ఏపీ వాహనదారులకు ముఖ్యమంత్రి చంద్రబాబు నాయుడు శుభవార్త చెప్పారు. ట్రాఫిక్ చలానాల బాదుడుపై పోలీసులకు కీలక ఆదేశాలు జారీ చేస్తూనే.. శాంతిభద్రతల విషయంలో మాత్రం సీరియస్ వార్నింగ్ ఇచ్చారు.
అమరావతిలో జరిగిన కలెక్టర్ల సదస్సులో ఏపీ సీఎం చంద్రబాబు నాయుడు (Chandrababu Naidu) పోలీసులకు దిశానిర్దేశం చేశారు. ట్రాఫిక్ చలానాల పేరుతో సామాన్య ప్రజలను ఇబ్బంది పెట్టవద్దని స్పష్టం చేశారు. అసంబద్ధంగా ఫైన్లు వేయకూడదని, ట్రాఫిక్ నియంత్రణపైనే ఎక్కువ దృష్టి పెట్టాలని సూచించారు.
రౌడీలకు 'స్టేట్ ఎగ్జిట్'..
మరోవైపు శాంతిభద్రతల విషయంలో రాజీపడే ప్రసక్తే లేదని సీఎం తేల్చిచెప్పారు.
రౌడీయిజం: "రాష్ట్రంలో రౌడీలు, లేడీ డాన్స్, గంజాయి బ్యాచ్ల ఆగడాలు సినిమాల్లోనే బాగుంటాయి. రియల్ లైఫ్లో కుదరదు. ప్రొఫెషనల్ రౌడీలు తీరు మార్చుకోకపోతే పీడీ యాక్ట్ (PD Act) పెట్టి రాష్ట్రాన్ని దాటించండి (Exile)" అని అధికారులను ఆదేశించారు.
మహిళా భద్రత: ఎస్సీ, ఎస్టీలపై నేరాలు 22.5% తగ్గడం మంచి పరిణామమని, మహిళలకు ఆత్మరక్షణ (Self Defense) మెలకువల్లో శిక్షణ ఇవ్వాలని సూచించారు.
సోషల్ మీడియాలో అతి చేస్తే..
ఆర్థిక, సైబర్ నేరాలపై ఉక్కుపాదం మోపాలని చంద్రబాబు ఆదేశించారు.
సైబర్ వింగ్: ప్రతి జిల్లాలో ప్రత్యేక సైబర్ క్రైమ్ పోలీస్ స్టేషన్లను ఏర్పాటు చేయాలి.
సోషల్ మీడియా: ఫేక్ అకౌంట్లు సృష్టించి వ్యక్తిత్వ హననానికి పాల్పడే వారిని ఉపేక్షించొద్దు. మంత్రుల కమిటీ దీనిపై అధ్యయనం చేయాలి. అలాగే తీరప్రాంత భద్రత కోసం కొత్త బోట్లను కొనుగోలు చేయాలని సూచించారు.
పవన్ కళ్యాణ్ సీరియస్!
డిప్యూటీ సీఎం పవన్ కళ్యాణ్ (Pawan Kalyan) కూడా పోలీసుల తీరుపై ఘాటుగా స్పందించారు. విశాఖలో దాడులు జరిగినా పోలీసులు పట్టించుకోకపోవడం సరికాదన్నారు.
నిర్లిప్తత వద్దు: "అధికారంలో ఉండి కూడా ఏమీ చేయలేకపోతున్నామనే విమర్శలు వస్తున్నాయి. నేరాల పట్ల పోలీసులు నిర్లిప్తంగా ఉండకూడదు. ఎస్పీలు, కలెక్టర్లు కఠినంగా వ్యవహరించాలి" అని పవన్ సూచించారు. 15% వృద్ధి రేటు సాధించాలంటే శాంతిభద్రతలు బాగుండాలని ఆయన పేర్కొన్నారు.
