ఒకవైపు అగ్రరాజ్యం అమెరికా అధ్యక్షుడు డొనాల్డ్ ట్రంప్ విధించిన 48 గంటల డెడ్లైన్ అత్యంత వేగంగా ముగుస్తోంది. మరోవైపు తమ దేశాన్ని కాపాడుకునేందుకు ఇరాన్ కనీవినీ ఎరుగని సంచలన నిర్ణయం తీసుకుంది. అగ్రరాజ్యం కురిపించే బాంబుల వర్షాన్ని ఆపేందుకు లక్షలాది మంది యువతను ప్రాణ కవచంగా నిలబెడుతోంది. దద్దరిల్లుతున్న పశ్చిమాసియా పరిస్థితులు ఏ క్షణమైనా పెను విధ్వంసానికి దారితీసేలా కనిపిస్తున్నాయి.
బాంబులకు అడ్డుగా ప్రాణ కవచం.. ఇరాన్ సంచలన వ్యూహం!
పశ్చిమాసియాలో మునుపెన్నడూ లేని విధంగా యుద్ధం తీవ్ర స్థాయికి చేరుకుంటోంది. అమెరికా అధ్యక్షుడు డొనాల్డ్ ట్రంప్ విధించిన 48 గంటల డెడ్లైన్ ముగుస్తున్న ఉత్కంఠభరిత తరుణంలో.. టెహ్రాన్ నాయకత్వం ఒక అత్యంత సాహసోపేతమైన, వివాదాస్పదమైన నిర్ణయం తీసుకుంది.
తమ దేశానికి గుండెకాయ లాంటి ఆర్థిక మూలాధారాలైన చమురు, గ్యాస్, అలాగే అణుశక్తి కేంద్రాలపై అమెరికా దాడులు చేయకుండా అడ్డుకునేందుకు ఒక సరికొత్త వ్యూహాన్ని అమలు చేస్తోంది. ఈ కీలక మౌలిక సదుపాయాల చుట్టూ దాడులను అడ్డుకోవడానికి, లక్షలాది మంది యువతతో బృహత్తరమైన మానవ హారాలు (హ్యూమన్ చైన్) ఏర్పాటు చేయాలని ఇరాన్ నిర్ణయించింది.
'ఉజ్వల భవిష్యత్తు కోసం మానవ హారం'.. వీధుల్లోకి లక్షలాది యువత!
ఈ సంచలన వ్యూహం కోసం ఇరాన్ క్రీడలు, యువజన వ్యవహారాల మంత్రిత్వ శాఖ అధికారికంగా పిలుపునిచ్చింది. ఈ పిలుపు మేరకు మంగళవారం మధ్యాహ్నం 2 గంటల నుంచి (స్థానిక కాలమానం ప్రకారం) దేశవ్యాప్తంగా అథ్లెట్లు, ప్రముఖ కళాకారులు, లక్షలాది మంది విద్యార్థులు భారీ ఎత్తున రోడ్లపైకి రానున్నారు. ప్రధానంగా దేశంలోని కీలక మౌలిక సదుపాయాల చుట్టూ ప్రాణాలకు తెగించి చేతులు కలిపి నిలబడనున్నారు.
"ప్రజా మౌలిక సదుపాయాలపై దాడి చేయడం కచ్చితంగా యుద్ధ నేరం అని ప్రపంచానికి చాటి చెప్పేందుకే ఈ సంచలన నిర్ణయం తీసుకున్నాం. మా యువతే స్వయంగా ఈ అద్భుతమైన ఆలోచనను ముందుకు తెచ్చారు" అని ఇరాన్ యువజన వ్యవహారాల డిప్యూటీ అలీరెజా రహీమి సోషల్ మీడియా వేదికగా ప్రకటించారు. దేశవ్యాప్తంగా జరగనున్న ఈ మహా ప్రదర్శనకు.. 'ఉజ్వల భవిష్యత్తు కోసం ఇరాన్ యువత మానవ హారం' (హ్యూమల్ చైన్ ఆఫ్ ఇరాన్ యూత్ ఫర్ ఎ బ్రైట్ ఫ్యూచర్) అని ఒక భావోద్వేగభరితమైన పేరు పెట్టారు.
మ్యాప్ నుంచి తుడిచేస్తాం.. ట్రంప్ భీకర వార్నింగ్!
