వీకెండ్ వస్తే కుటుంబంతో కలిసి కాసేపు ప్రశాంతంగా గడపడానికి పార్కులు దొరకట్లేదా? కాంక్రీట్ జంగిల్లా మారిన నగరంలో స్వచ్ఛమైన గాలి పీల్చుకుందామంటే స్థలం లేదా? అయితే సామాన్య హైదరాబాదీలకు ఇదొక సూపర్ న్యూస్. కబ్జాకోరుల చేతిలో చిక్కుకున్న చెరువులను ముఖ్యమంత్రి రేవంత్ రెడ్డి సర్కార్ (HYDRAA) తిరిగి మనకే ఇస్తోంది. రేపు (మార్చి 6న) ఏకంగా రెండు అద్భుతమైన లేక్ పార్కులు ప్రజలకు అందుబాటులోకి రాబోతున్నాయి. ఉచిత వాకింగ్ ట్రాక్స్, ఓపెన్ జిమ్లతో మన పక్కింట్లోకి వస్తున్న ఈ హైటెక్ చెరువుల వల్ల నగర పౌరులకు జరిగే లాభం ఏంటో ఒకసారి చూద్దాం.
పాతబస్తీకి మణిహారం.. బమృకున్ - ఉద్- దౌలా చెరువు
నిజాం కాలం నాటి అద్భుత చరిత్ర ఉన్న పాతబస్తీలోని బమృకున్ - ఉద్- దౌలా చెరువుకు హైడ్రా ప్రాణం పోసింది. రేపు (మార్చి 6వ తేదీన) ముఖ్యమంత్రి రేవంత్ రెడ్డి చేతుల మీదుగా ఇది అట్టహాసంగా ప్రారంభం కాబోతోంది.
- ఆక్రమణలు తొలగించి, చెరువు కట్టలను పటిష్టం చేసి చుట్టూ ఔషధ గుణాలున్న మొక్కలు, నీడనిచ్చే చెట్లు నాటారు.
- వృద్ధులకు బెంచీలు, పిల్లలకు ప్లే ఏరియాలు, వాకింగ్ ట్రాక్, ఉచిత ఓపెన్ జిమ్ ఏర్పాటు చేశారు.
- పూర్తి భద్రత కోసం సీసీటీవీ కెమెరాలు పెట్టి, నేరుగా హైడ్రా (HYDRAA) హెడ్ క్వార్టర్స్ నుంచి పర్యవేక్షించేలా కనెక్ట్ చేయడం విశేషం.
కూకట్పల్లి నల్ల చెరువు.. 16 నుంచి 30 ఎకరాలకు!
నిర్మాణ వ్యర్థాలతో (Debris) కేవలం 16 ఎకరాలకు కుచించుకుపోయిన కూకట్పల్లి నల్ల చెరువును.. హైడ్రా అధికారులు పూడికతీసి తిరిగి 30 ఎకరాలకు విస్తరించారు.
- దాదాపు కిలోమీటరుకు పైగా పొడవైన పాత్ వే (Pathway) నిర్మించారు. వరద ముప్పు లేకుండా ఔట్లెట్లను అభివృద్ధి చేశారు.
- చెరువు అభివృద్ధి పనులను హైడ్రా కమిషనర్ ఏవీ రంగనాథ్ బుధవారం స్వయంగా పరిశీలించారు.
- దీన్ని ఒక మల్టీ పర్పస్ పిక్నిక్ స్పాట్లా మార్చామని, మరో రెండు మూడు రోజుల్లో ఇది ప్రజలకు అందుబాటులోకి వస్తుందని ఆయన వెల్లడించారు.
హైడ్రా ఫ్యూచర్ ప్లాన్.. రాబోయేవి మరో 14 చెరువులు
మొదటి విడతగా హైడ్రా చేపట్టిన 6 చెరువుల్లో అంబర్పేట్ బతుకమ్మ కుంట గతేడాది (2025 సెప్టెంబర్) ప్రారంభమైంది.
ప్రస్తుతం మరో మూడు చెరువుల పనులు తుది దశలో ఉండగా.. రెండో విడతలో ఏకంగా 14 చెరువులను అభివృద్ధి చేయడానికి హైడ్రా సన్నాహాలు చేస్తోంది.
ప్రభుత్వ ఆస్తులైన చెరువులను కబ్జా చేసి రియల్ ఎస్టేట్ వ్యాపారులు వేల కోట్లు సంపాదిస్తే.. వరద ముప్పు, కాలుష్యంతో సామాన్యుడు రోగాల బారిన పడుతున్నాడు. రేవంత్ రెడ్డి ప్రభుత్వం తెచ్చిన హైడ్రా (HYDRAA) వల్ల నగరంలో భూగర్భ జలాలు పెరగడంతో పాటు, సామాన్యుడికి ఉచితంగా ఫిట్నెస్ సెంటర్లు దొరుకుతున్నాయి. ఒక బాధ్యతగల పౌరుడిగా మీరు చేయాల్సింది ఏంటంటే.. ఈ చెరువుల దగ్గర ప్లాస్టిక్ చెత్త వేయకుండా శుభ్రంగా ఉంచడం. అలాగే మీరు కొత్తగా ఇల్లు లేదా ఫ్లాట్ కొనేటప్పుడు.. అది చెరువు బఫర్ జోన్ లో (హైడ్రా పరిధిలో) ఉందో లేదో ఎఫ్టీఎల్ (FTL) మ్యాప్ల ద్వారా పక్కాగా చెక్ చేసుకోవడం అత్యంత ముఖ్యం!
