'డిజిటల్ అరెస్ట్' మోసాలు: హైదరాబాద్, బెంగళూరు హాట్స్పాట్లుగా గుర్తింపు
హైదరాబాద్: 'డిజిటల్ అరెస్ట్' పేరుతో అమాయక ప్రజలను, ముఖ్యంగా వృద్ధులను లక్ష్యంగా చేసుకుని సైబర్ నేరగాళ్లు భారీగా డబ్బు కాజేస్తున్న ఘటనలు దేశవ్యాప్తంగా పెరిగిపోయాయి. తాము సీబీఐ, ఈడీ, లేదా పోలీసు అధికారులమంటూ బెదిరించి, అరెస్ట్ చేస్తామని భయపెట్టి, ఆన్‌లైన్‌లోనే డబ్బులు దండుకుంటున్నారు. ఈ మోసాలకు హైదరాబాద్, బెంగళూరు, ఢిల్లీ నగరాలు హాట్స్పాట్లుగా మారాయని తాజా నివేదికలు వెల్లడిస్తున్నాయి.
మూడు నగరాల్లోనే 65% కేసులు
దేశంలో జరిగే 'డిజిటల్ అరెస్ట్' సైబర్ నేరాల్లో మూడింట రెండింతల మోసాలు ఈ మూడు మహానగరాల్లోనే జరుగుతున్నట్లు 'ఇండియన్ సైబర్ క్రైం కో–ఆర్డినేషన్ సెంటర్’ (I4C) జాతీయ మీడియాకు వెల్లడించింది. బెంగళూరులో అత్యధికంగా 26.38% డిజిటల్ అరెస్టుల కేసులు నమోదు కాగా, ఆ తర్వాతి స్థానంలోనే హైదరాబాద్ 19.97% కేసులతో నిలిచింది. ఢిల్లీ ఎన్‌సీఆర్‌లో 18.14 శాతం కేసులు నమోదయ్యాయి. ఈ ఏడాది మొదటి ఆరు నెలల డేటా ప్రకారం, ఈ మూడు నగరాల్లోనే దాదాపు 65 శాతం కేసులు నమోదయ్యాయి. ఈ జాబితాలో తర్వాతి స్థానాల్లో ముంబై, సూరత్, పుణె, నాగపూర్, అహ్మదాబాద్ నగరాలు ఉన్నాయి.
టార్గెట్ 30-60 ఏళ్ల వారే
సైబర్ నేరగాళ్లు ప్రధానంగా 30 ఏళ్ల నుంచి 60 ఏళ్ల మధ్య వయసు వారిని, ముఖ్యంగా పెట్టుబడులపై ఆసక్తి ఉన్నవారిని టార్గెట్ చేస్తున్నట్లు పోలీసులు గుర్తించారు. టెలిగ్రామ్, వాట్సాప్, ఫేస్‌బుక్, ఈమెయిల్ వంటి మార్గాల ద్వారా లింకులు పంపి, అవి క్లిక్ చేసిన వెంటనే లేదా బెదిరింపుల ద్వారా వారి అకౌంట్లలోని డబ్బును కాజేస్తున్నారు.
ఈ మోసాలను అరికట్టేందుకు, ఇప్పటివరకు సైబర్ మోసాలకు సంబంధించిన 9.42 లక్షల సిమ్ కార్డులు, 2.63 లక్షల ఐఎంఈఐ నంబర్లను ఐ4సీ బ్లాక్ చేసింది. ఈ తరహా కేసుల నియంత్రణకు పోలీసు వ్యవస్థను అత్యంత పటిష్టం చేయాల్సిన అవసరం ఉందని ఇటీవల సుప్రీంకోర్టు సైతం కేంద్రాన్ని ఆదేశించిన విషయం తెలిసిందే.
టెక్నాలజీ పెరుగుతున్న కొద్దీ, సైబర్ నేరగాళ్లు కొత్త కొత్త పద్ధతుల్లో మోసాలకు పాల్పడుతున్నారు. ముఖ్యంగా హైదరాబాద్ వంటి టెక్ హబ్‌లు ఈ మోసాలకు కేంద్రాలుగా మారడం ఆందోళన కలిగిస్తోంది. 'డిజిటల్ అరెస్ట్' పేరుతో మీకు ఎప్పుడైనా అనుమానాస్పద కాల్స్ లేదా మెసేజ్‌లు వచ్చాయా? కామెంట్లలో పంచుకోండి.
