Rajya Sabha Elections 2026: రిసార్ట్ పాలిటిక్స్.. ఒడిశా కాంగ్రెస్ ఎమ్మెల్యేలకు రూ. 5 కోట్ల ఆఫర్, బట్టబయలు చేసిన డీకేఎస్!
దేశ రాజకీయాల్లో మరోసారి రిసార్ట్ పాలిటిక్స్ తీవ్ర ప్రకంపనలు సృష్టిస్తున్నాయి. సరిగ్గా రాజ్యసభ ఎన్నికల పోలింగ్ జరుగుతున్న వేళ, ఒడిశాకు చెందిన కాంగ్రెస్ ఎమ్మెల్యేలను కొనుగోలు చేసేందుకు భారతీయ జనతా పార్టీ పక్కా స్కెచ్ వేసిందని కర్ణాటక ఉప ముఖ్యమంత్రి డి.కె. శివకుమార్ సంచలన ఆరోపణలు చేశారు. బెంగళూరు శివార్లలోని బిడది వద్ద ఉన్న ఒక రిసార్ట్లో బస చేసిన ఎమ్మెల్యేలను ప్రలోభపెట్టేందుకు వెళ్లిన ఇద్దరు వ్యక్తులను రెడ్ హ్యాండెడ్గా పట్టుకున్నామని, వారు తమ నేరాన్ని కూడా అంగీకరించారని ఆయన వెల్లడించడం దేశవ్యాప్తంగా రాజకీయ దుమారం రేపుతోంది.
ఒక్కో ఓటుకు రూ. 5 కోట్ల భారీ ఆఫర్
రాజ్యసభ ఎన్నికల్లో తమకు అనుకూలంగా క్రాస్ ఓటింగ్ చేయాలంటూ ఒక్కో కాంగ్రెస్ ఎమ్మెల్యేకు ఏకంగా రూ. 5 కోట్ల భారీ ఆఫర్ ఇచ్చారని డీకే శివకుమార్ బాంబు పేల్చారు. ఆదివారం ఉదయం నలుగురు గుర్తుతెలియని వ్యక్తులు నేరుగా రిసార్ట్లోకి ప్రవేశించి, అక్కడ క్యాంపులో ఉన్న ఎనిమిది మంది ఒడిశా ఎమ్మెల్యేలలో ఒకరిని సీక్రెట్ గా కలిశారని ఆయన తెలిపారు. ఒక్క ఓటు వేస్తే ఐదు కోట్ల రూపాయలు ఇస్తామంటూ ప్రలోభపెట్టారని, అందుకు అడ్వాన్స్ గా తమ వెంట రెండు చెక్కులను కూడా తెచ్చారని వివరించారు. అయితే, ఆ ఎమ్మెల్యేలు ఈ భారీ ఆఫర్ను తీవ్రంగా తిరస్కరించడమే కాకుండా, వారిని పట్టుకునేందుకు సాహసోపేతమైన ప్రయత్నం చేశారని డీకేఎస్ స్పష్టం చేశారు.
పట్టుబడ్డ ఏజెంట్లు.. చంపేస్తామంటూ వార్నింగ్
ఎమ్మెల్యేలు ప్రతిఘటించడంతో ఇద్దరు వ్యక్తులు అక్కడి నుంచి చాకచక్యంగా తప్పించుకోగా.. బీరేంద్ర ప్రసాద్, సీమాచల్ మొహాకుద్ అనే మరో ఇద్దరు వ్యక్తులు మాత్రం అడ్డంగా పట్టుబడ్డారు. బెంగళూరుకు చెందిన సురేష్ అనే స్థానిక వ్యక్తి సహకారంతోనే వారు ఆన్లైన్లో రిసార్ట్ రూమ్ బుక్ చేసుకున్నట్లు పోలీసుల ప్రాథమిక విచారణలో తేలింది. బేరసారాలకు ఒప్పుకోకపోవడంతో తీవ్ర ఆగ్రహానికి గురైన ఆ ఏజెంట్లు, ఎమ్మెల్యేల ముందు బూతు పురాణం విప్పడమే కాకుండా, తిరిగి ఒడిశాకు వస్తే ప్రాణాలతో వదిలిపెట్టబోమని బెదిరించినట్లు ఒడిశా కాంగ్రెస్ శాసనసభాపక్ష ఉపనేత అశోక్ కుమార్ దాస్ బిడది పోలీసులకు ఇచ్చిన అధికారిక ఫిర్యాదులో పేర్కొన్నారు. ఈ ఫిర్యాదులో బీరేంద్ర ప్రసాద్, సురేష్, అజిత్ కుమార్ సాహు, సీమాచల్ మొహాకుద్ పేర్లను చేర్చారు.
నేడే పోలింగ్.. సర్వత్రా ఉత్కంఠ
రాజ్యసభ ఎన్నికల దృష్ట్యా తమ పార్టీ ఎమ్మెల్యేలను విపక్షాలు ఎక్కడ ప్రభావితం చేస్తాయోనన్న భయంతోనే మార్చి 12వ తేదీ నుంచి వారిని బెంగళూరులోని రిసార్ట్లో అత్యంత సురక్షితంగా ఉంచుతున్నామని కాంగ్రెస్ నేత అశోక్ కుమార్ తెలిపారు. ప్రస్తుతం రామనగర జిల్లా పోలీసులు ఈ కేసును సీరియస్ గా తీసుకుని విచారిస్తున్నారు. నిందితుల నుంచి స్వాధీనం చేసుకున్న చెక్కులను ఫోరెన్సిక్ ల్యాబ్ కు పంపేందుకు సన్నాహాలు చేస్తున్నారు. ఈ నాటకీయ పరిణామాల నేపథ్యంలో, నేడు (మార్చి 16) జరుగుతున్న రాజ్యసభ ఎన్నికల పోలింగ్ మన వరంగల్ సహా దేశవ్యాప్తంగా ఉన్న రాజకీయ వర్గాల్లో తీవ్ర ఉత్కంఠను రేపుతోంది.
