Jubilee Hills Robbery: వంటమనిషిగా చేరి కోటి కొట్టేశాడు.. సినిమా రేంజ్ స్కెచ్!
హైదరాబాద్లోని అత్యంత ఖరీదైన ప్రాంతం జూబ్లీహిల్స్ (Jubilee Hills). అక్కడ నిఘా నీడన కూడా దొంగలు తమ ప్రతాపం చూపిస్తున్నారు. అది కూడా బయటి వాళ్లు కాదు.. నమ్మకంగా ఇంట్లో పనిచేసే వాళ్లే కన్నం వేస్తున్నారు. వంటమనిషిగా చేరిన 15 రోజులకే యజమాని కళ్లుగప్పి, తోటి పనివాళ్లకు మత్తు మందు ఇచ్చి.. సినిమా రేంజ్ లో కోటి రూపాయల వజ్రాభరణాలను ఊడ్చుకెళ్లిన ఘటన నందగిరి హిల్స్లో కలకలం రేపింది. అసలు ఆ నేపాలీ గ్యాంగ్ వేసిన స్కెచ్ ఏంటి?
బర్త్డే పార్టీ అని చెప్పి.. మత్తులో ముంచేశాడు
నందగిరి హిల్స్లో నివాసం ఉంటున్న వ్యాపారి రవీంద్రశర్మ ఇంట్లో 15 రోజుల క్రితమే నేపాల్కు చెందిన భూపేంద్రషాహీ అలియాస్ భువన్ వంటమనిషిగా చేరాడు. గురువారం సాయంత్రం యజమానులు బయటకు వెళ్లిన సమయం చూసి తన ప్లాన్ అమలు చేశాడు. ఈరోజు తన పుట్టినరోజు అంటూ వాచ్మన్ దంపతులకు, ఇతర పనిమనుషులకు కూల్డ్రింక్స్లో మత్తుమందు కలిపి ఇచ్చాడు. వారు స్పృహ కోల్పోగానే తన స్నేహితులైన మరో ఇద్దరిని లోపలికి పిలిపించుకున్నాడు.
లాకర్లు బద్దలు.. కోటి విలువైన వజ్రాలు మాయం
అందరూ మత్తులో ఉండగా.. నిందితులు రెండో అంతస్తులోని బెడ్రూమ్లోకి ప్రవేశించారు. అల్మారాలను ధ్వంసం చేసి లాకర్లలో ఉన్న కోటి రూపాయల విలువైన వజ్రాలు, బంగారు ఆభరణాలను బ్యాగుల్లో సర్దుకున్నారు. పని అయిపోయాక దర్జాగా బయటకు వస్తుండగా.. సరిగ్గా అదే సమయానికి రవీంద్రశర్మ కోడలు ఇంటికి చేరుకుంది. ఆమెను గమనించిన దొంగలు, ఆమెను బలంగా తోసివేసి బైక్పై పారిపోయారు.
అలెర్ట్ అయిన పోలీసులు.. ఏజెంట్ అరెస్ట్
లోపలికి వెళ్లి చూసిన కుటుంబ సభ్యులకు వాచ్మన్ దంపతులు తాళ్లతో కట్టేసి, అపస్మారక స్థితిలో కనిపించారు. వెంటనే పోలీసులకు సమాచారం ఇచ్చారు. రంగంలోకి దిగిన జూబ్లీహిల్స్ పోలీసులు.. నిందితుడిని పనిలో చేర్పించిన ఏజెంట్ మదన్ను అదుపులోకి తీసుకుని విచారిస్తున్నారు. ఇది పక్కా ప్రొఫెషనల్ నేపాలీ గ్యాంగ్ పనే అని పోలీసులు అనుమానిస్తున్నారు.
నమ్మకం మంచిదే.. కానీ అతి నమ్మకం వద్దు!
పనిమనుషులు, వంటవాళ్లను పెట్టుకునేటప్పుడు పోలీస్ వెరిఫికేషన్ (Police Verification) తప్పనిసరి. ముఖ్యంగా కొత్తగా చేరేవారి విషయంలో అప్రమత్తంగా ఉండకపోతే ఇలాంటి భారీ మూల్యం చెల్లించుకోక తప్పదు.
