Kiran Abbavaram: డైరెక్టర్ అవతారం ఎత్తనున్న కిరణ్ అబ్బవరం.. ఆ ఇద్దరు స్టార్స్తో క్రేజీ ప్రాజెక్ట్!
తనకంటూ ఒక ప్రత్యేకమైన బ్రాండ్ క్రియేట్ చేసుకున్న టాలీవుడ్ యంగ్ హీరో కిరణ్ అబ్బవరం సరికొత్త ప్రయాణానికి సిద్ధమవుతున్నారు. వరుసగా 'క', 'కె రాంప్' (K-Ramp) లాంటి సూపర్ హిట్స్తో ఫుల్ జోష్ మీదున్న ఈ యువ కథానాయకుడు.. ఇప్పుడు మెగాఫోన్ పట్టి దర్శకుడిగా మారబోతుండటం టాలీవుడ్ వర్గాల్లో ఆసక్తికరంగా మారింది.
నటుడిగానే కాకుండా.. డైరెక్టర్గా!
ప్రస్తుతం కిరణ్ అబ్బవరం, సాయి రాజేష్ దర్శకత్వంలో 'చెన్నై లవ్ స్టోరీ' అనే సినిమాలో నటిస్తూ బిజీగా ఉన్నారు. అయితే, సినిమాల్లోకి రాకముందు నుంచే కంటెంట్ పైన, కథలపైన మంచి పట్టున్న కిరణ్, చాలా కాలంగా ఒక వైవిధ్యమైన కథపై వర్క్ చేస్తున్నారట. తాజా సమాచారం ప్రకారం, కిరణ్ డైరెక్ట్ చేయబోయే ఈ సినిమా స్క్రిప్ట్ పనులు ఇప్పటికే పూర్తయ్యాయని, రాబోయే మే నెల నుంచి ఈ క్రేజీ ప్రాజెక్ట్ను సెట్స్ పైకి తీసుకెళ్లేలా ప్లాన్ చేస్తున్నారని తెలుస్తోంది.
అరవింద్ స్వామి, రాజ్ బి. శెట్టిలతో భారీ స్కెచ్
తాను స్వయంగా దర్శకత్వం వహించబోయే తొలి సినిమా కావడంతో నటీనటుల ఎంపిక విషయంలో కిరణ్ ఎక్కడా తగ్గడం లేదని సమాచారం. ఈ సినిమాలో కొన్ని కీలక పాత్రల కోసం ప్రముఖ సీనియర్ నటుడు అరవింద్ స్వామి, అలాగే కన్నడ వెర్సటైల్ యాక్టర్ రాజ్ బి. శెట్టి పేర్లను పరిశీలిస్తున్నట్లు ఇన్సైడ్ టాక్. కిరణ్ అనుకున్నట్లుగానే ఈ దిగ్గజ నటులు ప్రాజెక్ట్లో చేరితే సినిమా రేంజ్, అంచనాలు అమాంతం పెరగడం ఖాయం. కిరణ్ అబ్బవరం దర్శకుడిగా తన అదృష్టాన్ని ఎలా పరీక్షించుకుంటారో చూడాలి.
నిర్మాతగానూ బిజీ బిజీ..
హీరోగా, డైరెక్టర్గానే కాకుండా నిర్మాతగా కూడా కిరణ్ తన అభిరుచిని చాటుకుంటున్నారు. కిరణ్ అబ్బవరం నిర్మాతగా వ్యవహరించిన 'తిమ్మరాజు పల్లి టీవీ' అనే విభిన్నమైన చిత్రం ఏప్రిల్ 17న ప్రేక్షకుల ముందుకు వచ్చేందుకు సిద్ధమైంది. అటు యాక్టింగ్, ఇటు ప్రొడక్షన్, ఇప్పుడు డైరెక్షన్.. ఇలా ఇండస్ట్రీలోని అన్ని విభాగాల్లోనూ తన సత్తా చాటుతున్న కిరణ్ అబ్బవరం భవిష్యత్తులో మరెన్ని సెన్సేషన్స్ క్రియేట్ చేస్తారో అని ఫ్యాన్స్ ఎదురుచూస్తున్నారు.
