అప్పా జంక్షన్‌లో హైడ్రామా.. మాజీ మంత్రి హరీష్ రావు అరెస్ట్!

సామాన్యుడి సొంతింటి కలపై 'హైడ్రా' బుల్డోజర్లు దాడి చేస్తుంటే.. ఇప్పుడు పేద రైతన్న ప్రాణప్రదంగా సాగు చేసుకుంటున్న పచ్చని వ్యవసాయ భూములపై పారిశ్రామిక పార్కుల పేరిట ప్రభుత్వం పంజా పడుతోంది. ఎకరం పొలం అమ్ముకుని బతికే సామాన్యుడు ఇవాళ కంటిమీద కునుకు లేకుండా బతుకుతున్నాడు. అభివృద్ధి పేరుతో సాగు భూములను లాక్కుంటున్న ప్రభుత్వ తీరు.. నమ్ముకున్న నేలతల్లికి దూరమవుతున్న రైతన్నల ఆక్రందనలు నేడు యావత్ తెలంగాణ సమాజాన్ని కలవరపెడుతున్నాయి. అండగా నిలబడాల్సిన పాలకులే భూములు గుంజుకునే రియల్ ఎస్టేట్ వ్యాపారులుగా మారితే సామాన్యుడికి దిక్కెవరు? ఈ ఆందోళనల నడుమ పరిగి రైతుల కన్నీళ్లు తుడిచేందుకు వెళ్లిన గులాబీ దళపతి, మాజీ మంత్రి హరీష్ రావు అరెస్ట్ కావడం రాష్ట్ర రాజకీయాల్లో పెను సంచలనంగా మారింది.

పచ్చని పొలాల్లో పారిశ్రామిక చిచ్చు.. రగులుతున్న పరిగి

వికారాబాద్ జిల్లా పరిగి మండలంలోని కాళ్లాపూర్, రాపోల్ గ్రామాల పరిధిలో దశాబ్దాలుగా రైతులు భూమిని నమ్ముకుని బతుకుతున్నారు. అయితే రాష్ట్ర ప్రభుత్వం పారిశ్రామిక పార్కు (ఇండస్ట్రియల్ పార్క్) ఏర్పాటు కోసం ఏకంగా 1,197 ఎకరాల భూమిని సేకరించాలని తీసుకున్న నిర్ణయం రైతుల పాలిట శాపంగా మారింది. తమ ప్రాణాలైనా ఇస్తాం కానీ, తరతరాలుగా సాగు చేసుకుంటున్న భూములను ఇచ్చే ప్రసక్తే లేదని అన్నదాతలు తెగేసి చెబుతున్నారు. పారిశ్రామిక పార్కుకు వ్యతిరేకంగా స్థానిక రైతులు రిలే దీక్షలకు దిగడంతో పరిగి ప్రాంతం ఒక్కసారిగా అగ్నిగుండంలా మారింది.

అప్పా జంక్షన్ వద్ద హైడ్రామా.. హౌస్ అరెస్టులు బేఖాతర్!

రైతుల ఆక్రందనలకు మద్దతుగా బీఆర్ఎస్ పార్టీ కదిలింది. అన్నదాతలకు సంఘీభావం తెలిపేందుకు మాజీ మంత్రి హరీష్ రావు సహా పలువురు గులాబీ నేతలు పరిగి పర్యటనకు సిద్ధమయ్యారు. అయితే, ఉదయం నుంచే పోలీసులు వారిని ఎక్కడికక్కడ గృహ నిర్బంధం (హౌస్ అరెస్ట్) చేశారు. పోలీసుల నిర్బంధాలను సైతం లెక్కచేయకుండా.. హరీష్ రావు తమ బృందంతో కలిసి పరిగికి బయలుదేరారు. 

ఈ క్రమంలోనే హైదరాబాద్ శివార్లలోని అప్పా జంక్షన్ వద్ద పోలీసులు వారి వాహనాలను అడ్డుకుని హరీష్ రావును అదుపులోకి తీసుకోవడంతో పరిస్థితి తీవ్ర ఉద్రిక్తంగా మారింది. హరీష్ రావుతో పాటు మాజీ మంత్రులు సబితా ఇంద్రారెడ్డి, ఎర్రబెల్లి దయాకర్ రావు, మాజీ ఎమ్మెల్యే వెంకటేశ్వర్ రెడ్డి తదితరులను సైతం అరెస్ట్ చేయడంతో బీఆర్ఎస్ శ్రేణులు ప్రభుత్వానికి వ్యతిరేకంగా నినాదాలతో హోరెత్తించారు.

