Missile Strikes Near Iran Bushehr Nuclear Power Plant : పశ్చిమాసియాలో రగులుతున్న యుద్ధ జ్వాలలు ఇప్పుడు మూడో ప్రపంచ యుద్ధానికి, ఒక మహా అణు విస్ఫోటనానికి దారితీసేలా కనిపిస్తున్నాయి! ఏ క్షణంలో ఏం జరుగుతుందోనని యావత్ ప్రపంచం అరచేతిలో ప్రాణాలు పెట్టుకుని బిక్కుబిక్కుమంటూ బతుకుతున్న వేళ.. ఇరాన్ గడ్డపై జరిగిన ఒక భయంకరమైన దాడి సర్వత్రా ప్రకంపనలు సృష్టిస్తోంది. ఏకంగా ఒక అణు విద్యుత్ కేంద్రం సమీపంలోకి దూసుకొచ్చిన క్షిపణి.. ప్రపంచాన్ని ఒక్కసారిగా ఉలిక్కిపడేలా చేసింది. అగ్రరాజ్యం అమెరికా, ఇరాన్ మధ్య రాజుకున్న ఈ నెత్తుటి సమరం ఎటు దారితీస్తుందోనన్న భయం ఇప్పుడు ప్రతి ఒక్కరినీ వెంటాడుతోంది.
అణు కేంద్రంపై క్షిపణి దాడి.. తృటిలో తప్పిన పెను ముప్పు!
శనివారం (ఏప్రిల్ 4న) ఉదయం దక్షిణ ఇరాన్లోని పర్షియన్ గల్ఫ్ తీరంలో ఉన్న ప్రతిష్టాత్మక బుషెహర్ అణు విద్యుత్ కేంద్రం పరిధి సమీపంలో ఒక భారీ క్షిపణి పడి పేలింది. ఇది ఆ దేశపు మొట్టమొదటి వాణిజ్య అణు విద్యుత్ కేంద్రం. ఈ అనూహ్య దాడిలో ఒక భద్రతా సిబ్బంది ప్రాణాలు కోల్పోయినట్లు ఇరాన్ అధికారిక వార్తా సంస్థ 'తస్నీమ్' వెల్లడించింది. అదృష్టవశాత్తూ ఈ క్షిపణి దాడిలో అణు విద్యుత్ కేంద్రంలోని ప్రధాన భాగాలకు ఎలాంటి నష్టం వాటిల్లలేదు.
కేవలం ఒక సహాయక భవనం మాత్రమే దెబ్బతింది. దీంతో అణు విద్యుత్ ఉత్పత్తికి ఎలాంటి అంతరాయం కలగలేదని అధికారులు ప్రకటించి ఊపిరి పీల్చుకున్నారు. ఒకవేళ ఆ క్షిపణి అణు రియాక్టర్పై పడి ఉంటే దాని పరిణామాలు ఊహకు కూడా అందవని నిపుణులు వణికిపోతున్నారు.
రాతి యుగానికి పంపుతాం.. ట్రంప్ సింహగర్జన!
ఈ దాడి జరగడానికి సరిగ్గా రెండు రోజుల ముందు గురువారం నాడు.. అమెరికా అధ్యక్షుడు డొనాల్డ్ ట్రంప్ చేసిన హెచ్చరికలు ఇప్పుడు అక్షరసత్యాలుగా మారుతున్నాయి. ఇరాన్లోని మౌలిక వసతులు, వంతెనలు, విద్యుత్ కేంద్రాలే లక్ష్యంగా దాడులు విరుచుకుపడతాయని ఆయన స్ట్రాంగ్ వార్నింగ్ ఇచ్చారు. "మా అమెరికా సైన్యం ప్రపంచంలోనే అత్యంత శక్తిమంతమైనది. ఇరాన్లో మిగిలి ఉన్నదాన్ని నాశనం చేయడం మేము ఇంకా ప్రారంభించనే లేదు" అని ఆయన సంచలన వ్యాఖ్యలు చేశారు.
"ముందు వంతెనలు, ఆ తర్వాత విద్యుత్ కేంద్రాలను సర్వనాశనం చేస్తాం. ఇరాన్ కొత్త పాలకులకు తాము ఏం చేయాలో తెలుసు, వెంటనే అది చేయాలి" అని డొనాల్డ్ ట్రంప్ గర్జించారు. అవసరమైతే ఇరాన్పై బాంబుల వర్షం కురిపించి, ఆ దేశాన్ని రాతి యుగానికి తీసుకెళ్తామని ఆయన చేసిన భీకర హెచ్చరికల నేపథ్యంలోనే.. నేడు ఈ దాడి జరగడం సర్వత్రా ఉత్కంఠ రేపుతోంది.
ఇజ్రాయెల్, అమెరికాలపై వినాశకర దాడులు.. ఇరాన్ కౌంటర్!
ట్రంప్ చేసిన హెచ్చరికలకు, తాజాగా జరిగిన క్షిపణి దాడికి ఇరాన్ సైతం ఏమాత్రం వెనక్కి తగ్గకుండా ప్రతీకార జ్వాలలతో రగిలిపోతోంది. ఇవాళ ఉదయం ఇరాన్ సాయుధ దళాల కేంద్ర ప్రధాన కార్యాలయం.. అమెరికా, అలాగే పశ్చిమాసియాలోని మిత్ర దేశాలకు అత్యంత తీవ్రమైన వార్నింగ్ ఇచ్చింది.
'ఖాతమ్ అల్-అన్బియా' కేంద్ర కార్యాలయం అధికార ప్రతినిధి ఇబ్రాహీం జోల్ఫఘారి ఒక సంచలన ప్రకటన విడుదల చేశారు. అమెరికా, ఇజ్రాయెల్ ఆస్తులే లక్ష్యంగా అతి త్వరలో ఊహించని వినాశకర దాడులు చేస్తామని ఆయన బహిరంగంగా హెచ్చరించారు.
సొంత గడ్డపై ఉరిశిక్షలు.. ఇరాన్ ఉక్కుపాదం!
ఒకవైపు సరిహద్దుల్లో శత్రు దేశాలతో ప్రాణాపాయ యుద్ధం చేస్తున్న ఇరాన్.. మరోవైపు సొంత దేశంలోనూ తనకు వ్యతిరేకంగా పనిచేస్తున్న వారిపై ఉక్కుపాదం మోపుతోంది. తమ దేశంలో నిషేధిత ప్రతిపక్ష గ్రూపుగా ఉన్న 'పీపుల్స్ మొజాహెదిన్ ఆర్గనైజేషన్ ఆఫ్ ఇరాన్' (PMOI/MEK) సభ్యులుగా తేలిన ఇద్దరు పురుషులను ఇరాన్ ప్రభుత్వం నిర్దాక్షిణ్యంగా ఉరితీసింది. ఈ దారుణమైన విషయాలను ఇరాన్ న్యాయవ్యవస్థకు చెందిన అధికారిక వెబ్సైట్ 'మిజాన్ ఆన్లైన్' స్వయంగా వెల్లడించింది.
అంతర్జాతీయ రాబందులు ఆకాశంలో చక్కర్లు కొడుతుంటే, అణ్వాయుధాలు గురిపెట్టుకుని అగ్రరాజ్యాలు ఆడుతున్న ఈ నెత్తుటి చదరంగం మానవాళికే అతిపెద్ద ముప్పు. ఒక చిన్న నిప్పురవ్వ రగిలినా, అది యావత్ ప్రపంచాన్ని బూడిద చేసే మూడో ప్రపంచ యుద్ధంగా మారడానికి ఎంతో సమయం పట్టదు!
