రైల్వే కోడూరు రాజకీయాల్లో కాక రేపుతున్న జనసేన ఎమ్మెల్యే అరవ శ్రీధర్ (Arava Sridhar) ఎపిసోడ్ లో మరో బిగ్ ట్విస్ట్ చోటుచేసుకుంది. ఈ కేసులో బాధితురాలిగా ఉన్న మహిళ తాజాగా ఒక సెల్ఫీ వీడియో విడుదల చేసి సంచలనం సృష్టించారు. "నా పరువు పోయింది.. నా జీవితం నాశనమైంది.. దయచేసి దీన్ని రాజకీయం చేసి పవన్ కల్యాణ్ (Pawan Kalyan) గారి పేరు చెడగొట్టొద్దు" అంటూ ఆవేదన వ్యక్తం చేశారు. ఎమ్మెల్యే మౌనం వెనుక ఉన్న రహస్యం ఏంటి? అసలు ఆ ఫోన్లలో ఏముంది? ఆమె ఎవరిని టార్గెట్ చేశారు?
పవన్ను లాగొద్దు.. బ్రోకర్ పాలిటిక్స్ వద్దు!
తన వ్యక్తిగత సమస్యను అడ్డుపెట్టుకుని జనసేన పార్టీని, పవన్ కల్యాణ్ ప్రతిష్ఠను దెబ్బతీయాలని చూస్తున్నారని ఆమె మండిపడ్డారు. "పవన్ కల్యాణ్ గారు నీతిగా బతికే వ్యక్తి. బ్రోకర్ రాజకీయాల వల్లే ఆయనకు ఇబ్బందులు వస్తున్నాయి. దయచేసి నా విషయాన్ని అడ్డుపెట్టుకుని ఆయన పేరును డ్యామేజ్ చేయకండి" అని విజ్ఞప్తి చేశారు. తన సమస్య కేవలం ఎమ్మెల్యేకు, తనకు సంబంధించినదని.. దీన్ని రాజకీయ లబ్ధి కోసం వాడుకోవద్దని హితవు పలికారు.
ఫోన్లే సాక్ష్యం.. ఎమ్మెల్యే ఎందుకు సైలెంట్?
ఈ వ్యవహారంలో నిజాలు బయటకు రావాలంటే పెద్దగా కష్టపడాల్సిన పనిలేదని ఆమె హింట్ ఇచ్చారు. "నా సెల్ ఫోన్, ఎమ్మెల్యే అరవ శ్రీధర్ సెల్ ఫోన్ పరిశీలిస్తే వాస్తవాలు వాటంతట అవే బయటకు వస్తాయి. మా ఇద్దరి మధ్య గడిచిన ఒకటిన్నర సంవత్సరాల విషయాలు మాకే తెలుసు. అందుకే ఎమ్మెల్యే గారు ఇప్పటివరకు బయటకు వచ్చి మాట్లాడటం లేదు" అని ఆమె సంచలన వ్యాఖ్యలు చేశారు. ఎమ్మెల్యే మౌనం వెనుక అసలు కథ ఉందని ఆమె పరోక్షంగా చెప్పకనే చెప్పారు.
నేను పారిపోలేదు.. అంతా తప్పుడు ప్రచారం
తాను పరారీలో ఉన్నానంటూ జరుగుతున్న ప్రచారాన్ని ఆమె తీవ్రంగా ఖండించారు. "నా దగ్గర ఒకే ఫోన్ ఉంది.. అది ఆన్ లోనే ఉంది. యూపీఐ లావాదేవీలు కూడా జరుగుతున్నాయి. కావాలనే కొందరు డబ్బులు ఇచ్చి నాపై దుష్ప్రచారం చేయిస్తున్నారు" అని ఆవేదన వ్యక్తం చేశారు. ఈ మొత్తం ఎపిసోడ్ లో తాతంశెట్టి నాగేంద్ర అనే వ్యక్తిని ఆమె టార్గెట్ చేస్తూ తీవ్ర ఆరోపణలు చేశారు. దమ్ముంటే ఆధారాలతో మాట్లాడాలని సవాల్ విసిరారు.
ఇది పొలిటికల్ గేమ్ కాదు.. పర్సనల్ వార్!
బాధితురాలి మాటలను బట్టి చూస్తుంటే.. ఇది కేవలం ఇద్దరి వ్యక్తుల మధ్య గొడవలా కనిపిస్తోంది. కానీ దాన్ని రాజకీయంగా వాడుకుంటున్నారన్నది ఆమె ఆరోపణ. మరి ఆ రెండు ఫోన్లలో ఏముందన్నది బయటపడితేనే అసలు నిజం తెలుస్తుంది.
