సముద్రాలకు ఆవల ఎక్కడో పశ్చిమాసియాలో రగులుతున్న యుద్ధ జ్వాలలు.. మన తెలంగాణ నేలతల్లి గర్భంలో ఉన్న నల్లబంగారం గుండెచప్పుడును నిలిపివేస్తున్నాయి. నిత్యం లక్షలాది టన్నుల మట్టిని చీల్చుకుంటూ, వేలాది కార్మికుల చెమట చుక్కలతో దద్దరిల్లే సింగరేణి బొగ్గు గనులు ఇప్పుడు అంతుచిక్కని నిశ్శబ్దంలోకి జారుకుంటున్నాయి.
ఆదిలాబాద్ అడవుల నుంచి ఖమ్మం పచ్చదనం వరకు ఉమ్మడి నాలుగు జిల్లాల్లో విస్తరించి, యావత్ దేశానికే విద్యుత్ వెలుగులు పంచుతున్న సింగరేణి సంస్థకు ఈ యుద్ధం ఒక పెనుశాపంగా మారింది. రోజులు గడుస్తున్న కొద్దీ బొగ్గు ఉత్పత్తి పాతాళానికి పడిపోతోంది, నిర్దేశించుకున్న లక్ష్యాలు ఆవిరైపోతున్నాయి. అసలు పశ్చిమాసియాలో బాంబులు పేలుతుంటే.. మన సింగరేణిలో బొగ్గు తవ్వకాలు ఎందుకు ఆగిపోతున్నాయి? ఈ అదృశ్య యుద్ధం వెనుక ఉన్న భయంకరమైన నిజాలు ఇప్పుడు కార్మికుల వెన్నులో వణుకు పుట్టిస్తున్నాయి.
ఓపెన్ కాస్ట్లపై పిడుగు.. ఆగిపోయిన నల్లబంగారు వేట
దక్షిణ భారతదేశానికి సింగరేణి ఒక పారిశ్రామిక దేవాలయం. ఉమ్మడి ఆదిలాబాద్, కరీంనగర్, వరంగల్, ఖమ్మం జిల్లాల పరిధిలోని 12 ఏరియాల్లో విస్తరించిన 18 ఓపెన్ కాస్ట్ గనులు, 19 భూగర్భ గనులు నిరంతరం శ్రమిస్తూనే ఉంటాయి. అయితే, సంస్థ నిర్దేశించుకున్న మొత్తం బొగ్గు ఉత్పత్తిలో ఏకంగా 80 శాతానికి పైగా భారాన్ని మోసేది కేవలం ఓపెన్ కాస్ట్ (ఓసీ) గనులే.
భూమి పైపొరలను చీల్చి, మట్టిని పక్కకు నెట్టి బొగ్గును వెలికితీసే ఈ ఓసీ గనుల మీదే అనేక థర్మల్ విద్యుత్ కేంద్రాల మనుగడ ఆధారపడి ఉంది. కానీ, ఇప్పుడు ఆ ఓపెన్ కాస్ట్ గనుల గొంతులో పచ్చి వెలక్కాయ పడింది. విదేశాల నుంచి రావాల్సిన కీలక ముడిసరుకు రాక ఆగిపోవడంతో, బొగ్గు తీయలేక గనులు మూగబోతున్నాయి.
సముద్రంలో నిలిచిన నౌకలు.. పేలుడు పదార్థాల కోసం కటకట
భూమి పొరల్లో బండరాళ్లలా పేరుకుపోయిన మట్టిని, బొగ్గును పగలగొట్టాలంటే కచ్చితంగా పేలుడు పదార్థాలు కావాలి. సింగరేణి వ్యాప్తంగా ప్రతి ఏటా ఏకంగా మూడు లక్షల టన్నుల పేలుడు పదార్థాలు అవసరం అవుతాయి. ఒక్క ఓపెన్ కాస్ట్ గనులకే రోజుకు 800 టన్నుల 'సైట్ మిక్స్డ్ ఎమల్షన్' (SME) కావాలి.
అయితే, ఈ భయంకరమైన పేలుడు పదార్థాలను తయారు చేయడానికి 'అమ్మోనియం నైట్రేట్' అత్యంత కీలకం. ఇది సముద్ర మార్గం గుండా ఓడల ద్వారా విదేశాల నుంచి మనకు దిగుమతి కావాలి. కానీ, పశ్చిమాసియాలో యుద్ధం మొదలైన నాటి నుంచి ఆ సముద్ర మార్గాల్లో రాకపోకలు స్థంభించిపోయాయి. దిగుమతులు సగానికి సగం పడిపోయాయి. అధికారికంగా యాజమాన్యం బయటకు చెప్పకపోయినా, పేలుడు పదార్థాల కొరతతో గనుల్లో బ్లాస్టింగ్ పనులు ఎక్కడికక్కడ ఆగిపోయి, తవ్వకాలకు బ్రేక్ పడింది.
