అమెరికా అధ్యక్షుడు డొనాల్డ్ ట్రంప్ ఖతార్‌లో మాట్లాడుతూ, అమెరికా వస్తువులపై సుంకాలను సున్నాకు తగ్గించడానికి భారతదేశం ముందుకొచ్చిందని తెలిపారు. అయితే, భారత ప్రభుత్వం దీనిపై ఇంకా స్పందించలేదు. ఆపిల్ కంపెనీ తన ఐఫోన్ తయారీ యూనిట్లను ఏర్పాటు చేసే ప్రణాళికల గురించి చర్చించినట్లు కూడా ఆయన పేర్కొన్నారు. ఇదిలా ఉండగా, కొన్ని వారాల క్రితం ట్రంప్ భారత్ నుండి దిగుమతి చేసుకునే అన్ని వస్తువులపై 26 శాతం పరస్పర సుంకాన్ని విధించారు.
ప్రతీకార సుంకాల ప్రతిపాదన
ఉక్కు, అల్యూమినియంపై అమెరికా విధించిన సుంకాలకు ప్రతిస్పందనగా, కొన్ని అమెరికన్ ఉత్పత్తులపై ప్రతీకార దిగుమతి సుంకాలు విధించాలని భారత ప్రభుత్వం యోచిస్తోంది. గ్లోబల్ ట్రేడ్ రీసెర్చ్ ఇనిషియేటివ్ (GTRI) ప్రకారం, ఈ చర్య రెండు దేశాల మధ్య జరుగుతున్న వాణిజ్య ఒప్పందం చర్చలకు ఆటంకం కలిగించవచ్చు.
పరిష్కారం కోసం ఎదురుచూపులు
అమెరికా భారత్‌తో చర్చలు జరిపినా లేదా సుంకాలను ఉపసంహరించుకున్నా ఈ సమస్యకు పరిష్కారం లభించే అవకాశం ఉందని GTRI అభిప్రాయపడింది. లేకపోతే, ఇండియా ప్రతిపాదించిన ప్రతీకార సుంకాలు జూన్ ప్రారంభంలో అమల్లోకి వస్తే, అది అమెరికా ఎగుమతిదారులపై ప్రభావం చూపుతుంది.
WTOకి భారత్ సమాచారం
భారత ప్రభుత్వం అధికారికంగా ప్రపంచ వాణిజ్య సంస్థ (WTO)కి ఒక ముఖ్యమైన విషయాన్ని తెలియజేసింది. ఉక్కు, అల్యూమినియం ఉత్పత్తులపై అమెరికా విధిస్తున్న భద్రతా సుంకాలను లక్ష్యంగా చేసుకుని, అమెరికాకు గతంలో మంజూరు చేసిన వాణిజ్య రాయితీలను నిలిపివేయాలని భారత్ భావిస్తోంది. ఈ రాయితీల నిలుపుదల ఎంపిక చేసిన అమెరికా ఉత్పత్తులపై సుంకాలను పెంచే రూపంలో ఉండవచ్చు. ఏయే వస్తువులపై సుంకాలు పెంచనున్నారో భారత్ ఇంకా వెల్లడించనప్పటికీ, 2019లో ఇదే తరహా చర్యలో బాదం, యాపిల్స్, రసాయనాలతో సహా 28 అమెరికా ఉత్పత్తులపై ప్రతీకార సుంకాలు విధించింది. ఈ తాజా నిర్ణయం ఇరు దేశాల మధ్య వాణిజ్య ఘర్షణలను మరింత తీవ్రతరం చేసే అవకాశం ఉంది.
