సముద్రాల ఆవల ఎక్కడో జరుగుతున్న యుద్ధం మనకెందుకులే అని నిర్లక్ష్యంగా ఉన్నారా? పశ్చిమాసియాలో భగ్గుమంటున్న ఈ అగ్నిపర్వతం పేలితే.. పెట్రోల్ ధరల మంట నేరుగా మన జేబులకే అంటుకుంటుంది. రవాణా ఖర్చులు పెరిగి నిత్యావసరాల ధరలు ఆకాశాన్ని తాకుతాయి. ప్రపంచాన్ని మూడో మహా సంగ్రామం అంచున నిలబెడుతున్న పశ్చిమాసియా తాజా పరిణామాలు ఇప్పుడు సామాన్యుడి గుండెల్లో రైళ్లు పరిగెత్తిస్తున్నాయి.
నరకానికి స్వాగతం.. శవపేటికల్లోనే తిరుగు ప్రయాణం!
అమెరికా అధ్యక్షుడు డొనాల్డ్ ట్రంప్ ఒకవైపు శాంతి వచనాలు వల్లిస్తున్నా.. పశ్చిమాసియాలో మాత్రం రణరంగం రక్తం మరిగిస్తోంది. తమను కవ్వించాలని చూస్తే మాడి మసవుతారంటూ అమెరికా, ఇజ్రాయెల్లకు ఇరాన్ అత్యంత కఠినమైన వార్నింగ్ ఇచ్చింది. ఇరాన్ అధికారిక పత్రిక 'టెహ్రాన్ టైమ్స్' శనివారం తన మొదటి పేజీలో ఏకంగా ‘నరకానికి స్వాగతం’ అనే సంచలన శీర్షికతో ఓ కథనాన్ని ప్రచురించింది. తమ పవిత్ర భూభాగంపై అమెరికా సైనికులు పొరపాటున అడుగుపెట్టినా సరే.. వాళ్లు తిరిగి వెళ్లేది శవపేటికల్లోనే అంటూ ఇరాన్ తీవ్రస్థాయిలో హెచ్చరించింది.
భూతల దాడులకు స్కెచ్.. 10 వేల సైన్యంతో ఎత్తుగడ!
పశ్చిమాసియాకు ఏకంగా 10 వేల మంది అదనపు అమెరికా సైనికులను పంపేందుకు పెంటగాన్ సన్నాహాలు చేస్తోందన్న నివేదికలే ఇరాన్ ఆగ్రహానికి ప్రధాన కారణం. ఇరాన్లో నేరుగా భూతల దాడులకు అమెరికా పక్కా స్కెచ్ వేస్తోందనే ఊహాగానాలకు ఈ చర్య మరింత ఆజ్యం పోసింది. వాల్స్ట్రీట్ జర్నల్ నివేదిక ప్రకారం.. ఫిబ్రవరి 28న ఇరాన్పై అమెరికా-ఇజ్రాయెల్ సంయుక్త దాడులు ప్రారంభమైనప్పటి నుంచి, అక్కడ మరిన్ని సైనిక ప్రత్యామ్నాయాలను సిద్ధం చేయడమే ఈ అదనపు దళాల ప్రధాన ఉద్దేశం. ఇప్పటికే ఆ ప్రాంతానికి చేరుకున్న వేలాది మంది కరుడుగట్టిన పారాట్రూపర్లు, మెరైన్లతో ఈ కొత్త బలగాలు చేతులు కలపనున్నాయి.
ఎర్ర సముద్రంలో హౌతీల రంగప్రవేశం!
అమెరికా గనక భూతల దాడులకు తెగబడితే.. తాము చూస్తూ ఊరుకోబోమని ఇరాన్ స్పష్టం చేసింది. యెమెన్లోని తమ బలమైన మిత్రపక్షం 'హౌతీలు' వెంటనే పూర్తిస్థాయిలో రంగంలోకి దిగుతారని ఓ ఇరాన్ ఉన్నతాధికారి హెచ్చరించారు. ఎర్ర సముద్రంలో వాణిజ్య నౌకలపై దాడులను తక్షణమే పునఃప్రారంభించాలని హౌతీలకు ఇప్పటికే స్పష్టమైన ఆదేశాలు జారీ చేశామని, దీంతో ఈ యుద్ధం ఊహించని సరికొత్త మలుపు తీసుకుంటుందని ఆయన కుండబద్దలు కొట్టారు.
