తమిళనాడు రాజకీయ రణరంగంలో ఊహించని సంచలనం! ఎన్నికల కురుక్షేత్రానికి సైనికులను సిద్ధం చేస్తున్న వేళ, కమలం పార్టీ అధిష్ఠానం తీసుకున్న ఒక నిర్ణయం ఇప్పుడు రాజకీయ వర్గాల్లో పెను ప్రకంపనలు సృష్టిస్తోంది. ద్రవిడ గడ్డపై పాగా వేయాలని పక్కా వ్యూహాలతో ముందుకెళ్తున్న బీజేపీ.. మిత్రపక్షం అన్నాడీఎంకేతో సీట్ల సర్దుబాటును విజయవంతంగా ముగించుకుని, శుక్రవారం నాడు ఢిల్లీ వేదికగా తమ అభ్యర్థుల జాబితాను ప్రకటించింది. అయితే, ఈ జాబితాలో ఒకే ఒక్క పేరు కనిపించకపోవడం ఇప్పుడు రాష్ట్రవ్యాప్తంగా అగ్గి రాజేస్తోంది!
అన్నామలైకి షాక్.. పలించని పీయూష్ రాయబారం!
తమిళనాడులో బీజేపీ అంటే అన్నామలై.. అన్నామలై అంటే బీజేపీ అన్నంతగా ఎదిగిన ఆ పార్టీ మాజీ రాష్ట్ర అధ్యక్షుడికి అధిష్ఠానం దిమ్మతిరిగే షాక్ ఇచ్చింది. న్యూఢిల్లీలోని పార్టీ ప్రధాన కార్యాలయం విడుదల చేసిన ఈ 27 మంది అభ్యర్థుల జాబితాలో ఎక్కడా అన్నామలై పేరు లేకపోవడం అందరినీ విస్మయానికి గురిచేస్తోంది.
తనకు కచ్చితంగా 'కోయంబత్తూరు నార్త్' స్థానం కావాలంటూ ఆయన గట్టిగా డిమాండ్ చేశారు. కానీ, అధిష్ఠానం మాత్రం అక్కడి సిట్టింగ్ ఎమ్మెల్యే, బీజేపీ మహిళా మోర్చా జాతీయ చీఫ్ వనతి శ్రీనివాసన్కే మళ్లీ అవకాశం ఇచ్చింది.
కోయంబత్తూరు సీటు కోసం అన్నామలై, వనతి శ్రీనివాసన్ మధ్య తీవ్ర స్థాయి పోరు నెలకొనడంతో.. సాక్షాత్తూ తమిళనాడు బీజేపీ వ్యవహారాల ఇంచార్జ్, కేంద్ర మంత్రి పీయూష్ గోయల్ రంగంలోకి దిగి జోక్యం చేసుకున్నారు. అయినా సరే అన్నామలై అస్సలు వెనక్కి తగ్గలేదని సమాచారం.
చివరకు అధిష్ఠానం వనతి శ్రీనివాసన్ వైపే మొగ్గు చూపడంతో.. అన్నామలైకు అసలు పోటీ చేసే అవకాశమే లేకుండా పోయింది. కనీసం 'రామనాథపురం' సీటు అయినా ఆయనకు ఇస్తారని అంతా ఆశించారు, కానీ ఆ స్థానాన్ని సైతం జీబీఎస్కే నాగేంద్రన్కు కేటాయించి పార్టీ పెద్దలు మరోసారి ట్విస్ట్ ఇచ్చారు.
ప్రముఖులకు పెద్దపీట.. బరిలో నిలిచిన స్టార్లు వీరే!
రాష్ట్రంలో తమ ఉనికిని మరింత బలోపేతం చేసుకోవాలన్న బీజేపీ ఉద్దేశం ఈ జాబితాలో స్పష్టంగా కనిపిస్తోంది. సీట్లు దక్కించుకున్న వారిలో పలువురు ఉద్దండులు, ప్రముఖులు ఉన్నారు. కేంద్ర మంత్రి ఎల్. మురుగన్ ఈసారి 'అవనాశి (ఎస్సీ)' స్థానం నుంచి బరిలోకి దిగుతున్నారు.
