మండుతున్న వేసవిలో సామాన్యుడి ప్రయాణానికి బ్రేకులు పడ్డాయి. తెలంగాణ రోడ్లపై ప్రతిరోజూ పరుగులు తీసే ఆర్టీసీ బస్సుల చక్రాలు ఎక్కడికక్కడ స్తంభించిపోయాయి. ఏ గూటికి చేరాలన్నా బస్సే ఆధారమైన సామాన్యులారా.. మంగళవారం అర్ధరాత్రి నుంచి మొదలైన ఆర్టీసీ సమ్మె వెనుక ఉన్న అసలు కారణాలు మీరు కచ్చితంగా తెలుసుకోవాలి.
ప్రభుత్వంలో విలీనం.. కార్మికుల ప్రధాన అస్త్రం!
కార్మికులు ఊరికే రోడ్డెక్కలేదు.. ఏకంగా 32 డిమాండ్లతో ఆర్టీసీ జేఏసీ ప్రభుత్వాన్ని నిలదీస్తోంది. పొరుగున ఉన్న ఆంధ్రప్రదేశ్ తరహాలోనే తెలంగాణ ఆర్టీసీని కూడా ప్రభుత్వంలో విలీనం చేసి, తమను ప్రభుత్వ ఉద్యోగులుగా గుర్తించాలన్నది వారి ప్రధాన డిమాండ్. వేతన సవరణ చేపట్టాలని, ఏళ్లుగా పెండింగ్లో ఉన్న సమస్యలను తక్షణం పరిష్కరించాలని వారు పట్టుబడుతున్నారు.
పీఎఫ్ నిధులు, కారుణ్య నియామకాల కోసం పోరాటం
కార్మికుల కష్టార్జితమైన జీతాల నుంచి కట్ చేసిన పీఎఫ్, సొసైటీ నిధులను వెంటనే తిరిగి చెల్లించాలని వారు కోరుతున్నారు. పదవీ విరమణ పొందిన వారికి బెనిఫిట్స్ సకాలంలో ఇవ్వాలని డిమాండ్ చేస్తున్నారు. సంస్థలో ఖాళీలను భర్తీ చేయడంతో పాటు, కారుణ్య నియామకాలు చేపట్టాలని, అలాగే ఏళ్ల తరబడి పనిచేస్తున్న కాంట్రాక్ట్, క్యాజువల్ కార్మికులను పర్మనెంట్ చేయాలని ముక్తకంఠంతో కోరుతున్నారు.
8 గంటల డ్యూటీ.. మహాలక్ష్మి నిధుల విడుదల
ఆర్టీసీకి ప్రాణప్రదమైన డ్రైవర్లు, కండక్టర్లపై విపరీతమైన పని ఒత్తిడి తగ్గించి, కచ్చితమైన 8 గంటల పనిదినాన్ని అమలు చేయాలని జేఏసీ డిమాండ్ చేస్తోంది. మహిళా ఉద్యోగులకు ప్రత్యేక సౌకర్యాలు, పనివేళల్లో వెసులుబాటు కల్పించాలని కోరుతోంది. 'మహాలక్ష్మి' పథకం ద్వారా మహిళలకు ఉచిత ప్రయాణం కల్పిస్తున్న ప్రభుత్వం.. ఆ నిధులను ఎప్పటికప్పుడు ఆర్టీసీకి విడుదల చేసి సంస్థను బతికించాలని కార్మికులు వేడుకుంటున్నారు.
వేధింపులకు చెక్.. పాత బస్సులకు ప్యాకప్!
కార్మికులపై చెకింగ్ అధికారుల వేధింపులు తగ్గాలని, అద్దె బస్సుల సంఖ్యను తగ్గించి సొంత బస్సులను పెంచాలని సిబ్బంది డిమాండ్ చేస్తున్నారు. కాలం చెల్లిన డొక్కు బస్సుల స్థానంలో కొత్తవి కొనాలని, ఆర్టీసీ బస్సులకు డీజిల్ సబ్సిడీ ఇవ్వాలని కోరుతున్నారు. ఏళ్లుగా నిలిచిపోయిన కార్మిక సంఘాల ఎన్నికలు నిర్వహించి, గుర్తింపు సంఘాన్ని ఎన్నుకునే హక్కు కల్పించాలంటున్నారు. విశ్రాంతి గదుల ఆధునికీకరణ, మెరుగైన వైద్య సదుపాయాలతో పాటు, గత సమ్మెలో తొలగించిన వారిపై ఉన్న కేసులను ఎత్తివేయాలని పట్టుబడుతున్నారు.
