Deepfake Cyber Crime: నిర్మలా సీతారామన్ ఫేక్ వీడియోతో వృద్ధురాలికి రూ. 87 లక్షల టోకరా.. ట్రేడింగ్ యాప్ పేరుతో భారీ స్కామ్!
సైబర్ నేరగాళ్లు ఎప్పటికప్పుడు సరికొత్త టెక్నాలజీని వాడుకుంటూ అమాయకుల జేబులకు చిల్లులు పెడుతున్నారు. ఒకప్పుడు కేవలం ఫోన్ కాల్స్, ఓటీపీలకే పరిమితమైన కేటుగాళ్లు.. ఇప్పుడు ఏకంగా ఏఐ (ఆర్టిఫిషియల్ ఇంటెలిజెన్స్) డీప్ఫేక్ టెక్నాలజీతో ప్రముఖుల ముఖాలను వాడుకుంటూ బురిడీ కొట్టిస్తున్నారు. తాజాగా కేంద్ర ఆర్థిక మంత్రి నిర్మలా సీతారామన్ ఫోటోలు, వీడియోలనే వాడుకుంటూ సైబర్ నేరగాళ్లు రెచ్చిపోయారు. సాక్షాత్తు మంత్రి గారే చెబుతున్నారని నమ్మి ఓ వృద్ధురాలు ఏకంగా రూ. 87.96 లక్షలు పోగొట్టుకున్న దారుణ ఘటన మల్కాజిగిరిలో వెలుగుచూసింది. మన వరంగల్ సహా రాష్ట్రవ్యాప్తంగా స్మార్ట్ఫోన్ వాడే ప్రతి ఒక్కరికీ ఇదొక పెద్ద హెచ్చరిక.
వల విసిరింది ఇలా..
బాధిత వృద్ధురాలు ఇంట్లో కూర్చుని తన ఫోన్లో సోషల్ మీడియాను స్క్రోల్ చేస్తుండగా ఒక వీడియో ఆమె కంటపడింది. అందులో కేంద్ర ఆర్థిక మంత్రి నిర్మలా సీతారామన్ స్టాక్ మార్కెట్ పెట్టుబడులు, లాభాల గురించి వివరిస్తున్నట్లుగా ఉంది. అయితే, అది ముమ్మాటికీ ఏఐ (AI) తో సృష్టించిన నకిలీ (డీప్ఫేక్) వీడియో అని పాపం ఆ వృద్ధురాలికి తెలియదు. దేశ ఆర్థిక మంత్రి స్వయంగా స్టాక్ మార్కెట్ ట్రిక్స్ చెబుతున్నారు కదా అని పూర్తిగా నమ్మేసిన ఆమె, ఆ వీడియో కింద ఉన్న లింక్ను క్లిక్ చేశారు. అక్కడే ఆమె సైబర్ కేటుగాళ్ల ఉచ్చులో పడిపోయారు.
ట్రేడింగ్ యాప్ పేరుతో బురిడీ
ఆ లింక్ క్లిక్ చేసిన వెంటనే సైబర్ నేరగాళ్లు రంగంలోకి దిగారు. బాధితురాలికి వాట్సాప్ ద్వారా కాల్స్ చేసి, తాము ఒక పెద్ద ట్రేడింగ్ సంస్థ ప్రతినిధులమని ఎంతో నమ్మకంగా పరిచయం చేసుకున్నారు. ‘ట్రేడ్ యాప్’ (TradeApp) అనే తమ ప్లాట్ఫామ్లో పెట్టుబడి పెడితే భారీ లాభాలు వస్తాయని మాయమాటలు చెప్పారు. ఆమెను నమ్మించడానికి ఐడీ ప్రూఫ్స్, బ్యాంక్ అకౌంట్ వివరాలు తీసుకుని, పక్కా ప్రొఫెషనల్స్ లాగా ఒక యూజర్ ఐడీ, పాస్వర్డ్ క్రియేట్ చేసి ఇచ్చారు.
లాభాల ఆశచూపి రూ. 87 లక్షలు లూటీ
విశ్వాసం కుదరడం కోసం కేటుగాళ్లు మొదట ఆమెతో కేవలం రూ. 60 వేలు ఇన్వెస్ట్ చేయించారు. ఆ తర్వాత స్టాక్ మార్కెట్లో భారీగా లాభాలు వస్తున్నట్లు నకిలీ గ్రాఫిక్స్ను యాప్ స్క్రీన్ పై చూపించారు. అది నిజమేనని నమ్మిన వృద్ధురాలు దఫదఫాలుగా తన జీవితకాల పొదుపు మొత్తం రూ. 87.96 లక్షలను వారి ఖాతాల్లోకి డిపాజిట్ చేసేశారు. తన అకౌంట్లో కోట్ల రూపాయల లాభం కనిపిస్తుండటంతో, బాధితురాలు ఆ మొత్తాన్ని విత్ డ్రా చేసుకోవడానికి ప్రయత్నించారు. అప్పుడు కేటుగాళ్లు సాంకేతిక కారణాలు, ట్యాక్స్ లు అంటూ సాకులు చెబుతూ ఆమెను అడ్డుకున్నారు.
పోలీసుల దర్యాప్తు.. అప్రమత్తంగా ఉండండి!
ఎంత ప్రయత్నించినా డబ్బు చేతికి రాకపోవడంతో, మోసపోయానని గ్రహించిన బాధితురాలు కన్నీరుమున్నీరవుతూ వెంటనే మల్కాజిగిరి సైబర్ క్రైమ్ పోలీసులను ఆశ్రయించారు. బాధితురాలి ఫిర్యాదు మేరకు కేసు నమోదు చేసిన పోలీసులు, ఆ డబ్బు ఏయే అకౌంట్ల లోకి మళ్లించారో దర్యాప్తు చేస్తున్నారు. సోషల్ మీడియాలో కనిపించే ప్రముఖుల వీడియోలు అన్నీ నిజం కావని, ముఖ్యంగా పెట్టుబడులు పెట్టమని అడిగే లింక్స్ అస్సలు క్లిక్ చేయకూడదని పోలీసులు హెచ్చరిస్తున్నారు. మీకు కూడా ఇలాంటి అనుమానాస్పద లింక్స్ లేదా కాల్స్ వస్తే వెంటనే 1930 టోల్ ఫ్రీ నంబర్కు ఫిర్యాదు చేయండి.
