యుద్ధంలో శత్రువును ఓడించడం ఒక ఎత్తు అయితే.. గెలిచిన తర్వాత ఆ సింహాసనంపై కూర్చోవడం మరో ఎత్తు అని కేరళ రాజకీయాలు రుజువు చేస్తున్నాయి! ప్రజలు స్పష్టమైన తీర్పునిచ్చినా, పాలకుడెవరో తేల్చుకోలేక ఒక రాష్ట్రం వారం రోజులుగా నాథుడి కోసం ఎదురుచూస్తోంది. ఒకే ఒక్క కుర్చీ.. రేసులో ముగ్గురు ఉద్ధండులు.. వీధుల్లోకి వచ్చిన కార్యకర్తలు! కేరళ ముఖ్యమంత్రి పీఠం కోసం కాంగ్రెస్ పార్టీలో జరుగుతున్న ఈ పొలిటికల్ థ్రిల్లర్ ఏ క్షణంలో ఎలాంటి మలుపు తిరుగుతుందో తెలియని ఉత్కంఠను రేపుతోంది.
ఐదు రాష్ట్రాల తీర్పు.. ముగిసిన దళపతి సస్పెన్స్!
మే 4వ తేదీన ఐదు రాష్ట్రాల అసెంబ్లీ ఎన్నికల ఫలితాలు దేశ రాజకీయాల్లో పెను సంచలనం సృష్టించాయి. తమిళనాడు, కేరళ, పుదుచ్చేరి, పశ్చిమ బెంగాల్, అసోం రాష్ట్రాల ఓటర్లు తమ తీర్పును బ్యాలెట్ బాక్సుల్లో స్పష్టంగా వినిపించారు. ఒక్క తమిళనాడులో మినహా మిగిలిన అన్ని రాష్ట్రాల్లోనూ ఫలితాలు ఏకపక్షంగానే వచ్చాయి. తమిళనాట తలెత్తిన హంగ్ అసెంబ్లీ సస్పెన్స్ సైతం ఐదు రోజుల సుదీర్ఘ తర్జనభర్జనల తర్వాత ముగిసింది. దళపతి విజయ్ నేతృత్వంలోని టీవీకే (TVK) పార్టీ ఎట్టకేలకు అధికార పీఠాన్ని దక్కించుకుని ప్రభుత్వ ఏర్పాటును పూర్తి చేసింది. కానీ, పక్కనే ఉన్న కేరళలో మాత్రం సీన్ పూర్తిగా రివర్స్ అయింది.
కేరళలో కాంగ్రెస్ క్లీన్స్వీప్.. కానీ కుర్చీ ఎవరికి?
కేరళ ఓటర్లు ఈసారి కాంగ్రెస్ నేతృత్వంలోని కూటమికి స్పష్టమైన మెజార్టీ కట్టబెట్టారు. అంతా సవ్యంగా జరిగితే ఈపాటికే అక్కడ కొత్త ప్రభుత్వం కొలువుదీరాలి. కానీ, వారం రోజులు గడుస్తున్నా ఇప్పటివరకు ముఖ్యమంత్రి అభ్యర్థి ఎవరన్నది ఫైనల్ కాలేదు. సీఎం కుర్చీ కోసం ముగ్గురు అగ్రనేతల మధ్య జరుగుతున్న 'నువ్వా నేనా' అన్న భీకర పోరు కాంగ్రెస్ హైకమాండ్కు కంటిమీద కునుకు లేకుండా చేస్తోంది. ఈ సంక్షోభం ఇప్పట్లో ముగిసేలా కనిపించడం లేదు.
ముగ్గురు ఉద్ధండులు.. తెరపైకి వచ్చిన కీలక పేర్లు
కేరళ ముఖ్యమంత్రి రేసులో ప్రధానంగా మూడు పేర్లు బలంగా వినిపిస్తున్నాయి. కాంగ్రెస్ ప్రధాన కార్యదర్శి, రాహుల్ గాంధీకి అత్యంత సన్నిహితుడైన కేసీ వేణుగోపాల్తో పాటు.. వీడీ సతీశన్, రమేష్ చెన్నితాల పేర్లు తెరపైకి వచ్చాయి. నిజానికి గత 2021 అసెంబ్లీ ఎన్నికల సమయంలోనే వేణుగోపాల్ను సీఎంను చేయాలనే అంతర్గత చర్చలు బలంగా జరిగాయి. కానీ కేరళలో ప్రతి ఐదేళ్లకు ప్రభుత్వాలు మారే సంప్రదాయానికి బ్రేక్ వేస్తూ.. ఆ ఎన్నికల్లో లెఫ్ట్ ఫ్రంట్ తిరిగి అధికారంలోకి రావడంతో ఆయన కల నెరవేరలేదు. ప్రస్తుత ఎన్నికల్లో వేణుగోపాల్ పోటీ చేయనప్పటికీ.. ఆయనకున్న అపారమైన రాజకీయ పలుకుబడి దృష్ట్యా, తాజా ఫలితాల తర్వాత ఆయనను సీఎం పదవికి సహజ పోటీదారుగా కాంగ్రెస్ వర్గాలు పరిగణిస్తున్నాయి.
పరిశీలకుల ఎంట్రీ.. వేణుగోపాల్ వైపే మెజార్టీ మొగ్గు!
