ఆఫీస్ టైమ్ అయిపోయాక కూడా బాస్ ఫోన్ చేస్తున్నారా? సెలవు రోజుల్లో మెయిల్స్ చూసుకోమని వేధిస్తున్నారా? ఇకపై ఆ తిప్పలు తప్పొచ్చు! ఉద్యోగుల పాలిట వరం లాంటి ఒక కొత్త బిల్లు ఇప్పుడు పార్లమెంట్లో చర్చకు వచ్చింది.
ఉద్యోగుల పని ఒత్తిడిని తగ్గించి, వారికి ప్రశాంతమైన జీవితాన్ని అందించే లక్ష్యంతో లోక్సభలో ఒక ఆసక్తికరమైన 'ప్రైవేట్ మెంబర్ బిల్లు'ను ప్రవేశపెట్టారు. నేషనలిస్ట్ కాంగ్రెస్ పార్టీ (శరద్ పవార్ వర్గం) ఎంపీ సుప్రియా సూలే శుక్రవారం 'రైట్ టు డిస్కనెక్ట్ బిల్లు, 2025'ను (Right to Disconnect Bill) సభ ముందు ఉంచారు.
ఆఫీస్ తర్వాత.. నో కాల్స్, నో మెయిల్స్!
ఈ బిల్లులో ఉన్న ముఖ్యాంశాలు ఉద్యోగులకు ఊరటనిచ్చేలా ఉన్నాయి:
స్విచ్ ఆఫ్: డ్యూటీ సమయం ముగిసిన తర్వాత, లేదా సెలవు రోజుల్లో ఆఫీస్ ఫోన్ కాల్స్, ఈ-మెయిల్స్కు స్పందించాల్సిన అవసరం లేదు.
హక్కు: ఇలా 'డిస్కనెక్ట్' అయ్యే హక్కును ఉద్యోగులకు చట్టబద్ధంగా కల్పించాలి.
అథారిటీ: ఉద్యోగుల హక్కుల రక్షణ కోసం ప్రత్యేకంగా 'ఉద్యోగుల సంక్షేమ అథారిటీ'ని ఏర్పాటు చేయాలి.
డిజిటల్ యుగంలో 24 గంటలూ అందుబాటులో ఉండాలన్న ఒత్తిడిని తగ్గించి, 'వర్క్-లైఫ్ బ్యాలెన్స్' (Work-Life Balance) సాధించడమే దీని ఉద్దేశమని సుప్రియా సూలే పేర్కొన్నారు.
78% మందికి ఒత్తిడే.. థరూర్ ఆవేదన
మరోవైపు కాంగ్రెస్ ఎంపీ శశి థరూర్ కూడా ఇదే అంశంపై మరో బిల్లును ప్రవేశపెట్టారు. భారత్లో ఉద్యోగుల దుస్థితిని ఆయన గణాంకాలతో వివరించారు. మన దేశంలో 51 శాతం మంది వారానికి 49 గంటలకు పైగా పనిచేస్తున్నారని, 78 శాతం మంది తీవ్రమైన ఒత్తిడికి గురవుతున్నారని ఆవేదన వ్యక్తం చేశారు. పని గంటలను పరిమితం చేసి, మానసిక ఆరోగ్యానికి భరోసా కల్పించాలని ఆయన కోరారు.
అసలు ఇది సాధ్యమేనా?
వినడానికి చాలా బాగున్నా, ఇవి చట్టంగా మారడం కష్టమే. ఎందుకంటే ఇవి 'ప్రైవేట్ మెంబర్ బిల్లులు' (మంత్రులు కాకుండా సాధారణ ఎంపీలు ప్రవేశపెట్టినవి). చరిత్రలో ఇలాంటి బిల్లులు చట్టరూపం దాల్చడం చాలా అరుదు. సాధారణంగా ప్రభుత్వం ఇచ్చే సమాధానంతో వీటిని వెనక్కి తీసుకుంటారు. కానీ, ఉద్యోగుల సమస్యలపై పార్లమెంట్లో చర్చ జరగడమే శుభపరిణామం.
