ఒక దశాబ్దం కాదు.. రెండు దశాబ్దాలు కాదు.. ఏకంగా 60 ఏళ్ల పాటు కేవలం రెండు పార్టీల చేతుల్లోనే బందీ అయిన ఒక రాష్ట్రం విముక్తి పొందితే ఎలా ఉంటుంది? మార్పు కోసం దాహంతో ఉన్న సగటు సామాన్యుడికి పవర్ఫుల్ ప్రత్యామ్నాయం దొరికితే.. ఓటు అనే ఆయుధం ఎంతలా గర్జిస్తుందో తమిళనాడు అసెంబ్లీ ఎన్నికల ఫలితాలు నిరూపిస్తున్నాయి. సామాన్యుడి జాతకాన్ని మార్చేసే ఈ చారిత్రక ఎన్నికల్లో ఇప్పుడు ఓ సరికొత్త 'జననాయగన్' ఉదయించాడు!
తలకిందులైన లెక్కలు.. దళపతి సునామీ!
స్టాలిన్ నాయకత్వంలోని డీఎంకే కూటమిదే మళ్లీ అధికారమని మెజార్టీ ఎగ్జిట్ పోల్స్ అంచనా వేసినా.. ఓట్ల లెక్కింపు ట్రెండ్స్ మాత్రం దేశ రాజకీయాలను ఉలిక్కిపడేలా చేస్తున్నాయి. దళపతి విజయ్ స్థాపించిన 'టీవీకే' (TVK) పార్టీ అత్యధిక స్థానాలు కైవసం చేసుకుని సింగిల్ లార్జెస్ట్ పార్టీగా అవతరించే దిశగా దూసుకుపోతోంది.
తాజా ట్రెండ్స్ ప్రకారం విజయ్ పార్టీ ఏకంగా 102 స్థానాల్లో ఆధిక్యంలో ఉండగా.. ప్రతిపక్ష అన్నాడీఎంకే 78 స్థానాల్లో, అధికార డీఎంకే కేవలం 54 స్థానాలకే పరిమితమై దారుణంగా కుదేలైంది.
60 ఏళ్ల నిరీక్షణ.. మార్పుకు నాంది
తమిళనాట టీవీకే ఇంతటి ప్రభంజనం సృష్టించడానికి ఏకైక కారణం.. జనం గుండెల్లో రగులుతున్న మార్పు ఆకాంక్షే! దశాబ్దాలుగా రాష్ట్రాన్ని పాలిస్తున్న అన్నాడీఎంకే, డీఎంకే పార్టీలను చూసి విసిగిపోయిన ఓటర్లు.. ఒక కొత్త నాయకుడి కోసం ఎదురుచూశారు. సరిగ్గా అదే సమయంలో పట్టణ ఓటర్లకు విజయ్ రూపంలో ఒక బలమైన, నిజాయితీ గల ప్రత్యామ్నాయం కనిపించింది.
విజిల్ వేసిన యువత.. కురిసిన మహిళల ఓట్లు
విజయ్కు ఉన్న మాస్ ఫ్యాన్ ఫాలోయింగ్ ఈ ఎన్నికల్లో ఒక ఉప్పెనలా మారింది. ఆయన నమ్మకాన్ని యువత ఏమాత్రం వమ్ము చేయలేదు. మొదటిసారి ఓటు వేస్తున్న యువత, 30 ఏళ్లలోపు ఉన్న ఓటర్లంతా మూకుమ్మడిగా టీవీకే వైపు నిలబడ్డారు. దీని ఫలితమే రికార్డు స్థాయి పోలింగ్!
దీనికి తోడు మహిళలు సైతం విజయ్కు బ్రహ్మరథం పట్టారు. తాము అధికారంలోకి వస్తే మహిళలకు నెలకు రూ. 2500 ఆర్థిక సాయం, పెళ్లి కానుకగా 8 గ్రాముల బంగారం ఇస్తామన్న హామీ.. పేద, మధ్యతరగతి వర్గాలను విపరీతంగా ఆకర్షించింది. టీవీకే మేనిఫెస్టో సామాన్యుడి గుండె చప్పుడుగా మారింది.
