మలయాళంలో విపరీతమైన క్రేజ్ ఉన్న నజ్రియా నజీమ్, తెలుగులో 'అంటే సుందరానికి' సినిమాతో మంచి గుర్తింపు తెచ్చుకుంది. ఈ సినిమాతో తెలుగు ప్రేక్షకుల అభిమాన నటిగా మారిన నజ్రియా, ఆ తర్వాత టాలీవుడ్‌లో మరో సినిమాలో నటించలేదు. కానీ మలయాళంలో వరుసగా సినిమాలు చేస్తూ సోషల్ మీడియాలో చాలా చురుకుగా ఉంటుంది.
నజ్రియా, ఫహద్ ఫాజిల్‌ను ప్రేమించి పెళ్లి చేసుకున్న విషయం తెలిసిందే. పెళ్లి తర్వాత కూడా ఇద్దరూ తమ సినిమాలతో బిజీగా ఉన్నారు. అయితే గత కొంతకాలంగా నజ్రియా సోషల్ మీడియాలో సైలెంట్‌గా ఉంది. ఇటీవల 'సూక్ష్మదర్శిని' అనే సినిమాతో విజయాన్ని అందుకున్నప్పటికీ, ఆ తర్వాత ఆమె ఎవరితోనూ కాంటాక్ట్‌లో లేదని తెలుస్తోంది. స్నేహితులు, కుటుంబ సభ్యులు, సినీ పరిశ్రమలోని వారు ఫోన్ చేసినా స్పందించకపోవడంతో నజ్రియా తన భర్త ఫహద్‌తో విడిపోతోందనే వార్తలు కూడా వచ్చాయి.
అన్నింటికీ దూరంగా ఉన్నా.. క్షమించండి: నజ్రియా
తాజాగా నజ్రియా అందరినీ క్షమించమని కోరుతూ ఒక ప్రెస్ నోట్ విడుదల చేసింది. అందులో ఆమె ఇలా రాసింది: "మీరందరూ క్షేమంగా ఉన్నారని ఆశిస్తున్నాను. కొంతకాలంగా నేను ఎందుకు దూరంగా ఉన్నానో మీతో పంచుకోవాలనుకుంటున్నాను. మీలో చాలా మందికి తెలిసినట్లుగా నేను ఎప్పుడూ చాలా చురుకుగా ఉండేదాన్ని. కానీ గత కొన్ని నెలలుగా నా వ్యక్తిగత సమస్యలతో ఇబ్బంది పడుతున్నాను. నా మనసు ప్రశాంతంగా లేదు. దానివల్ల నేను కొంత డిప్రెషన్‌లోకి వెళ్లాను. గత కొద్ది నెలలుగా నేను నా 30వ పుట్టినరోజు, నూతన సంవత్సర వేడుకలు, నా చిత్రం 'సూక్ష్మదర్శిని' విజయం వంటి అనేక ముఖ్యమైన కార్యక్రమాలను మిస్ అయ్యాను. నన్ను క్షమించండి.
నేను ఎందుకు మౌనంగా ఉన్నానో వివరించనందుకు, ఫోన్ కాల్స్ తీసుకోనందుకు లేదా మెసేజ్‌లకు రిప్లై ఇవ్వనందుకు నా స్నేహితులందరికీ క్షమాపణలు చెబుతున్నాను. నేను కలిగించిన ఆందోళన లేదా అసౌకర్యానికి నేను నిజంగా చింతిస్తున్నాను. అలాగే పని కోసం నన్ను సంప్రదించడానికి ప్రయత్నిస్తున్న నా కో-స్టార్స్, డైరెక్టర్స్, ప్రొడ్యూసర్స్‌ అందరికీ నేను క్షమాపణలు కోరుతున్నాను. నా వల్ల ఏవైనా అంతరాయాలు కలిగితే క్షమించండి."
త్వరలోనే కోలుకుంటా.. మద్దతు కోరుతున్నా
తాను త్వరలోనే కోలుకుంటానని నజ్రియా అందరికీ హామీ ఇచ్చింది. "ఇది చాలా కష్టమైన ప్రయాణం, కానీ నేను ప్రతిరోజూ కోలుకోవడానికి, మెరుగుపడటానికి ప్రయత్నిస్తున్నానని మీరు తెలుసుకోవాలని కోరుకుంటున్నాను. ఈ సమయంలో మీ అవగాహన, మద్దతును నేను అభినందిస్తున్నాను. పూర్తిగా తిరిగి రావడానికి నాకు మరికొంత సమయం పట్టవచ్చు, కానీ నేను కోలుకునే మార్గంలో ఉన్నానని హామీ ఇస్తున్నాను.
ఇలా హఠాత్తుగా అదృశ్యమైనందుకు నా కుటుంబం, స్నేహితులు, అభిమానులందరికీ నేను వివరణ ఇవ్వాలనిపించింది కాబట్టే ఈరోజు ఇది రాశాను" అని నజ్రియా తన భావోద్వేగ లేఖలో పేర్కొంది. దీంతో ఆమె అభిమానులు ఆందోళన చెందుతున్నారు మరియు నజ్రియా జీవితంలో ఏం జరుగుతోందని ఆరా తీస్తున్నారు. కాగా, నజ్రియా పోస్ట్‌పై స్టార్ హీరోయిన్ సమంత స్పందిస్తూ లవ్ సింబల్‌ను కామెంట్‌గా షేర్ చేసింది.
