ట్రైనింగ్ సెంటర్లు ఉన్నాయి కానీ తాళాలు వేసి ఉన్నాయి! వరంగల్ యువత భవిష్యత్తుపై ఎంపీ కడియం కావ్య పార్లమెంట్లో కేంద్రానికి గట్టిగానే నిలదీశారు.
వరంగల్ పార్లమెంట్ పరిధిలో నైపుణ్యాభివృద్ధి (Skill Development) కార్యక్రమాలు పడకేయడంపై ఎంపీ కడియం కావ్య తీవ్ర ఆందోళన వ్యక్తం చేశారు. పార్లమెంట్ సమావేశాల సందర్భంగా ఆమె కేంద్ర నైపుణ్యాభివృద్ధి మంత్రిత్వ శాఖను ప్రశ్నించారు. ప్రధాన మంత్రి కౌశల్ వికాస్ యోజన (PMKVY) కింద వరంగల్లో 8 శిక్షణా కేంద్రాలకు అనుమతులు వచ్చినా, ప్రస్తుతం అమల్లో ఉన్న PMKVY 4.0 స్కీమ్ కింద ఒక్కటి కూడా పనిచేయడం లేదని, అవి నిరుపయోగంగా మారాయని ఆవేదన వ్యక్తం చేశారు. దీనివల్ల స్థానిక యువతకు అవసరమైన స్వల్పకాలిక శిక్షణ అందక, ఉద్యోగ పోటీలో వెనుకబడిపోతున్నారని సభ దృష్టికి తెచ్చారు.
41% మందికే ఉద్యోగాలు.. రిజర్వేషన్లు ఏవి?
కొత్తగా తెచ్చిన PMKVY 4.0 స్కీమ్లో మహిళలకు, ఎస్సీ (SC) వర్గాలకు ప్రత్యేక రిజర్వేషన్లు లేకపోవడాన్ని ఆమె తప్పుబట్టారు. గత డేటా ప్రకారం ఈ వర్గాల నుంచి మంచి స్పందన, సర్టిఫికేషన్లు ఉన్నా, ఇప్పుడు రిజర్వేషన్లు తీసేయడం సరికాదన్నారు.
ఈ పథకం అమలులో ఉన్న ప్రధాన లోపాలను ఆమె ఇలా ఎత్తిచూపారు:
- రిజర్వేషన్ల కోత: పాత వెర్షన్లలో ఉన్నట్లుగా మహిళలు, ఎస్సీలకు ఇప్పుడు ప్రత్యేక కోటా లేదు.
- తక్కువ ప్లేస్మెంట్స్: 2015 నుంచి 2022 మధ్య శిక్షణ పొందిన వారిలో కేవలం 41 శాతం మందికి మాత్రమే ఉద్యోగాలు లభించాయి.
- నిష్ప్రయోజనం: సగం మందికి కూడా ఉపాధి దొరకనప్పుడు, పరిశ్రమలతో ఒప్పందాలు ఉన్నా లాభం ఏంటని ఆమె ప్రశ్నించారు.
దీనిపై కేంద్ర మంత్రి జయంత్ చౌదరి స్పందిస్తూ, PMKVY 4.0 అనేది పూర్తిగా కెరీర్-ఓరియెంటెడ్ అని, ఇందులో రిజర్వేషన్లు ఉండవని బదులిచ్చారు. అయితే, మంత్రి సమాధానంతో ఏమాత్రం సంతృప్తి చెందని కడియం కావ్య, వరంగల్ యువత భవిష్యత్తు కోసం, మెరుగైన శిక్షణ కోసం తన పోరాటం కొనసాగిస్తానని స్పష్టం చేశారు.
