బీహార్‌లో పోలింగ్ ప్రశాంతంగా ముగిసిందని అందరూ ఊపిరి పీల్చుకున్నారు. కానీ అసలైన తుఫాను రేపే (కౌంటింగ్ రోజు) రాబోతోందని ఇంటెలిజెన్స్ హెచ్చరించింది!
బీహార్ అసెంబ్లీ ఎన్నికల ఓట్ల కౌంటింగ్ శుక్ర‌వారం (నవంబర్ 14) జ‌ర‌గ‌నుంది. అయితే, ఫలితాల కంటే ముందే రాష్ట్రంలో తీవ్ర ఉద్రిక్త వాతావరణం నెలకొంది. కేంద్ర ఇంటెలిజెన్స్ వ‌ర్గాలు అందించిన రహస్య స‌మాచారంతో, కేంద్ర ఎన్నికల సంఘం (EC) హై అలర్ట్ ప్ర‌క‌టించింది.
144 సెక్షన్.. భారీ భద్రత!
రాష్ట్రంలో శాంతిభద్రతల పరిరక్షణకు కేంద్ర ఎన్నికల సంఘం అసాధారణ చర్యలు చేపట్టింది. అదనపు కేంద్ర పారా మిలిట‌రీ బ‌ల‌గాల‌ను భారీగా మోహ‌రించింది. ఎలాంటి అవాంఛనీయ సంఘటనలు జరిగినా తక్షణమే స్పందించేందుకు 'క్విక్ యాక్ష‌న్ రెస్పాన్స్ టీం' (QART)లను కూడా సిద్ధంగా ఉంచింది.
ముందు జాగ్రత్త చర్యగా, కౌంటింగ్‌కు ముందు రోజు, కౌంటింగ్ జ‌రిగే రోజు, ఆ త‌ర్వాత రోజు సాయంత్రం వ‌ర‌కు రాష్ట్రవ్యాప్తంగా 144 సెక్ష‌న్‌ను అమ‌లు చేస్తున్నారు. అనుమానం వస్తే, నాయ‌కుల‌ను గృహ నిర్బంధం (House Arrest) చేసే అధికారాలను కూడా పోలీసులకు కల్పించారు.
ఎందుకీ టెన్షన్?
నిజానికి, బీహార్ ఎన్నికల చరిత్రలో ఎన్నడూ లేనంత ప్రశాంతంగా ఈసారి పోలింగ్ జరిగింది. హత్య‌లు, దోపిడీలు, బూత్ రిగ్గింగులు, లాఠీ చార్జీలు వంటివి లేకుండా ఎన్నికల ప్రక్రియ ముగియడంపై ఈసీ సైతం ప్రజలను అభినందించింది.
అయితే, పోలింగ్ ఘ‌ట్టం ముగిసిన త‌ర్వాత వచ్చిన ఎగ్జిట్ పోల్ సర్వేలు పరిస్థితిని మార్చేశాయి. దాదాపు అన్ని సర్వేలు కూడా ఎన్డీయే కూట‌మికే తిరిగి పట్టం క‌ట్టాయి. ఇది కాంగ్రెస్, ఆర్జేడీ నేతృత్వంలోని 'మ‌హాఘ‌ఠ్ బంధ‌న్' (MGB) ఆశ‌లపై నీళ్లు చ‌ల్లింది.
ఇంటెలిజెన్స్ హెచ్చరిక..
ఆది నుంచీ ఓట్ల చోరీ, ఈవీఎంల మేనేజ్‌మెంట్ అంటూ ఆరోపణలు చేస్తున్న ఆర్జేడీ, MGB నాయకులు ఈ సర్వేలతో మరింత ఆగ్ర‌హంతో ఉన్నారు. "సర్వేలు నిజ‌మై.. ఎన్డీయే మ‌ళ్లీ అధికారంలోకి వ‌స్తుంద‌ని మేం నమ్మడం లేదు" అని వారు బ‌ల్ల‌గుద్ది చెబుతున్నారు.
ఈ క్ర‌మంలోనే, కేంద్ర ఇంటెలిజెన్స్ వ‌ర్గాలు ఈసీని హెచ్చరించాయి. ఒకవేళ ఎగ్జిట్ పోల్స్‌కు అనుగుణంగానే నిజమైన ఫలితాలు వచ్చి, మ‌హాఘ‌ఠ్ బంధ‌న్ ఓడిపోతే.. ఆ కూటమి నాయకులు, కార్యకర్తలు ఆందోళనలకు దిగి, శాంతిభద్రతల సమస్య సృష్టించే ప్రమాదం ఉందని నివేదించినట్లు సమాచారం.
పోలింగ్ ప్రశాంతంగా ముగిసినా, కౌంటింగ్ మాత్రం కత్తిమీద సాములా మారింది. ఇంటెలిజెన్స్ హెచ్చరికల నడుమ, 144 సెక్షన్ నీడలో బీహార్ ఫలితాల కోసం దేశమంతా ఉత్కంఠగా ఎదురుచూస్తోంది.