ఆలస్యమైన చర్చలు.. ఆగని సమ్మె సైరన్
సమ్మెకు వెళ్తామని జేఏసీ వారం క్రితమే హెచ్చరించినా ప్రభుత్వం తీవ్రంగా పరిగణించలేదు. మంగళవారం సాయంత్రం హడావుడిగా నలుగురు అధికారులతో ఒక కమిటీ వేసి చర్చలకు పిలిచింది. డిమాండ్ల పరిష్కారానికి నాలుగు వారాల గడువు కావాలని కమిటీ అడగగా, కార్మికులు ససేమిరా అన్నారు. ప్రభుత్వం నుంచి స్పష్టమైన హామీ రాకపోవడంతోనే బుధవారం తెల్లవారుజాము నుంచి సమ్మెకు దిగారు. అయితే, రెండు డిమాండ్లు మినహా మిగతావాటికి తాము సానుకూలమేనని ప్రభుత్వం చెబుతోంది.
తెలంగాణ చరిత్రలో సమ్మెల పర్వం
స్వరాష్ట్రం వచ్చాక ఆర్టీసీ సిబ్బంది సమ్మెకు దిగడం ఇది మూడోసారి. 2015లో వేతన సవరణ కోసం 8 రోజులు సమ్మె చేస్తే, ప్రభుత్వం 44 శాతం ఫిట్మెంట్ ఇచ్చి ముగించింది. కానీ, 2019లో ఆర్టీసీని విలీనం చేయాలంటూ 48 వేల మంది కార్మికులు ఏకంగా 52 రోజుల పాటు చారిత్రాత్మక సమ్మె చేశారు. అప్పటి ప్రభుత్వం ఉక్కుపాదం మోపడంతో, చివరకు ఎలాంటి రాతపూర్వక హామీ లేకుండానే కార్మికులు విధుల్లో చేరాల్సి వచ్చింది. అప్పట్లో ప్రభుత్వం ప్రత్యామ్నాయ డ్రైవర్లతో బస్సులు నడిపింది.
ప్రత్యామ్నాయ ఏర్పాట్లు.. జనం అవస్థలు!
ప్రస్తుతం రాష్ట్రంలో ఉన్న 3100 అద్దె బస్సులు, 500 ఎలక్ట్రిక్ బస్సులు యథావిధిగా తిరుగుతాయి. వీటికి తోడు తాత్కాలిక సిబ్బందితో మరో 2 వేల బస్సులను నడపాలని ప్రభుత్వం ప్లాన్ చేస్తోంది. ఇవన్నీ కలిపినా సగం సర్వీసులు మాత్రమే నడుస్తాయి. మహాలక్ష్మి పథకం పుణ్యమా అని రోజూ ప్రయాణించే వారి సంఖ్య 35 లక్షల నుంచి 60 లక్షలకు చేరింది. ఉన్న బస్సులే సరిపోని ఈ వేళ, సగం బస్సులతో జనం ప్రాణాలు అరచేతిలో పెట్టుకుని ప్రయాణించాల్సిందే. ఇదే అదునుగా ఆటోలు, ప్రైవేట్ క్యాబ్లు ఛార్జీలు పెంచేసి సామాన్యుడి జేబుకు చిల్లులు పెడుతున్నాయి.
సమ్మె ఎప్పుడు ముగుస్తుందనేది ఇప్పుడు మిలియన్ డాలర్ల ప్రశ్న. కానీ, ప్రస్తుత రేవంత్ రెడ్డి సర్కారు కార్మికులు, ఉద్యోగుల పట్ల సానుకూల ధోరణితో ఉంది కాబట్టి, ఈ సమ్మె త్వరగానే ఓ కొలిక్కి వచ్చే అవకాశం మెండుగా ఉంది. నాయకుల వ్యూహాలు, కార్మికుల ఆవేదనల మధ్య.. సామాన్యుడి ప్రయాణం మాత్రం ఎండమావిలా మారకూడదన్నదే ప్రతి పౌరుడి ఆకాంక్ష!
Also Read:
బర్న్అవుట్ నుంచి డ్రగ్స్ వైపు: ఐటీ రంగంలో గుండెలు పిండే నిజాలివే!రాత్రి 11 గంటల వేళ ఒంటరిగా.. హైదరాబాద్పై యువతి వైరల్ వీడియో!
ఇన్స్టాగ్రామ్ పరిచయం.. రూ.29 లక్షల చోరీ: కళ్లు చెదిరే క్రైమ్ స్టోరీ
Cable Bridge Accident: బెంజ్ కారు ఢీకొట్టి వ్యక్తి మృతి
ఆపరేషన్ ఆక్టోపస్-2.0: 32 మంది బ్యాంక్ అధికారుల అరెస్ట్!