తటస్థుల మెప్పు.. వ్యూహాత్మక అభ్యర్థులు
ద్రవిడ భావజాలాన్ని గుండెల్లో పెట్టుకుంటూనే, అవినీతి రహిత, పారదర్శక పాలన అందిస్తానని విజయ్ చేసిన ప్రకటన తటస్థ ఓటర్లను కట్టిపడేసింది. అన్ని మతాలను సమానంగా గౌరవిస్తామన్న ఆయన విధానం, 'విజిల్' (Whistle) సింబల్ ప్రజల్లోకి బలంగా దూసుకెళ్లాయి.
మరోవైపు, అభ్యర్థుల ఎంపికలోనూ విజయ్ మాస్టర్ మైండ్ వాడాడు. తన సొంత డ్రైవర్ కొడుకు లాంటి సామాన్యులకు టికెట్లు ఇస్తూనే.. చెన్నై, తిరుచ్చి లాంటి నగరాల్లో అత్యంత విద్యావంతులను, క్షేత్రస్థాయిలో పట్టున్న బలమైన నాయకులను వ్యూహాత్మకంగా రంగంలోకి దించాడు.
డీఎంకేకు గండి.. దళపతి ఒంటరి పోరు!
దశాబ్దాలుగా డీఎంకేకు కంచుకోటగా ఉన్న దళిత, క్రిస్టియన్ ఓటు బ్యాంకుకు ఈసారి భారీ గండి పడింది. క్రైస్తవ మతాన్ని అనుసరించే విజయ్కు క్రిస్టియన్లంతా మూకుమ్మడిగా అండగా నిలవడంతో సమీకరణాలు పూర్తిగా మారిపోయాయి.
ఎన్నికల ముందు విజయ్ను ఎన్డీయే (NDA) కూటమిలోకి లాగేందుకు తెరవెనుక ఎన్నో కుట్రలు జరిగాయి. ఆయన నటించిన 'జన నాయగన్' సినిమాకు సెన్సార్ బోర్డు అడ్డంకులు సృష్టించింది. ఆయన విడాకుల అంశాన్ని హైలైట్ చేసి రచ్చ చేయాలని చూశారు. కరూర్ తొక్కిసలాటను ఆయనకు ఆపాదించి ప్రతికూలంగా మార్చాలని కుట్రలు పన్నారు. అయినా సరే, ఎవరికీ తలొగ్గకుండా దళపతి చేసిన ఒంటరి పోరాటం తమిళ ప్రజల గుండెలను గెలుచుకుంది.
సర్వేని నిజం చేసిన జనం
'యాక్సిస్ మై ఇండియా' (Axis My India) సర్వే టీవీకేకు 98 నుంచి 120 స్థానాలు వస్తాయని ముందుగానే అంచనా వేసింది. కానీ, డీఎంకేదే మళ్లీ అధికారమని గుడ్డిగా నమ్మిన విశ్లేషకులు ఆ సర్వేను కొట్టిపారేశారు. తీరా ఇప్పుడు ఈవీఎంలు తెరుచుకునే సరికి ఆ అంచనాలే అక్షరసత్యాలుగా మారుతూ అద్భుతాన్ని ఆవిష్కరిస్తున్నాయి.
ఎన్నికల కురుక్షేత్రంలో కుట్రలు, డబ్బు, అధికారం కాదు.. "ఒక సామాన్యుడి నిజాయితీ గెలుస్తుంది" అనడానికి విజయ్ సునామీనే పచ్చి నిదర్శనం! ఢిల్లీలో కేజ్రీవాల్ ఆప్ ఎలాగైతే పాత రాజకీయాలను పాతరేసిందో, ఇప్పుడు తమిళనాట టీవీకే కూడా ద్రావిడ కోటల పునాదులను పెకిలించేసింది. రాజకీయాల్లోకి సినీ నటులు వస్తే నిలబడలేరు అన్న అపోహను చెరిపేస్తూ.. సిస్టమ్ను మార్చే నిజమైన 'జననాయగన్'గా దళపతి విజయ్ చరిత్ర సృష్టించాడు!
Also Read:
Tamil Nadu Elections 2026 : దళపతి విజయ్ టీవీకే భవితవ్యంAssembly Election Results 2026: 5 రాష్ట్రాల ఎన్నికల కౌంటింగ్.. గెలుపెవరిది?
Bengal Election Results: దీదీ మాస్టర్ వ్యూహం
ఢిల్లీలో హైడ్రామా: అరెస్ట్ భయంతో కారులో ఎస్కేప్ అయిన సందీప్ పాఠక్!
ముంబై మిస్టరీ: పుచ్చకాయ కాదు.. ప్రాణాలు తీసింది ఆ విషమేనా?
