ఆర్టిఫిషియల్ ఇంటెలిజెన్స్ (ఏఐ) మనిషి ఉద్యోగాన్ని మింగేస్తుందా? ఒకప్పుడు భయపడిన పీడకల ఇప్పుడు ఐటీ ఉద్యోగుల పాలిట పచ్చి నిజంగా మారుతోంది. సోషల్ మీడియా దిగ్గజం ఫేస్బుక్ మాతృసంస్థ 'మెటా'లో ఉద్యోగుల తొలగింపుల సునామీ ఆగేలా కనిపించడం లేదు. ఏఐ జపం చేస్తూ మెటా సంస్థ మరోసారి వందలాది మంది ఉద్యోగులను రోడ్డున పడేసింది. టెక్నాలజీ అప్డేట్ అయితే కొలువులు పోతాయన్న చేదు నిజాన్ని ఈ లేఆఫ్స్ కళ్లకు కడుతున్నాయి.
కాలిఫోర్నియాలో కొలువుల కోత!
కాలిఫోర్నియాలోని మెటా కార్యాలయాల్లో ఇప్పుడు ఎప్పుడు ఎవరికి పింక్ స్లిప్ వస్తుందో తెలియని భయంకరమైన పరిస్థితి నెలకొంది. ఆర్టిఫిషియల్ ఇంటెలిజెన్స్ రంగానికి పెద్దపీట వేస్తూ కంపెనీలో భారీ పునర్నిర్మాణ చర్యలకు దిగిన మెటా.. తాజాగా కాలిఫోర్నియా విభాగంలో సుమారు 200 మంది ఉద్యోగులపై నిర్దాక్షిణ్యంగా వేటు వేసింది. ఈ చేదు వార్తను కాలిఫోర్నియా ఎంప్లాయిమెంట్ డెవలప్మెంట్ డివిజన్ (ఈడీడీ)కు మెటా అధికారికంగా సమర్పించిన నివేదికల ద్వారా స్పష్టమైంది.
ఈ లేఆఫ్స్ దెబ్బతో బర్లింగేమ్, సన్నీవేల్ కార్యాలయాల్లో పనిచేస్తున్న సిబ్బంది తీవ్రంగా ప్రభావితం కానున్నారు. బర్లింగేమ్లో 124 మంది, సన్నీవేల్ బ్రాంచ్లో 74 మంది ఉద్యోగులను తొలగిస్తున్నట్లు కంపెనీ కుండబద్దలు కొట్టింది. ఈ దారుణమైన నిర్ణయం మే నెలాఖరు నుంచే కఠినంగా అమలులోకి రానున్నట్లు యాజమాన్యం స్పష్టం చేసింది. పైగా ఈ లేఆఫ్స్ అన్నీ శాశ్వత ప్రాతిపదికనే ఉంటాయని తేల్చి చెప్పేసింది.
ఏడాది ఆరంభం నుంచే కొలువుల కోత
మెటాలో ఉద్యోగుల ఉద్వాసన ఈనాటిది కాదు. ఈ ఏడాది ఆరంభం నుంచే సంస్థలో కొలువుల కోత ఒక భయానక ధారావాహికలా కొనసాగుతూనే ఉంది. ఈ ఏడాది జనవరి (2026)లో మెటావర్స్ ప్రాజెక్ట్ 'రియాలిటీ ల్యాబ్స్' విభాగంలో ఏకంగా 1,500 మందిని ఉన్నపళంగా ఇంటికి పంపేశారు.
ఆ వెంటనే మార్చి నెలలో రిక్రూట్మెంట్, సేల్స్, ఆపరేషన్స్ విభాగాలను ప్రక్షాళన చేస్తూ సుమారు 700 మందిపై వేటు వేశారు. ఆ గాయం మానకముందే, తాజాగా కాలిఫోర్నియా రీజియన్లో మరో 200 మందికి ఉద్వాసన పలకడం ఐటీ వర్గాల్లో పెను ప్రకంపనలు సృష్టిస్తోంది.
ఏఐ పెట్టుబడులే కొంప ముంచాయి!
ఈ వరుస ఉద్యోగాల కోత వెనుక ఉన్న అసలు విలన్ 'ఆర్టిఫిషియల్ ఇంటెలిజెన్స్'. ఏఐ మౌలిక సదుపాయాలైన డేటా సెంటర్లు, సర్వర్ల కోసం ఈ ఏడాది మెటా ఏకంగా 115 బిలియన్ డాలర్ల నుంచి 135 బిలియన్ డాలర్ల మధ్య భారీ మూలధన వ్యయాన్ని అంచనా వేసింది. సాధారణ పనుల కోసం ఇకపై మానవ వనరుల (మనుషుల) కంటే ఏఐ సాధనాలపైనే ఎక్కువగా ఆధారపడాలని కంపెనీ నిర్ణయించుకుంది. మనుషులు చేసే పనిని యంత్రాలు చేస్తుండటంతో పాత ఉద్యోగులకు ప్యాకప్ చెబుతున్నారు.
విచిత్రం ఏమిటంటే.. ఒకవైపు సాధారణ ఉద్యోగులను రోడ్డున పడేస్తున్న కంపెనీ, మరోవైపు హై-లెవల్ టెక్నికల్ ఏఐ ఉద్యోగాల కోసం మాత్రం కొత్త నియామకాలను శరవేగంగా చేపడుతుండటం గమనార్హం.
ఏఐ ఒక అద్భుతం అని సంబరపడే లోపే.. అది మన దైనందిన కొలువులకు ఎసరు పెడుతున్న పచ్చి నిజం మెటా లేఆఫ్స్తో బట్టబయలైంది. టెక్నాలజీ స్కిల్స్ అప్డేట్ చేసుకోకపోతే ఐటీ రంగంలో మనుగడ కష్టమనే కఠోర సత్యాన్ని ఈ పరిణామాలు హెచ్చరిస్తున్నాయి!
