దాయాది దేశం పాకిస్థాన్ ఊపిరి పీల్చుకోవడానికి కూడా ఇబ్బంది పడుతోంది. చారిత్రక నగరం లాహోర్ ఇప్పుడు ప్రపంచంలోనే అత్యంత కాలుష్య నగరంగా (Most Polluted City) రికార్డుల్లోకెక్కింది.
స్విస్ వాయు నాణ్యత సంస్థ 'ఐక్యూఎయిర్' (IQAir) విడుదల చేసిన తాజా నివేదిక పాక్ ప్రజలను బెంబేలెత్తిస్తోంది. లాహోర్లో ఎయిర్ క్వాలిటీ ఇండెక్స్ (AQI) 353గా నమోదవ్వగా, ప్రపంచంలోనే అత్యంత కలుషిత నగరంగా ఇది మొదటి స్థానంలో నిలిచింది. అక్కడ గాలి పీల్చడం సిగరెట్ పొగ పీల్చడంతో సమానంగా మారింది.
క్వెట్టాలో పరిస్థితి మరీ ఘోరం.. AQI 517!
లాహోర్ ఒక వైపు ఉంటే, మరో నగరం క్వెట్టాలో పరిస్థితి మరింత ప్రమాదకరంగా ఉంది. అక్కడ ఉదయం పూట ఏక్యూఐ ఏకంగా 517 పాయింట్లుగా రికార్డయింది. ఇది ఆరోగ్యానికి అత్యంత ప్రమాదకరమైన స్థాయి. రహీమ్ యార్ ఖాన్, గుజ్రన్వాలా, ఫైసలాబాద్ వంటి నగరాల్లో కూడా గాలి నాణ్యత దారుణంగా పడిపోయింది.
పొగమంచు దెబ్బ.. హైవేలు బంద్!
దట్టమైన పొగమంచు (Smog) పాకిస్థాన్ను కమ్మేసింది. ఖైబర్ పఖ్తుంఖ్వా, దక్షిణ పంజాబ్ ప్రాంతాల్లో రోడ్లపై వాహనాలు కనిపించని పరిస్థితి నెలకొంది. దీంతో ప్రమాదాలను నివారించేందుకు అధికారులు పలు కీలక మోటార్వేలను, హైవేలను మూసివేశారు.
అసలు కారణాలు ఇవే:
నాణ్యత లేని డీజిల్: వాహనాల్లో వాడుతున్న కల్తీ ఇంధనం.
పంట వ్యర్థాలు: రైతులు పంట పొలాల్లో వ్యర్థాలను తగలబెట్టడం.
WHO వార్నింగ్: ప్రపంచ ఆరోగ్య సంస్థ (WHO) నిర్దేశించిన పరిమితి కంటే ఇక్కడ కాలుష్యం 80 రెట్లు ఎక్కువగా ఉండటం గమనార్హం.
అడవులు తగ్గిపోవడం, నీటి కొరత, పర్యావరణ మార్పుల వల్ల పాకిస్థాన్ ఆర్థిక వ్యవస్థ కూడా చితికిపోతోందని 'ది డిప్లొమాట్' నివేదికలో నిపుణులు హెచ్చరించారు.
