తెలంగాణలో సూపర్ హిట్ అయిన ఆ పథకం ఇప్పుడు దేశమంతా అమలు కాబోతోందా? సీఎం రేవంత్ రెడ్డి ఇచ్చిన ఐడియాకు కేంద్ర మంత్రి ఫిదా అయ్యారు!
తెలంగాణలో పేదలకు అందిస్తున్న 'సన్న బియ్యం' పంపిణీ పథకం అద్భుత ఫలితాలనిస్తోందని, దీనిని దేశవ్యాప్తంగా విస్తరించాలని ముఖ్యమంత్రి రేవంత్ రెడ్డి కేంద్రానికి సూచించారు. గురువారం ఉదయం హైదరాబాద్లోని తాజ్ కృష్ణా హోటల్ వేదికగా కేంద్ర ఆహార, పౌర సరఫరాల శాఖ మంత్రి ప్రహ్లాద్ జోషితో సీఎం రేవంత్ రెడ్డి, మంత్రి ఉత్తమ్ కుమార్ రెడ్డి ప్రత్యేకంగా భేటీ అయ్యారు.
Also Read : తెలంగాణ స్టార్టప్ ఫండ్: రూ. 1000 కోట్లు రెడీ! ఎవరికిస్తారంటే?
సన్న బియ్యం సక్సెస్.. రీసైక్లింగ్కు చెక్!
ఈ సమావేశంలో సీఎం మాట్లాడుతూ, దేశంలో ఎక్కడా లేని విధంగా తెలంగాణలో సన్న బియ్యం పంపిణీ చేస్తున్నామని వివరించారు. ప్రజలు తినే నాణ్యమైన బియ్యాన్ని ఇవ్వడం వల్ల పీడీఎస్ బియ్యం పక్కదారి పట్టడం (రీసైక్లింగ్) గణనీయంగా తగ్గిందని, తద్వారా బహిరంగ మార్కెట్లో ధరలు కూడా స్థిరపడ్డాయని తెలిపారు. ఈ మోడల్ను అధ్యయనం చేసి దేశవ్యాప్తంగా అమలు చేసే అంశాన్ని పరిశీలించాలని కోరారు. దీనిపై కేంద్ర మంత్రి సానుకూలంగా స్పందిస్తూ, పూర్తిస్థాయి అధ్యయనం చేసి నిర్ణయం తీసుకుంటామని హామీ ఇచ్చారు.
కేంద్రం ముందు కీలక డిమాండ్లు
రాష్ట్ర రైతుల ప్రయోజనాల కోసం కేంద్రం నుంచి తగిన సహకారం కావాలని కోరుతూ, సీఎం రేవంత్ రెడ్డి పలు కీలక విజ్ఞప్తులను మంత్రి ముందుంచారు:
బాయిల్డ్ రైస్ కోటా: 2024–25 రబీ సీజన్కు గాను అదనంగా 10 లక్షల మెట్రిక్ టన్నుల బాయిల్డ్ రైస్ కోటాను పెంచాలి.
పెండింగ్ సబ్సిడీలు: పీడీఎస్, పీఎంజీకేఏవై పథకాల కింద కేంద్రం నుంచి రావాల్సిన సుమారు రూ. 1,811 కోట్ల (రూ. 1468 + రూ. 343 కోట్లు) బకాయిలను వెంటనే విడుదల చేయాలి.
గోదాముల సామర్థ్యం: రాష్ట్రంలో ధాన్యం నిల్వ ఇబ్బందులు తలెత్తకుండా, అదనంగా 15 లక్షల మెట్రిక్ టన్నుల గోదాముల నిర్మాణానికి కేంద్రం ఆర్థిక సాయం అందించాలి.
సేకరణ లక్ష్యం: ఈసారి రికార్డు స్థాయిలో 148 లక్షల మెట్రిక్ టన్నుల దిగుబడి వచ్చినందున, ధాన్యం కొనుగోలు లక్ష్యాన్ని 80 లక్షల మెట్రిక్ టన్నులకు పెంచాలి.
ముడి బియ్యం సాగుపై ఫోకస్!
రాష్ట్రం విజ్ఞప్తులను సానుకూలంగా పరిశీలిస్తామని కేంద్ర మంత్రి ప్రహ్లాద్ జోషి తెలిపారు. అయితే, దేశవ్యాప్తంగా బాయిల్డ్ రైస్ అవసరం తగ్గుతున్నందున, మిల్లింగ్కు అనువైన ముడి బియ్యం (Raw Rice) రకాల సాగును ప్రోత్సహించాలని సూచించారు. మిగులు ధాన్యం నిల్వలను ఎగుమతి చేసే అవకాశాలను పరిశీలించాలని సలహా ఇచ్చారు. దీనిపై స్పందించిన మంత్రి ఉత్తమ్ కుమార్ రెడ్డి, రా రైస్కు అనువైన వరి సాగుపై రైతులకు అవగాహన కల్పిస్తామని తెలిపారు.