సీఎం ఎంపికపై కొత్తగా ఎన్నికైన ఎమ్మెల్యేల నాడి పసిగట్టేందుకు కాంగ్రెస్ అధిష్ఠానం అజయ్ మాకెన్, ముకుల్ వాస్నిక్లను పరిశీలకులుగా నియమించింది. గురువారం నాడు వీరు తిరువనంతపురం చేరుకుని అభిప్రాయ సేకరణ జరపగా ఊహించని ఫలితాలు వచ్చాయి. గెలిచిన 63 మంది కాంగ్రెస్ ఎమ్మెల్యేల్లో అత్యధికులు కేసీ వేణుగోపాల్ పేరునే ముక్తకంఠంతో సూచించారు. కేవలం ఎమ్మెల్యేలే కాకుండా, కేరళకు చెందిన కాంగ్రెస్ ఎంపీలు, సీనియర్ నాయకులు సైతం రాష్ట్ర పగ్గాలు వేణుగోపాల్కే అప్పగించాలని అధిష్ఠానానికి నివేదించారు.
మిత్రపక్షం ట్విస్ట్.. రేసులోకి దూసుకొచ్చిన సతీశన్!
సరిగ్గా వేణుగోపాల్కు లైన్ క్లియర్ అయిందనుకున్న తరుణంలో సీన్ లోకి వీడీ సతీశన్ ఎంట్రీ ఇచ్చారు. ఇటీవలి కాలంలో అత్యంత ప్రజాదరణ పొందిన ప్రతిపక్ష నాయకుడిగా ఎదిగిన సతీశన్కు సీఎం బాధ్యతలు అప్పగించాల్సిందేనని కాంగ్రెస్ మిత్రపక్షమైన ఐయూఎంఎల్ (IUML) గట్టిగా డిమాండ్ చేసింది. మిత్రపక్షం అండ చూసుకుని సతీశన్ కూడా ఎలాగైనా కుర్చీ దక్కించుకోవాలని పట్టుదలతో పావులు కదుపుతున్నారు. మరోవైపు సీనియర్ నేత రమేష్ చెన్నితాల సైతం తన సీనియారిటీని ప్రాతిపదికగా తీసుకుని ముఖ్యమంత్రి పదవి తనకే ఇవ్వాలని డిమాండ్ చేయడంతో ఈ పోటీ ముక్కోణపు సమరంగా మారింది.
రోడ్డెక్కిన సతీశన్ వర్గం.. ఢిల్లీ పీఠానికి హై టెన్షన్!
ఎమ్మెల్యేల మద్దతుతో ఫలితాలు వేణుగోపాల్కు అనుకూలంగా ఉన్నాయన్న వార్త లీక్ కావడంతో కేరళ రాజకీయాలు ఒక్కసారిగా వేడెక్కాయి. కేసీ వేణుగోపాల్కు వ్యతిరేకంగా, సతీశన్ మద్దతుదారులు సోషల్ మీడియా నుంచి మొదలుపెట్టి క్షేత్రస్థాయి వరకు తీవ్ర స్థాయి ప్రచారాన్ని ప్రారంభించారు. కేరళ వ్యాప్తంగా నిరసన జ్వాలలు రగిలించారు. ఈ అనూహ్య పరిణామాలతో కాంగ్రెస్ హైకమాండ్ తీవ్ర సందిగ్ధంలో పడిపోయింది. ఎవరిని ప్రకటిస్తే ఏ వర్గం రోడ్డున పడుతుందోనని భయపడుతూ, ఘర్షణలు తలెత్తకుండా బుజ్జగింపుల పర్వానికి తెరతీసింది.
ఓట్లు అడిగేటప్పుడు ఉన్న ఐకమత్యం, అధికార పీఠం దక్కగానే ఎందుకు ఆవిరైపోతుందో చెప్పడానికి కేరళ కాంగ్రెస్ తాజా సంక్షోభమే నిదర్శనం. ప్రజలు మార్పు కోరుకుని ఓటేస్తే.. నాయకులు మాత్రం పదవుల కోసం వీధిన పడటం సామాన్యుడి తీర్పును అవమానించడమే. అధిష్ఠానం ఈ వర్గపోరును సాధ్యమైనంత త్వరగా మొగ్గలోనే తుంచేయకపోతే.. ఐదేళ్ల పాటు ఈ నాయకులు ప్రజల కోసం కాకుండా, ఒకరినొకరు కాపాడుకోవడానికే సమయం వృధా చేయడం ఖాయం. ముఖ్యమంత్రి అభ్యర్థి ఎవరన్న సస్పెన్స్కు ఢిల్లీ పెద్దలు వీలైనంత త్వరగా తెరదించకపోతే, ప్రజల్లో గెలిచిన కాంగ్రెస్.. పార్టీ అంతర్గత యుద్ధంలో ఓడిపోవడం ఖాయం!
Also Read:
ఏడాది పాటు బంగారం కొనకపోతే ఏం జరుగుతుంది? మోదీ పిలుపు వెనుక అసలు రహస్యం!తొలిరోజే అగ్నిపరీక్ష: 'ఖజానా ఖాళీ' అన్న సీఎం విజయ్.. స్టాలిన్ దిమ్మతిరిగే కౌంటర్
నేను మీలో ఒకడ్ని.. భావోద్వేగంతో తమిళనాడు ముఖ్యమంత్రి విజయ్ ప్రసంగం
Thalapathy Vijay CM: తమిళనాడు సీఎంగా విజయ్ ప్రమాణ స్వీకారం
అభిమానులతో కిక్కిరిసిన చెన్నై.. దారిపొడవునా విజయ్ ఎల్ఈడీ స్క్రీన్లు