పిచ్చోడి చేతిలో రాయిలా రేవంత్ పాలన.. దమనకాండపై ఫైర్

పోలీసుల అరెస్ట్ అనంతరం ముఖ్యమంత్రి రేవంత్ రెడ్డి సర్కార్‌పై హరీష్ రావు నిప్పులు చెరిగారు. కాంగ్రెస్ ప్రభుత్వం పట్టపగలే ప్రజాస్వామ్యాన్ని దారుణంగా ఖూనీ చేస్తోందని విరుచుకుపడ్డారు. రైతుల గోడు వినేందుకు వెళ్తామని మొత్తుకుంటున్నా పోలీసులు ఏమాత్రం వినిపించుకోవడం లేదని ఆరోపించారు. 

రేవంత్ రెడ్డి పాలన అచ్చం 'పిచ్చోడి చేతిలో రాయి'లా తయారైందని ఘాటుగా విమర్శించారు. ఒకవైపు హైడ్రా పేరుతో నిరుపేదల గుడిసెలను నేలమట్టం చేస్తున్నారని, మరోవైపు మూసీ సుందరీకరణ ముసుగులో పేదల అపార్ట్‌మెంట్లను కూల్చేస్తున్నారని మండిపడ్డారు.

యూనివర్సిటీ భూములను గుంజుకోవడంతో పాటు, పండ్ల మార్కెట్ స్థలాలను బడా వ్యాపారులకు కట్టబెట్టేందుకు ప్రభుత్వం కుట్రలు పన్నుతోందని సంచలన ఆరోపణలు చేశారు. పారిశ్రామిక పార్కు పేరుతో పరిగిలో రేవంత్ సర్కార్ మరో దమనకాండకు తెరలేపిందని హరీష్ రావు ఆవేశంగా అన్నారు.

దళితుల భూములపైనే పంజా ఎందుకు?

అధికారంలోకి రాకముందు అసైన్డ్ భూములకు పట్టాలు ఇస్తామని మాయమాటలు చెప్పిన కాంగ్రెస్ ప్రభుత్వం.. ఇప్పుడు ఉన్న ఆ కాస్త భూములను కూడా అత్యంత కిరాతకంగా లాక్కుంటోందని హరీష్ రావు ధ్వజమెత్తారు. దళిత, బలహీన వర్గాల ప్రజలే లక్ష్యంగా దండయాత్ర చేస్తున్నారని ఆయన ఆవేదన వ్యక్తం చేశారు. 

రాష్ట్రంలో ఎక్కడ ఎస్సీ, ఎస్టీల భూములు కనిపిస్తే.. సరిగ్గా అక్కడే ఇండస్ట్రియల్ నోటిఫికేషన్లు ఇస్తున్నారని సంచలన వ్యాఖ్యలు చేశారు. ఎన్నికలకు ముందు ఒక మాట, అధికార పీఠం ఎక్కాక ఇంకో మాట మాట్లాడుతూ రైతులను నిలువునా మోసం చేస్తున్నారని ఆగ్రహం వ్యక్తం చేశారు. ప్రశాంతంగా పరిపాలన చేయమంటే.. ఇలా పేదోళ్ల భూములు లాక్కోవడం ఏంటని ప్రభుత్వాన్ని ఆయన సూటిగా నిలదీశారు. ప్రభుత్వం ఎన్ని అడ్డంకులు సృష్టించినా రైతుల పక్షాన పోరాటం ఆపే ప్రసక్తే లేదని స్పష్టం చేశారు.

అభివృద్ధికి పరిశ్రమలు ఎంత అవసరమో, అన్నం పెట్టే రైతు కన్నీరు పెట్టకుండా చూసుకోవడం కూడా అంతే అవసరం. బలం ఉంది కదా అని పోలీస్ లాఠీలతో రైతుల గొంతు నొక్కాలని చూస్తే అది ప్రభుత్వానికే బూమరాంగ్ అవుతుంది. పరిగి పారిశ్రామిక పార్కు వివాదం కేవలం ఒక ప్రాంతానికి పరిమితమైన సమస్య కాదు.. ఇది తెలంగాణ వ్యాప్తంగా రగులుతున్న భూ అభద్రతా భావానికి ప్రతీక. ముఖ్యమంత్రి రేవంత్ రెడ్డి తక్షణమే స్పందించి రైతులతో నేరుగా చర్చలు జరపకపోతే.. ఈ పరిగి నిప్పురవ్వ రేపు రాష్ట్రవ్యాప్తంగా రైతాంగ తిరుగుబాటుకు దారితీసినా ఆశ్చర్యపోనవసరం లేదు!

Also Read:

Indira Mahila Shakti: మహిళల చేతుల్లో పెట్రోల్ బంకులు
టీజీఎస్ఆర్టీసీకి కోర్టు షాక్.. ప్రమాద బాధితుడికి రూ.89 లక్షల పరిహారం!
Telangana New Districts: జిల్లాల రద్దుపై సీఎం క్లారిటీ
95 చలాన్లు, 36 వేల ఫైన్: ట్రాఫిక్ పోలీసులకు దొరికిపోయిన కిలాడీ!
ప్రైవేట్‌కు దీటుగా సర్కారు బడి.. అడ్మిషన్ల కోసం నల్గొండలో క్యూ లైన్లు!