రష్యా-ఉక్రెయిన్ యుద్ధం నాలుగో ఏట అడుగుపెట్టినా బాంబుల మోత తగ్గడం లేదు కానీ, ఇప్పుడు మాటల తూటాలు మాత్రం హద్దులు దాటుతున్నాయి. ఇన్నాళ్లు దౌత్యపరమైన విమర్శలకే పరిమితమైన ఉక్రెయిన్ అధ్యక్షుడు వోలోడిమిర్ జెలెన్స్కీ (Volodymyr Zelenskyy), ఇప్పుడు హంగేరీ ప్రధాని విక్టర్ ఓర్బన్పై వ్యక్తిగత దాడికి దిగడం అంతర్జాతీయ స్థాయిలో సంచలనంగా మారింది. రష్యా అధ్యక్షుడు పుతిన్కు అత్యంత సన్నిహితుడైన ఓర్బన్ను ఉద్దేశించి జెలెన్స్కీ చేసిన "బాడీ షేమింగ్" కామెంట్స్ ఇప్పుడు దౌత్య వర్గాల్లో హాట్ టాపిక్గా మారాయి. అసలు జెలెన్స్కీ అంత మాట ఎందుకు అనాల్సి వచ్చింది? పొరుగు దేశ ప్రధానిపై ఎందుకింత అసహనం?
సైన్యం కాదు.. పొట్ట మాత్రమే పెరుగుతోంది!
ఐరోపా దేశాల రక్షణను గాలికి వదిలేసి, ఓర్బన్ తన స్వలాభం కోసమే చూసుకుంటున్నారని జెలెన్స్కీ తీవ్రస్థాయిలో మండిపడ్డారు. ఒకవైపు ఉక్రెయిన్ రష్యాను అడ్డుకుంటూ ఐరోపాను కాపాడుతుంటే, పొరుగున ఉన్న హంగేరీ మాత్రం కనీసం సాయం చేయడం లేదని ఆవేదన వ్యక్తం చేశారు. ఈ క్రమంలోనే ఆయన నోరు జారారు. విక్టర్ ఓర్బన్ తన దేశ సైనిక సామర్థ్యాన్ని పెంచుకోవాల్సింది పోయి, తన పొట్టను మాత్రమే పెంచుకుంటున్నారంటూ ఎద్దేవా చేశారు. చరిత్రను మర్చిపోవద్దని హెచ్చరిస్తూ, రష్యా ట్యాంకులు మళ్లీ బుడాపెస్ట్ వీధుల్లోకి రాకుండా ఉండాలంటే ఐరోపా దేశాలన్నీ ఐక్యంగా ఉండాలని, కానీ ఓర్బన్ మాత్రం పుతిన్ చంకలో దూరి ఆడుతున్నారని ఆగ్రహం వ్యక్తం చేశారు.
పుతిన్ ఫ్రెండ్.. ఉక్రెయిన్ కు శత్రువు?
యుద్ధం మొదలైనప్పటి నుంచి హంగేరీ ప్రధాని విక్టర్ ఓర్బన్ (Viktor Orban) వైఖరి ఉక్రెయిన్కు పెద్ద తలనొప్పిగా మారింది. రష్యాపై యూరోపియన్ యూనియన్ ఆంక్షలు విధించాలనుకున్న ప్రతిసారీ ఓర్బన్ అడ్డుపుల్ల వేస్తున్నారు. కీవ్కు అందాల్సిన ఆయుధాలు, నిధులు అందకుండా అడ్డుతగలడమే కాకుండా, శత్రుదేశమైన రష్యా అధ్యక్షుడు పుతిన్తో బహిరంగంగానే స్నేహం చేస్తున్నారు. దీనివల్ల ఉక్రెయిన్ ఆత్మరక్షణలో ఇబ్బందులు ఎదుర్కొంటోందన్నది జెలెన్స్కీ ప్రధాన ఆరోపణ. పొరుగు దేశంగా ఉండి కూడా బాధ్యతారాహిత్యంగా వ్యవహరిస్తున్నారని జెలెన్స్కీ మండిపడటానికి ప్రధాన కారణం ఇదే.
శాంతి చర్చలు ఫెయిల్.. యుద్ధం కంటిన్యూ!
మరోవైపు శాంతి స్థాపన కోసం అబుదాబి వేదికగా జరిగిన రెండో విడత చర్చలు కూడా విఫలమయ్యాయి. ఈ భేటీలో అమెరికా మాజీ అధ్యక్షుడు డొనాల్డ్ ట్రంప్ ప్రతినిధి స్టీవ్ విట్కాఫ్, అల్లుడు జేర్డ్ కుష్నర్ వంటి ప్రముఖులు పాల్గొన్నప్పటికీ ఫలితం శూన్యం. డాన్బాస్ ప్రాంతం నుంచి ఉక్రెయిన్ సైన్యం పూర్తిగా వెళ్లిపోవాలని రష్యా పట్టుబడుతుంటే, తమ సార్వభౌమాధికారాన్ని వదులుకునేది లేదని ఉక్రెయిన్ తేల్చిచెప్పింది. రష్యా తన భూభాగం నుండి వెళ్లిపోతేనే యుద్ధ విరమణ సాధ్యమని స్పష్టం చేసింది. ఈ ప్రతిష్టంభన నేపథ్యంలో రష్యా దాడులను తిప్పికొట్టేందుకు ఐరోపా దేశాలు తమ రక్షణ ఉత్పత్తులను వేగవంతం చేయాలని, మాస్కోపై మరింత ఒత్తిడి తీసుకురావాలని జెలెన్స్కీ విజ్ఞప్తి చేశారు.
దౌత్యం పోయి.. వ్యక్తిగతం వచ్చింది!
దేశాధినేతల మధ్య మాటల యుద్ధం హద్దులు దాటడం.. యుద్ధ తీవ్రతను, ఉక్రెయిన్ అసహనాన్ని సూచిస్తోంది. ఈ వ్యాఖ్యలు ఇరు దేశాల సంబంధాలను మరింత దెబ్బతీసేలా ఉన్నాయి.
