LPG Alternative: వంట గ్యాస్ ధరలకు చెక్.. ముంచుకొస్తున్న కొరతకు భారత్ పవర్ఫుల్ ‘ప్లాన్ బి’ ఇదే!
పశ్చిమాసియాలో రోజురోజుకూ భగ్గుమంటున్న యుద్ధ వాతావరణం, కొనసాగుతున్న ఉద్రిక్తతలు ప్రపంచవ్యాప్త ఇంధన సరఫరా గొలుసును తీవ్రంగా దెబ్బతీస్తున్నాయి. దీని ప్రభావంతో రానున్న రోజుల్లో వంట గ్యాస్ (LPG) ధరలు విపరీతంగా పెరగడమే కాకుండా, మన దేశంలో గ్యాస్ కొరత ఏర్పడే ప్రమాదం కూడా స్పష్టంగా కనిపిస్తోంది.
సరిగ్గా ఇలాంటి విపత్కర ఇంధన సంక్షోభం నుంచి దేశ ప్రజలను గట్టెక్కించేందుకు భారత ప్రభుత్వం ఇప్పుడు ఒక పవర్ఫుల్ ‘ప్లాన్ బి’ని సిద్ధం చేసింది. అదే డైమిథైల్ ఈథర్ (DME). ఇది విదేశీ దిగుమతులపై మన దేశ ఆధారపడటాన్ని భారీగా తగ్గించడమే కాకుండా, భవిష్యత్తులో సామాన్యుడి జేబుకు ఎంతో ఊరటనివ్వనుందని ఇంధన రంగ విశ్లేషకులు చెబుతున్నారు.
అసలు ఏమిటీ డిఎంఈ (DME)?
డైమిథైల్ ఈథర్ (DME) అనేది మిథనాల్ను ఉపయోగించి కృత్రిమంగా తయారుచేసే ఒక ప్రత్యేకమైన గ్యాస్. దీని అతిపెద్ద ప్రాముఖ్యత ఏమిటంటే, ఈ వాయువు తయారీకి అవసరమైన ముడి పదార్థాలైన బయోమాస్, బొగ్గు, గాలిలోని కార్బన్ డయాక్సైడ్ మనకు చాలా సులభంగా, స్థానికంగానే దొరుకుతాయి.
రసాయన పరంగా చూస్తే ఎల్పీజీ మరియు డిఎంఈ దాదాపు ఒకేలా ఉంటాయి. అందుకే దీనిని నేరుగా వంట గ్యాస్గా వాడవచ్చు లేదా ఎల్పీజీతో కలిపి (బ్లెండింగ్ చేసి) కూడా ఉపయోగించవచ్చు. పైగా ఇది వాతావరణ కాలుష్యాన్ని తగ్గించే అత్యంత స్వచ్ఛమైన ఇంధనం కావడం మరో ప్రధాన ఆకర్షణ.
పాత స్టవ్, సిలిండర్ మార్చాల్సిన పనిలేదు
సాధారణంగా మార్కెట్లోకి ఏదైనా కొత్త రకం గ్యాస్ వస్తుందంటే, దానికి తగ్గట్టుగా మన ఇంట్లోని పాత స్టవ్ లేదా సిలిండర్ మార్చుకోవాలేమోనని సామాన్యులు ఆందోళన చెందుతారు. కానీ డిఎంఈ విషయంలో ప్రజలు ఆ భయాలు పెట్టుకోవాల్సిన అవసరమే లేదని నిపుణులు స్పష్టం చేస్తున్నారు. ప్రస్తుత ఎల్పీజీ మౌలిక సదుపాయాలలో ఎలాంటి మార్పులు చేయకుండానే డిఎంఈ గ్యాస్ను సురక్షితంగా వాడుకోవచ్చు.
ప్రస్తుతం మన ఇంట్లో వాడుతున్న సిలిండర్లు, రెగ్యులేటర్లు, గ్యాస్ పైపులు, బర్నర్ స్టవ్లు దీనికి కచ్చితంగా సరిపోతాయి. ఇప్పటికే ‘బ్యూరో ఆఫ్ ఇండియన్ స్టాండర్డ్స్’ (BIS) ఈ గ్యాస్ వినియోగానికి సంబంధించిన అన్ని రకాల సాంకేతిక ప్రమాణాలను ఖరారు చేయడం విశేషం.
ఇంధన స్వయం సమృద్ధి దిశగా భారత్
ప్రస్తుతం భారత్ తన దేశీయ వంట గ్యాస్ అవసరాల కోసం అత్యధికంగా గల్ఫ్ తదితర ఇతర దేశాలపైనే ఆధారపడుతోంది. అంతర్జాతీయంగా యుద్ధాలు జరిగిన ప్రతిసారీ మన ఇంధన భద్రతకు ముప్పు వాటిల్లకుండా ఉండేందుకు ‘సీఎస్ఐఆర్-నేషనల్ కెమికల్ లాబొరేటరీ’ (CSIR-NCL) శాస్త్రవేత్తలు నడుం బిగించారు. డిఎంఈ ఉత్పత్తి కోసం ఇప్పటికే ఒక పైలట్ ప్లాంట్ను ఏర్పాటు చేసి పరిశోధనలను ముమ్మరం చేశారు. దీని ఉత్పత్తిని రాబోయే రోజుల్లో భారీ స్థాయిలో పెంచి, ప్రతి ఇంటికీ చేరవేయడమే ప్రధాన లక్ష్యంగా పెట్టుకున్నారు.
ఈ స్వదేశీ ప్రణాళిక గనక పూర్తి స్థాయిలో విజయవంతమైతే, అంతర్జాతీయ మార్కెట్లో వంట గ్యాస్ ధరలు ఎంతున్నా మనపై ఆ భారం పడదు. భారత్ ఇంధన రంగంలో స్వయం సమృద్ధి సాధించడానికి ఈ ప్రాజెక్ట్ ఒక గేమ్ ఛేంజర్ కానుందని విశ్లేషకులు భావిస్తున్నారు.