ట్రంప్ పీస్ మంత్రం.. ఖర్గ్ దీవిపై కన్ను
అయితే, ఇరాన్పై భూతల దాడులు జరిపే ఉద్దేశం తమకు అస్సలు లేదని డొనాల్డ్ ట్రంప్ పదే పదే నొక్కి చెబుతున్నారు. ఇరాన్తో అత్యంత కీలకమైన శాంతి చర్చలు ఇంకా కొనసాగుతున్నాయని ఆయన స్పష్టం చేస్తున్నారు. కానీ వాస్తవ క్షేత్రస్థాయిలో అమెరికా సైనిక మోహరింపులు మరోలా ఉన్నాయి. ఈ అదనపు సైనిక బలగాలను ఎక్కడ మోహరిస్తారనేది కచ్చితంగా తెలియకపోయినా.. ఇరాన్కు అత్యంత కీలకమైన చమురు క్షేత్రం 'ఖర్గ్ దీవి' సమీపానికి ఇవి చేరుకునే అవకాశం ఉందని నివేదికలు స్పష్టం చేస్తున్నాయి. ఇదే సమయంలో ఇరాన్ విద్యుత్ కేంద్రాలు, ఇంధన మౌలిక సదుపాయాలపై దాడులను మరో పది రోజుల పాటు వాయిదా వేస్తున్నట్టు ట్రంప్ ప్రకటించడం గమనార్హం.
టెహ్రాన్ గుండెల్లో ఇజ్రాయెల్.. భగ్గుమన్న బీరుట్!
మరోవైపు ఇజ్రాయెల్ దాడులు ఏమాత్రం ఆగలేదు. ఇరాన్ రాజధాని టెహ్రాన్ నగర నడిబొడ్డున ఉన్న 'ఉగ్రవాద పాలన' మౌలిక సదుపాయాలపై భారీ ఎత్తున దాడులు జరిపినట్లు ఇజ్రాయెల్ సైన్యం శుక్రవారం తెల్లవారుజామున సగర్వంగా ప్రకటించింది. ఆ తర్వాత కొద్ది గంటలకే, హిజ్బుల్లా స్థావరాలను లక్ష్యంగా చేసుకుని లెబనాన్ రాజధాని బీరుట్ దక్షిణ శివారు ప్రాంతాలపై ఇజ్రాయెల్ తన భీకర దాడులను పునఃప్రారంభించింది. దీనికి దీటుగా స్పందించిన హిజ్బుల్లా.. దక్షిణ లెబనాన్లో తమ బలగాలు ఇజ్రాయెల్ సైనికులతో నేరుగా ముఖాముఖి ఘర్షణ పడ్డాయని అధికారికంగా ప్రకటించింది.
మనకెలాంటి ముప్పు?
ఇదొక భయంకరమైన దోబూచులాట! ఒకవైపు ట్రంప్ శాంతి వచనాలు పలుకుతూనే, మరోవైపు అమెరికా సైన్యాన్ని మోహరిస్తూ ద్వంద్వ ప్రమాణాలు పాటిస్తున్నారు. రాబోయే పది రోజులు ప్రపంచ ఆర్థిక వ్యవస్థకు అత్యంత కీలకం కాబోతున్నాయి. ఎర్ర సముద్రంలో వాణిజ్య నౌకలపై దాడులు జరిగినా, ఇరాన్ చమురు కేంద్రాలైన ఖర్గ్ దీవిపై బాంబులు పడినా.. ముడి చమురు సరఫరా ఆగిపోయి, దాని ధరలు అంతర్జాతీయ మార్కెట్లో ఆకాశాన్ని తాకుతాయి. ఈ పరిణామం నేరుగా మన దేశంలో ద్రవ్యోల్బణాన్ని పెంచి సామాన్యుడి ఆర్థిక మూలాలను దెబ్బతీస్తుంది. కాబట్టి, ప్రపంచ పరిణామాలను గమనిస్తూ ఆర్థికంగా అప్రమత్తంగా ఉండాల్సిన సమయం ఆసన్నమైంది!
