేషన్ విలువ ఆధారంగా కార్పొరేషన్లలో 0.5 శాతం, మున్సిపాలిటీల్లో 0.2 శాతం చొప్పున పన్ను వసూలు చేసేవారు. తాజా నిర్ణయంతో పర్మిషన్ తీసుకున్న రోజు నుంచే సగం పన్ను ఆదా అవుతుంది. అయితే, ఈ పన్ను తగ్గింపు ప్రయోజనం పొందాలంటే ఒక కండిషన్ ఉంది. అనుమతులు తీసుకున్న తర్వాత ఐదు అంతస్తుల భవనమైతే మూడేళ్లలో, అంతకంటే పెద్దదైతే ఆరేళ్లలోపు పనులు పూర్తి చేయాలి.
పన్ను తగ్గించారు కదా అని రాయితీలు పొంది, ఏళ్ల తరబడి నిర్మాణాన్ని మధ్యలో ఆపేస్తే మాత్రం అసలుకే మోసం వస్తుంది. అలా ఆగిపోయిన నిర్మాణాల నుంచి ఆ 50% పన్నును తిరిగి రికవరీ చేయాలని, అలాగే అక్రమ లేఅవుట్లపై ఉక్కుపాదం మోపాలని ఎమ్మెల్యేలు ప్రభుత్వానికి సూచించారు. ఏదేమైనా సొంతిల్లు కట్టుకునే సామాన్యుడి జేబుకు ఇది కచ్చితంగా బిగ్ రిలీఫ్.
కలల లోగిలికి పచ్చజెండా!
మీరు ఇల్లు కట్టాలనుకుంటే ఇదే సరైన సమయం. అయితే పన్ను ఆదా అవుతోంది కదా అని ప్లాన్ లేకుండా పనులు మొదలుపెట్టి మధ్యలో ఆపేస్తే ఫైన్లు తప్పవు. ప్రభుత్వం పెట్టిన గడువులోపు నిర్మాణం పూర్తి చేస్తేనే ఈ 50% డిస్కౌంట్ వర్తిస్తుందని గుర్తుంచుకోండి.