ఇరాన్ వ్యూహాలు ఇలా ఉంటే, వైట్హౌస్ నుంచి డొనాల్డ్ ట్రంప్ అత్యంత తీవ్రమైన హెచ్చరికలు జారీ చేశారు. మంగళవారం రాత్రి 8 గంటల లోపు (అమెరికా కాలమానం ప్రకారం) హార్మూజ్ జలసంధిని బేషరతుగా తెరవకపోతే.. ఇరాన్ ఒక్క రాత్రిలో తుడిచి పెట్టుకుపోతుందని ఆయన వార్నింగ్ ఇచ్చారు.
"ఒక దేశాన్ని ఒక్క రాత్రిలో మ్యాప్ నుంచి పూర్తిగా తొలగించగల శక్తి మాకుంది. ఆ రాత్రి రేపే కావచ్చు" అని ట్రంప్ చేసిన సంచలన వ్యాఖ్యలు ప్రపంచ దేశాలను వణికిస్తున్నాయి. ముఖ్యంగా ఇరాన్ మౌలిక సదుపాయాలపై దాడులు చేస్తే అది యుద్ధ నేరం కిందకు వస్తుందన్న వాదనలను సైతం ట్రంప్ నిర్ద్వంద్వంగా కొట్టిపారేశారు. తన దేశ ప్రయోజనాల కోసం ఎలాంటి కఠిన చర్యలకైనా తాను ఏమాత్రం వెనుకాడబోనని ఆయన కుండబద్దలు కొట్టారు.
కాల్పుల విరమణకు నో.. శాశ్వత పరిష్కారమే కావాలన్న ఇరాన్!
అగ్రరాజ్యాల మధ్య ఉద్రిక్తతలను తగ్గించేందుకు మధ్యవర్తులుగా వ్యవహరిస్తున్న పాకిస్థాన్, ఈజిప్ట్ దేశాలు ఒక ప్రతిపాదన తెచ్చాయి. 45 రోజుల పాటు కాల్పుల విరమణ ఒప్పందం పాటించాలని కోరగా.. ఇరాన్ ఆ ప్రతిపాదనను తాజాగా నిర్మొహమాటంగా తిరస్కరించింది.
తమకు కేవలం కొద్దిరోజుల తాత్కాలిక శాంతి ఏమాత్రం అవసరం లేదని, ఈ యుద్ధానికి ఒక శాశ్వత ముగింపు పలకాల్సిందేనని ఇరాన్ గట్టిగా పట్టుబడుతోంది. భవిష్యత్తులో అమెరికా నుంచి తమ దేశంపై మళ్లీ దాడులు జరగవని రాతపూర్వక గ్యారెంటీ ఇస్తేనే తాము వెనక్కి తగ్గుతామని ఇరాన్ దౌత్యవేత్త మొజ్తబా ఫెర్దౌసీ పూర్ స్పష్టం చేశారు.
అణ్వాయుధాలు, అత్యాధునిక మిస్సైళ్లు రాజ్యమేలుతున్న ఈ కాలంలో 'మానవ హారం'తో బాంబులను ఆపాలనుకోవడం ఇరాన్ ఎంచుకున్న ఒక ఎమోషనల్ అస్త్రం. కానీ, డొనాల్డ్ ట్రంప్ లాంటి దూకుడున్న నాయకుడు ఈ సెంటిమెంట్లకి కరిగిపోతాడనుకోవడం పొరపాటే అవుతుంది. ఒకవేళ ఏ చిన్న మిస్ ఫైర్ జరిగి ఆ మానవ హారంపై బాంబులు పడినా.. అది చరిత్రలో కనీవినీ ఎరుగని మానవ మారణహోమానికి దారితీస్తుంది. ప్రపంచ పటం మీద నెత్తుటేరులు పారకముందే, ఐక్యరాజ్యసమితి జోక్యం చేసుకుని ఈ విధ్వంసాన్ని ఆపడం అత్యవసరం!
Also Read:
Medical Fraud: రోగులతో చెలగాటం.. రూ.130 కోట్ల జరిమానాఒక్క రాత్రిలో ఇరాన్ ఖతం: ట్రంప్ సంచలన వార్నింగ్!
రాలిపోతున్న ఇరాన్ అగ్ర నేతలు: ఇజ్రాయెల్ దాడుల్లో ఇంటెలిజెన్స్ చీఫ్ బలి
US Iran Conflict: జలసంధి ఆదాయంలో వాటా ఇస్తేనే.. హోర్ముజ్పై ఇరాన్ కొత్త షరతు!
US Iran Conflict: మంగళవారం దాడులు తప్పవు: ఇరాన్కు ట్రంప్ ఫైనల్ వార్నింగ్
