మీ లోన్ అప్లికేషన్ రిజెక్ట్ అయిందా? మీ క్రెడిట్ స్కోరే కారణం కావచ్చు. కానీ ఆందోళన వద్దు.. కేవలం 30 రోజుల్లో దాన్ని మార్చేయవచ్చు!
క్రెడిట్ స్కోర్ (Credit Score) అనేది ఒక వ్యక్తి ఆర్థిక చరిత్రకు అద్దం పడుతుంది. ఈ స్కోరును చూస్తే, ఒక వ్యక్తి తన ఆర్థిక వ్యవహారాలను, బిల్లులను ఎలా నిర్వహిస్తాడో బ్యాంకులకు ఒక అంచనా వస్తుంది. ఇది మీ ఆర్థిక ఆరోగ్యానికి ఒక రిపోర్ట్ కార్డ్ లాంటిది.
మంచి క్రెడిట్ స్కోరు ఉండటం వల్ల చాలా ప్రయోజనాలు ఉన్నాయి. మీకు మంచి స్కోరు ఉంటే, బ్యాంకులు సులభంగా రుణం మంజూరు చేస్తాయి. అంతేకాదు, తక్కువ వడ్డీ రేటుకే రుణం ఇచ్చే అవకాశం ఉంది. అదే మీ స్కోరు తక్కువగా ఉంటే, బ్యాంకులు తరచుగా రుణాలను నిరాకరిస్తాయి, లేదా అధిక వడ్డీ రేటుకు రుణాలు ఇస్తాయి.
మంచి స్కోర్ అంటే ఏది? చెడ్డ స్కోర్ ఏది?
క్రెడిట్ స్కోరు అనేది మూడు అంకెల సంఖ్య. సాధారణంగా 700 లేదా అంతకంటే ఎక్కువ ఉంటే దానిని ఉత్తమ క్రెడిట్ స్కోరుగా భావిస్తారు. 300 నుంచి 500 మధ్య స్కోరు ఉంటే, అది చాలా చెడ్డ స్కోరుగా పరిగణిస్తారు. మీ క్రెడిట్ స్కోరు 600 చుట్టూ ఉంటే, అది 'యావరేజ్‌' స్కోర్‌గా భావిస్తారు.
కేవలం 30 రోజుల్లో స్కోర్ పెంచుకోవచ్చా?
చాలా మందికి "చెడ్డ క్రెడిట్ స్కోరును 1 నెలలో మెరుగుపరచుకోవచ్చా?" అనే సందేహం ఉంటుంది. నిపుణుల ప్రకారం, కచ్చితంగా పెంచుకోవచ్చు. కేవలం 30 రోజుల్లోనే మీ స్కోర్‌లో మంచి మార్పును చూడవచ్చు.
స్కోర్ పెరగాలంటే.. ఈ 3 పనులు చేయండి!
మీ క్రెడిట్ స్కోర్‌ను వేగంగా పెంచుకోవడానికి, మీరు చేయాల్సిన ముఖ్యమైన పనులు ఇవి:
- బిల్లులు సమయానికి కట్టండి: మీ రుణ EMIలు, క్రెడిట్ కార్డ్ బిల్లులను గడువు తేదీలోపు లేదా ఆ తేదీకి కచ్చితంగా చెల్లించండి. ఒక్క రోజు కూడా ఆలస్యం చేయకండి.
- క్రెడిట్ లిమిట్ తక్కువ వాడండి: మీ క్రెడిట్ కార్డ్ లిమిట్ రూ. 1 లక్ష అయితే, అందులో 30% (రూ. 30,000) కంటే తక్కువ ఖర్చు చేయడానికి ప్రయత్నించండి.
- పదేపదే లోన్ల కోసం అడగకండి: తక్కువ సమయంలో మళ్లీ మళ్లీ రుణాల కోసం దరఖాస్తు చేయడం మానుకోండి. ఇది మీ స్కోర్‌పై ప్రతికూల ప్రభావం చూపుతుంది.
ఈ తప్పు మీ స్కోర్‌ను దెబ్బతీస్తుంది!
క్రెడిట్ వినియోగ నిష్పత్తి (Credit Utilization Ratio) అంటే మీ కార్డ్ లిమిట్‌లో ఎంత శాతం వాడుతున్నారనేది స్కోర్‌ను ప్రభావితం చేస్తుంది. కానీ, దానికంటే ముఖ్యమైనది 'సమయానికి చెల్లింపు'.
మీరు క్రెడిట్ కార్డు తక్కువగా వాడినా, బిల్లు చెల్లించడంలో ఆలస్యం చేస్తే, అది మీ క్రెడిట్ స్కోర్‌ను తీవ్రంగా దెబ్బతీస్తుంది. దీనితో పాటు మీరు జరిమానా కూడా చెల్లించాల్సి ఉంటుంది.
మంచి ఆర్థిక భవిష్యత్తుకు, అత్యవసరాలకు రుణం సులభంగా పొందడానికి మంచి క్రెడిట్ స్కోరును నిర్వహించడం చాలా అవసరం. క్రమశిక్షణతో కేవలం ఒక్క నెల పాటు ఈ నియమాలను పాటిస్తే, మీ స్కోర్‌లో కచ్చితమైన పెరుగుదలను గమనించవచ్చు.
