దేశ రాజధాని ఢిల్లీలోని ఇందిరాగాంధీ అంతర్జాతీయ విమానాశ్రయం (IGI)లో భారీ సాంకేతిక లోపం తలెత్తింది. ఎయిర్ ట్రాఫిక్ కంట్రోల్ (ఏటీసీ) వ్యవస్థలో సమస్య కారణంగా 300కు పైగా విమానాలు నిలిచిపోయాయి. దీంతో ప్రయాణికులు తీవ్ర అవస్థలు పడుతున్నారు.
300 విమానాలపై ప్రభావం.. ప్రయాణికుల ఆగ్రహం
దేశంలోనే అత్యంత రద్దీగా ఉండే ఢిల్లీ ఎయిర్‌పోర్ట్‌లో ప్రతిరోజూ 1,500కి పైగా విమాన రాకపోకలు సాగుతాయి. అలాంటిది, గురువారం సాయంత్రం నుంచి తలెత్తిన ఈ సాంకేతిక సమస్య శుక్రవారం కూడా కొనసాగుతోంది. దీనివల్ల విమాన రాకపోకల్లో తీవ్ర జాప్యం చోటు చేసుకుంది. సమయానికి గమ్యస్థానాలకు చేరుకోలేక వందలాది మంది ప్రయాణికులు తీవ్ర ఇబ్బందులు ఎదుర్కొంటున్నారు. సమస్యను త్వరగా పరిష్కరించాలంటూ సోషల్ మీడియా వేదికగా అధికారులను కోరుతున్నారు.
'ఆటోమేటిక్ మెసేజింగ్' వ్యవస్థలో లోపం
ఢిల్లీ ఎయిర్‌పోర్ట్‌లోని 'ఆటోమేటిక్ మెసేజ్ స్విచింగ్ సిస్టమ్'లో సాంకేతిక సమస్య తలెత్తినట్లు అధికారులు గుర్తించారు. ఈ లోపం కారణంగానే విమాన రాకపోకలకు ఇబ్బందులు తలెత్తాయని ఎయిరిండియా, ఇండిగో, స్పైస్‌జెట్ వంటి ప్రధాన విమానయాన సంస్థలు ప్రకటించాయి. ప్రయాణికులకు కలిగిన అంతరాయానికి చింతిస్తున్నామని, సహనానికి ధన్యవాదాలని తెలిపాయి.
పరిష్కారం కోసం అధికారుల యత్నం
ప్రస్తుతం 300లకు పైగా విమానాలు ఆలస్యంగా నడుస్తున్నాయని అధికారులు వెల్లడించారు. టెక్నికల్ సమస్యను పరిష్కరించడానికి నిపుణులు తీవ్రంగా కృషి చేస్తున్నట్లు తెలిపారు. వీలైనంత త్వరగా ప్రయాణికులకు తగిన సహాయం చేసేందుకు క్యాబిన్ సిబ్బంది, ఆన్-గ్రౌండ్ సిబ్బంది కృషి చేస్తున్నారని ఎయిర్‌లైన్స్ ప్రతినిధులు చెప్పుకొచ్చారు.
దేశంలోని ప్రధాన విమానాశ్రయంలోనే ఏటీసీ వ్యవస్థ స్తంభించడంతో వందలాది విమానాల రాకపోకలపై ప్రభావం పడింది. అధికారులు సాధ్యమైనంత త్వరగా ఈ సమస్యను పరిష్కరించి, ప్రయాణాలను సాధారణ స్థితికి తెచ్చేందుకు ప్రయత్నిస్తున్నారు.
