'దిస్ హెవెన్లీ ప్లేస్'తో హ్రేహాన్ మ్యూజికల్ ఎంట్రీ
హ్రేహాన్ రోషన్ తన తొలి సింగిల్ ‘దిస్ హెవెన్లీ ప్లేస్’ (This Heavenly Place) తో మ్యూజిక్ ఇండస్ట్రీకి పరిచయం అయ్యాడు. ఇక్కడ విశేషం ఏంటంటే, ఈ పాటకు గాయకుడిగా, పాటల రచయితగా, గిటారిస్ట్గా ఆయనే స్వయంగా వ్యవహరించాడు. ఇది కేవలం ఒక పాటగా కాకుండా, హ్రేహాన్ తనలోని అద్భుతమైన నైపుణ్యాన్ని ప్రపంచానికి చూపే ఒక గొప్ప ప్రయత్నంగా నిలిచింది.
ఈ మ్యూజిక్ వీడియోను కూడా చాలా సింపుల్గా రూపొందించారు. స్టార్ కిడ్ కదా అని భారీ సెట్స్, గ్రాండ్ విజువల్స్ వెనక పరిగెత్తకుండా, కేవలం సంగీతం పైనే పూర్తిగా దృష్టి పెట్టారు. వీడియోలో హ్రేహాన్ స్వయంగా గిటార్ వాయిస్తూ లైవ్ పర్ఫార్మెన్స్ ఇవ్వడం ప్రేక్షకులను ఎంతగానో ఆకట్టుకుంటోంది. ఈ ఆల్బమ్ మ్యూజిక్ లవర్స్ నుంచి మంచి స్పందన రాబడుతోంది.
తల్లిదండ్రుల ప్రోత్సాహం.. సంగీతంపైనే మక్కువ
రోషన్ కుటుంబంలో చాలా కాలం తర్వాత ఒక కొత్త తరం సింగర్ రావడంతో తండ్రి హృతిక్ రోషన్, తల్లి సుసానే ఖాన్ ఎంతో ఆనందం వ్యక్తం చేశారు. సోషల్ మీడియా వేదికగా హ్రేహాన్ తొలి ప్రయత్నం పట్ల వారు గర్వంగా ఉన్నట్లు తెలుపుతూ అభినందనలు కురిపించారు. చిన్న వయసు నుంచే గిటార్ వాయించడం, పాటలు రాయడంపై హ్రేహాన్కు ఉన్న ఆసక్తి, ఇప్పుడు ఇలా ఒక ప్రొఫెషనల్ ఆల్బమ్గా మారింది.
స్టార్ కిడ్స్ కు తల్లిదండ్రుల ఇమేజ్ ద్వారా గుర్తింపు రావడం సహజం. కానీ, తమ సొంత టాలెంట్ను నిరూపించుకోవడం అనేది ఎప్పుడూ పెద్ద సవాలే. హృతిక్ కొడుకుగా గుర్తింపు ఉన్నప్పటికీ, ఒక సింగర్గా నిలదొక్కుకోవాలంటే హ్రేహాన్ భవిష్యత్తులో మరిన్ని మంచి పాటలు అందించాల్సి ఉంటుంది. పాప్ ఆల్బమ్స్ చేస్తాడా, లేక సినిమా సంగీతంలోకి అడుగుపెడతాడా అనేది ఇప్పుడు ఆసక్తికరంగా మారింది.
సినిమా ఇండస్ట్రీలో వారసత్వం అనేది కేవలం ఎంట్రీ పాస్ లాంటిది మాత్రమే. యాక్టింగ్ వైపు వెళ్లకుండా, మ్యూజిక్ లాంటి క్రియేటివ్ ఫీల్డ్ను ఎంచుకుని తనకంటూ ఒక సెపరేట్ ఐడెంటిటీ క్రియేట్ చేసుకోవాలన్న హ్రేహాన్ నిర్ణయం నిజంగా సాహసోపేతమే. 'దిస్ హెవెన్లీ ప్లేస్' లాంటి ప్రైవేట్ ఆల్బమ్స్తో మొదలైన ఈ ప్రయాణం, ఇండిపెండెంట్ ఆర్టిస్ట్గా ఆయన స్థానాన్ని సుస్థిరం చేయొచ్చు. సొంత టాలెంట్ ని నమ్ముకున్న వాళ్లు ఎంచుకునే మార్గం ఎప్పుడూ ఇన్స్పైరింగ్గానే ఉంటుంది అనడానికి ఇదొక బెస్ట్ ఎగ్జాంపుల్.
