జగన్ నీడలా ఉండే విజయసాయి రెడ్డి నోట ఆ మాటలా? పవన్ తనకు 20 ఏళ్ళ మిత్రుడట.. బాబుతో వైరం లేదట! సొంత పార్టీని వదిలేసి, ప్రత్యర్థులపై ప్రేమ చూపించడం వెనుక అసలు కథేంటి?
వైసీపీ ఎంపీ విజయసాయి రెడ్డి శ్రీకాకుళంలో చేసిన వ్యాఖ్యలు ఇప్పుడు ఏపీ రాజకీయాల్లో హాట్ టాపిక్‌గా మారాయి. బద్ధ శత్రువులుగా భావించే టీడీపీ, జనసేన అధినేతలపై ఆయన సానుకూలంగా మాట్లాడటం అందరినీ ఆశ్చర్యానికి గురిచేస్తోంది. చంద్రబాబుతో తనకు ఎలాంటి వ్యక్తిగత వైరం లేదని ఆయన స్పష్టం చేశారు. ఇంకా ఆసక్తికరమైన విషయం ఏమిటంటే.. పవన్ కల్యాణ్ తనకు 20 ఏళ్లుగా మిత్రుడని సాయిరెడ్డి వెల్లడించారు. "నేను ఆయన్ను ఎప్పుడూ విమర్శించలేదు, భవిష్యత్తులో కూడా విమర్శించను" అని తేల్చిచెప్పారు.
జగన్ చుట్టూ 'కోటరీ'.. తప్పుదారి పట్టిస్తున్నారు!
ఇదే సమయంలో సొంత అధినేత జగన్‌పై పరోక్షంగా, ఆయన చుట్టూ ఉన్నవారిపై ప్రత్యక్షంగా సాయిరెడ్డి విరుచుకుపడ్డారు. జగన్ మోహన్ రెడ్డి చుట్టూ ఒక 'కోటరీ' చేరిందని, వారే ఆయన్ను తప్పుదారి పట్టిస్తున్నారని తీవ్ర ఆరోపణలు చేశారు. నిబద్ధత లేని వ్యక్తుల మాటలను జగన్ నమ్మవద్దని హితవు పలికారు. కేవలం ఆ కోటరీ వల్లే తాను ఇప్పుడు రాజకీయాలకు దూరంగా ఉండాల్సి వస్తోందని ఆవేదన వ్యక్తం చేశారు.
రాజకీయ భవిష్యత్తుపై క్లారిటీ
శ్రీకాకుళంలో రెడ్డి సంక్షేమ సంఘం వేదికగా తన భవిష్యత్తు కార్యాచరణపై ఆయన స్పష్టత ఇచ్చారు:
ప్రస్తుతానికి రైతుగా రాజకీయాలకు దూరంగా ఉంటున్నాను.
కొత్త రాజకీయ పార్టీ పెట్టే ఆలోచన గానీ, వేరే పార్టీలో చేరే ఉద్దేశం గానీ లేదు.
అవసరమైతే మళ్లీ రాజకీయాల్లోకి వస్తాను.
గతంలో తనపై అనేక ఒత్తిళ్లు వచ్చినా దేనికీ లొంగలేదు.
