తమిళనాడులో అసెంబ్లీ ఎన్నికల వేడి రాజుకుంటున్న వేళ.. దశాబ్దాల నాటి ఉద్వేగభరితమైన సమస్య మళ్లీ తెరపైకి వచ్చింది. సొంత గడ్డపైనే పరాయివాళ్లుగా బతుకుతున్న శ్రీలంక తమిళుల తలరాతను మార్చడానికి సీఎం ఎం.కె. స్టాలిన్ (MK Stalin) ఒక కీలక అడుగు వేశారు.
దాదాపు 89 వేల మంది శరణార్థులకు భారత పౌరసత్వం (Indian Citizenship) ఇవ్వాలని కోరుతూ ప్రధాని నరేంద్ర మోదీకి (PM Modi) ఆదివారం ఒక సుదీర్ఘ లేఖ రాశారు. 40 ఏళ్లుగా ఇక్కడే ఉంటున్న వారికి ఇంకా ఈ నరకం ఎందుకు? అమిత్ షా విమర్శలకు స్టాలిన్ లేఖతో చెక్ పెట్టారా? ఈ లేఖ ఇప్పుడు తమిళ రాజకీయాల్లో హాట్ టాపిక్గా మారింది.
శ్రీలంకలో 1983 నుంచి జరిగిన జాతి హింస కారణంగా ప్రాణాలు అరచేతిలో పెట్టుకుని తమిళనాడుకు వచ్చిన వేలాది కుటుంబాలు నేటికీ పౌరసత్వం లేక అగమ్యగోచర స్థితిలో ఉన్నాయని స్టాలిన్ తన లేఖలో ఆవేదన వ్యక్తం చేశారు.
ప్రస్తుతం రాష్ట్రంలోని వివిధ శిబిరాల్లో మగ్గుతున్న 89,000 మంది శరణార్థుల్లో దాదాపు 40 శాతం మంది ఇక్కడే, అంటే భారత గడ్డపైనే జన్మించారని ఆయన ప్రధాని దృష్టికి తీసుకెళ్లారు. చాలా కుటుంబాలు 30 నుంచి 40 ఏళ్లుగా ఇక్కడే నివసిస్తున్నాయని, వారిని ఇంకా శరణార్థులుగా చూడటం సరికాదని అభిప్రాయపడ్డారు. ఈ సమస్యను మానవీయ కోణంలో, రాజ్యాంగబద్ధంగా పరిష్కరించాలని కోరారు.
ముఖ్యంగా 2015 జనవరి 9కి ముందు భారత్కు వచ్చిన వారిని 'అక్రమ వలసదారులు'గా పరిగణించవద్దని స్టాలిన్ విజ్ఞప్తి చేశారు. వారికి పాస్పోర్ట్, వీసా నిబంధనల నుంచి మినహాయింపు ఇవ్వాలని, తద్వారా వారు భారత పౌరసత్వం పొందడానికి అర్హత సాధిస్తారని సూచించారు.
అంతేకాకుండా పౌరసత్వ దరఖాస్తులను వేగంగా పరిశీలించేందుకు జిల్లా స్థాయి అధికారులకు తగిన అధికారాలు కట్టబెట్టాలని, దీనివల్ల ప్రక్రియ వేగవంతం అవుతుందని కేంద్రానికి తెలిపారు. ఎన్నికల ముంగిట డీఎంకే ప్రభుత్వం తీసుకున్న ఈ నిర్ణయం శ్రీలంక తమిళుల పట్ల వారి చిత్తశుద్ధిని నిరూపించుకునే ప్రయత్నంగా కనిపిస్తోంది.
దీనికి ఒక రాజకీయ నేపథ్యం కూడా ఉంది. గతేడాది పార్లమెంటులో ‘ఇమ్మిగ్రేషన్ అండ్ ఫారినర్స్ బిల్లు 2025’పై చర్చ జరిగినప్పుడు కేంద్ర హోంమంత్రి అమిత్ షా డీఎంకేపై విమర్శలు చేశారు. డీఎంకే ఎప్పుడూ శరణార్థుల సమస్యను తన దృష్టికి తీసుకురాలేదని ఆరోపించారు. దీనిని డీఎంకే ఎంపీ కనిమొళి అప్పుడే తీవ్రంగా ఖండించారు.
తమిళనాడు ప్రభుత్వం గతంలో పంపిన అనేక లేఖల వివరాలను ఆమె బయటపెట్టారు. ఆ విమర్శలకు సమాధానంగానే ఇప్పుడు స్టాలిన్ నేరుగా ప్రధానికే బహిరంగ లేఖ రాయడం ద్వారా ఈ అంశంలో కేంద్రంపై ఒత్తిడి పెంచాలని నిర్ణయించుకున్నట్లు స్పష్టమవుతోంది.
క్షేత్రస్థాయిలో పరిస్థితి ఎంత దారుణంగా ఉందో చెప్పడానికి గణాంకాలే నిదర్శనం. గత నాలుగేళ్లలో వేలాది మంది దరఖాస్తు చేసుకున్నప్పటికీ కేవలం 11 మంది శ్రీలంక శరణార్థులకు మాత్రమే భారత పౌరసత్వం లభించింది. వీరిలో కేవలం ఒక్కరికి మాత్రమే ఓటు హక్కు దక్కింది. మిగిలిన 10 మంది దరఖాస్తులు ఇంకా పరిశీలనలో ఉన్నాయి.
ఈ నెమ్మదైన ప్రక్రియ వల్ల వేలాది మంది యువత చదువు, ఉద్యోగ అవకాశాలను కోల్పోతున్నారని, వారి భవిష్యత్తు అంధకారంలో ఉందని స్టాలిన్ ఆవేదన వ్యక్తం చేశారు. ఎన్నికల వేళ స్టాలిన్ వేసిన ఈ అస్త్రం తమిళ ఓటర్లలో ఎలాంటి మార్పు తెస్తుందో చూడాలి.
ఓట్ల కోసమా? లేక సాటి తమిళుల కోసమా?
కారణం ఏదైనా.. ఆ 89 వేల మందికి విముక్తి కలిగితే చాలు. బంతి ఇప్పుడు కేంద్రం కోర్టులో ఉంది.