అడుగంటిన డీజిల్.. కదలని రాకాసి యంత్రాలు
పేలుడు పదార్థాల కొరత ఒక ఎత్తైతే, సింగరేణికి పట్టిన మరో మహా దరిద్రం డీజిల్ కొరత. ఓపెన్ కాస్ట్ గనుల్లో కొండలను పిండి చేసే భారీ షావల్స్, వందల టన్నుల మట్టిని మోసే డంపర్లు, దారిని చదును చేసే డోజర్లు.. ఈ రాకాసి యంత్రాలన్నీ కదలాలంటే రోజుకు ఏకంగా పది లక్షల లీటర్ల డీజిల్ తాగాల్సిందే.
కానీ యుద్ధం దెబ్బకు అంతర్జాతీయ మార్కెట్లో ముడిచమురు సరఫరా వ్యవస్థ ఛిద్రమైంది. ఇంత భారీ స్థాయిలో డీజిల్ను తాము సరఫరా చేయలేమని చమురు సంస్థలు చేతులెత్తేయడంతో సింగరేణి అధికారుల గుండెల్లో రైళ్లు పరిగెడుతున్నాయి. డీజిల్ లేక యంత్రాలు మూలపడితే, బొగ్గు వెలికితీత పూర్తిగా పడకేస్తుందని నిపుణులు హెచ్చరిస్తున్నారు.
కార్మికుల్లో ఆందోళన.. కేంద్రం జోక్యం కోసం ఆర్తనాదాలు
గల్ఫ్ దేశాల్లో రగులుతున్న యుద్ధం.. ప్రత్యక్షంగా సింగరేణి కార్మికుల కంచెల్లో మట్టి కొడుతోంది. ఉత్పత్తి పడిపోతే సంస్థకు వేల కోట్ల నష్టం వాటిల్లుతుందని, అది చివరకు తమ ఉపాధికి, బోనస్లకు ఎసరు పెడుతుందని కార్మిక సంఘాల నేతలు ఆందోళన వ్యక్తం చేస్తున్నారు. ఈ విపత్కర పరిస్థితుల నుంచి తెలంగాణ జీవనాడి అయిన సింగరేణిని కాపాడాలంటే తక్షణమే కేంద్ర ప్రభుత్వం జోక్యం చేసుకోవాలని వారు ముక్తకంఠంతో డిమాండ్ చేస్తున్నారు.
ప్రత్యామ్నాయ మార్గాల ద్వారా అమ్మోనియం నైట్రేట్, డీజిల్ దిగుమతులను పునరుద్ధరించకపోతే.. సింగరేణి చరిత్రలోనే అత్యంత చీకటి రోజులు చూడాల్సి వస్తుందని హెచ్చరిస్తున్నారు. ఇప్పుడు అందరి చూపు ఢిల్లీ పీఠం వైపే ఉంది.
Also Read:
Trump Masterstroke: రంజాన్ వేళ ముగుస్తున్న మహాసంగ్రామం.. ఇరాన్ పతనాన్ని శాసించిన డొనాల్డ్ ట్రంప్!Middle East War: అగ్రరాజ్యానికి బ్రిటన్ గ్రీన్ సిగ్నల్.. కీర్ స్టార్మర్ కు ఇరాన్ భీకర హెచ్చరికలు!
Diego Garcia Attack: డియాగో గార్సియాపై ఇరాన్ గురి.. అగ్రరాజ్యాన్ని ఉలిక్కిపడేలా చేసిన క్షిపణి దాడి!
US Oil Waiver to Iran: సముద్రం సాక్షిగా అమెరికా మాస్టర్ స్ట్రోక్.. ఇరాన్ చమురుపై ట్రంప్ సర్కార్ సంచలన నిర్ణయం
Cuba Energy Crisis: క్యూబా గడ్డపై రగులుతున్న ప్రచ్ఛన్న యుద్ధం.. ట్రంప్ ఆంక్షలకు చెక్ పెడుతున్న రష్యా, చైనా!
Air India Flight To Nowhere: ఢిల్లీ టు ఢిల్లీ.. 8 గంటల పాటు ఆకాశంలో చక్కర్లు కొట్టిన ఎయిర్ ఇండియా విమానం!
