ఒమన్ గల్ఫ్లో హైటెన్షన్ నెలకొంది. చమురు తరలిస్తున్న ఓ భారీ నౌకను ఇరాన్ స్వాధీనం చేసుకోవడం కలకలం రేపుతోంది. ఇందులో మన భారతీయులు కూడా ఉండటంతో ఆందోళన వ్యక్తమవుతోంది.
ఒమన్ గల్ఫ్లో (Gulf of Oman) భారీ పరిమాణంలో చమురును తరలిస్తున్న ఒక నౌకను ఇరాన్ భద్రతా బలగాలు సీజ్ చేశాయి. శుక్రవారం అర్ధరాత్రి దాటిన తర్వాత ఈ ఘటన జరిగింది. ఈ నౌకలో మొత్తం 18 మంది సిబ్బంది ఉండగా.. వారిలో భారతీయులు, బంగ్లాదేశ్, శ్రీలంక దేశస్థులు ఉన్నట్లు అంతర్జాతీయ మీడియా వెల్లడించింది.
60 లక్షల లీటర్ల ఆయిల్ స్మగ్లింగ్?
ఈ నౌకను అదుపులోకి తీసుకోవడానికి ఇరాన్ చెప్పిన కారణం 'స్మగ్లింగ్'.
అక్రమ రవాణా: నౌకలో సుమారు 60 లక్షల లీటర్ల చమురును అక్రమంగా తరలిస్తున్నారని ఇరాన్ ఆరోపించింది.
ట్రాకింగ్ ఆఫ్: భద్రతా బలగాలు దగ్గరకు వస్తున్నప్పుడు నౌకలోని నావిగేషన్ సిస్టమ్స్ను సిబ్బంది ఆఫ్ చేశారని పేర్కొంది.
కారణం: ఇరాన్లో ఇంధన ధరలు తక్కువగా ఉంటాయి. దీంతో కొందరు అక్రమంగా ఇతర దేశాలకు తరలించి సొమ్ము చేసుకుంటున్నారు. దీనిని అడ్డుకునేందుకే ఈ చర్య తీసుకున్నట్లు ఇరాన్ చెబుతోంది.
ప్రతీకార చర్యేనా?
ఈ ఘటనకు రెండు రోజుల ముందే.. వెనెజువెలా తీరంలో ఇరాన్కు చెందిన ఒక ఆయిల్ ట్యాంకర్ను అమెరికా సీజ్ చేసింది. ఇరాన్, వెనెజువెలా నుంచి అక్రమంగా ఆయిల్ తరలిస్తున్నారన్న ఆరోపణలతో ఆ నౌకను అడ్డుకుంది. ఆ ఘటన జరిగిన వెంటనే ఇరాన్ కూడా ఇప్పుడు మరో నౌకను పట్టుకోవడం చూస్తుంటే.. ఇది ప్రతీకార చర్యలా (Tit-for-Tat) కనిపిస్తోందని విశ్లేషకులు భావిస్తున్నారు.