ఇక తెలంగాణ మాజీ గవర్నర్ తమిళిసై సౌందరరాజన్కు 'మైలాపూర్' టిక్కెట్ దక్కింది. గత ఎన్నికల్లో కూడా ఆమె సరిగ్గా ఇక్కడి నుంచే పోటీ చేసి ఓటమి పాలవడం గమనార్హం. ప్రస్తుత తమిళనాడు బీజేపీ అధ్యక్షుడు నయనార్ నాగేంద్రన్ 'సత్తూరు' నియోజకవర్గం నుంచి తన అదృష్టాన్ని పరీక్షించుకోనున్నారు.
27 స్థానాలు.. కదనరంగంలో కమలం సైన్యం!
తమిళనాడు అసెంబ్లీ ఎన్నికల్లో అన్నాడీఎంకేతో పొత్తులో భాగంగా బీజేపీకి మొత్తం 27 సీట్లు కేటాయించిన సంగతి తెలిసిందే. తాజాగా ప్రకటించిన జాబితా ప్రకారం.. ఆవడి, మైలాపూర్, థాల్లి, తిరువణ్ణామలై, రసిపురం, మోడక్కురిచ్చి, ఉదగమండలం, అవనాశి, తిరుపత్తూరు, కోయంబత్తూరు (నార్త్), తిరువరూర్, గంధర్వకోట్టయ్, పుదుక్కొట్టై, అరంథంగి, మనమదురై, మదురై సౌత్, సత్తూరు, రామనాథపురం, తిరుచందూర్, వాసుదేవనల్లూరు, తిరుపూర్ (సౌత్) తదితర స్థానాల్లో కమలం పార్టీ అభ్యర్థులు తమ సత్తా చాటడానికి కదనరంగంలోకి దూకుతున్నారు.
ఏప్రిల్ 23న కురుక్షేత్రం.. మే 4న మహారాజయోగం ఎవరికో!
మొత్తం 234 అసెంబ్లీ స్థానాలున్న తమిళనాడులో ఎన్నికల ఫీవర్ పీక్స్కు చేరింది. ఈనెల (ఏప్రిల్) 23వ తేదీన ఒకే విడతలో రాష్ట్రవ్యాప్తంగా పోలింగ్ జరగనుంది. ద్రవిడ గడ్డతో పాటే బెంగాల్, కేరళ, అసోం రాష్ట్రాలకు కూడా ఎన్నికలు జరుగుతుండగా.. వాటన్నింటితో కలిపి మే 4వ తేదీన ఓట్లను లెక్కించి తుది ఫలితాలను అధికారికంగా వెల్లడించనున్నారు.
అన్నామలై లాంటి ఫైర్ బ్రాండ్ లీడర్ను పక్కనపెట్టి, ఉద్దండులను నమ్ముకుని బరిలోకి దిగిన కమలం పార్టీ వ్యూహం ద్రవిడ గడ్డపై ఏ మేరకు వర్కవుట్ అవుతుందో తేలాలంటే.. మే 4 వరకు ఆ ఉత్కంఠ భరించాల్సిందే!
Also Read:
మౌనంగా ఉన్నా.. ఓడిపోలేదు: ఆప్పై రాఘవ్ చద్ధా తిరుగుబాటు!జగ్గీ హత్య కేసు: 23 ఏళ్ల తర్వాత మాజీ సీఎం కొడుకు దోషి!
హార్మూజ్ సంక్షోభం: 60 దేశాల భేటీలో భారత్ సింహనాదం!
'ఆపరేషన్ సింధూర్' ముగియలేదు: పాకిస్థాన్కు రాజ్నాథ్ వార్నింగ్
నాడు ఎగతాళి.. నేడు రూ.167 కోట్లు: రవివర్మ కుంచెకు దక్కిన గౌరవం!
