పుతిన్ ఏ విమానంలో వస్తున్నారో దేవుడికే ఎరుక! గాలిలోనే ఆ రెండు ఫ్లైట్లు చేసే మ్యాజిక్ తెలిస్తే.. హాలీవుడ్ సినిమా సీన్లు కూడా పనికిరావనిపిస్తుంది.
రష్యా అధ్యక్షుడు వ్లాదిమిర్ పుతిన్ మరికాసేపట్లో భారత్లో ల్యాండ్ కానున్నారు. అయితే, ఆయన రాక కన్నా.. ఆయన వస్తున్న విధానమే ఇప్పుడు ప్రపంచ భద్రతా దళాలను ఆశ్చర్యపరుస్తోంది. ఒకేసారి రెండు విమానాలు, అచ్చం ఒకే రూపురేఖలతో ఆకాశంలోకి దూసుకొస్తున్నాయి. పుతిన్ తన బృందంతో కలిసి IL-96-300PU మోడల్కు చెందిన రెండు విమానాల్లో ప్రయాణిస్తున్నారు. ఇందులో ఒకటి అసలైనది కాగా, మరొకటి శత్రువులను బోల్తా కొట్టించే 'డెకాయ్ ఫ్లైట్' (Decoy Flight). అధ్యక్షుడు ఏ విమానంలో కూర్చున్నారో కనిపెట్టడం అసాధ్యం.
గాలిలో మాయ.. రాడార్కే దొరకరు!
ఉక్రెయిన్ యుద్ధం, యూరప్ దేశాల నుంచి ముప్పు పొంచి ఉన్న నేపథ్యంలో రష్యా భద్రతా దళాలు ఈ 'డబుల్ షీల్డ్ ప్రోటోకాల్'ను వాడుతున్నాయి. కజకిస్తాన్ మీదుగా వచ్చేటప్పుడు ఈ రెండు విమానాలు (ఫ్లైట్ నెంబర్లు RSD221, RSD369) చేసే విన్యాసాలు మామూలుగా ఉండవు.
ఈ డెకాయ్ డ్రిల్ ఎలా ఉంటుందంటే:
రెండు విమానాలు ఒకే రూట్లో, అతి తక్కువ దూరంలో ప్రయాణిస్తాయి.
కొన్నిసార్లు ఒకదాని రాడార్ సిగ్నల్ ఆఫ్ చేసి, మరొకటి ఆన్ చేస్తారు.
మరికొన్నిసార్లు రెండూ రాడార్ నుంచి ఒక్కసారిగా మాయమైపోతాయి.
దీనివల్ల క్షిపణి లేదా డ్రోన్తో దాడి చేయాలనుకునే శత్రువులకు అసలు టార్గెట్ ఏదో తెలియక తికమక పడతారు.
ఎగిరే కోట.. అణు దళాల కంట్రోల్!
పుతిన్ ప్రయాణించే ఈ విమానం ఒక ఎగిరే కోట లాంటిది. ఇది సాధారణ ఫ్లైట్ కాదు. దీని లోపలి నుంచే పుతిన్ ప్రపంచంలో ఎక్కడున్నా సరే.. రష్యా అణు దళాలను (Nuclear Forces) కంట్రోల్ చేయగలరు. ఇందులో అత్యున్నత స్థాయి శాటిలైట్ ఫోన్లు, జామింగ్ సిస్టమ్స్, క్షిపణి రక్షణ కవచాలు ఉన్నాయి. ఒక్కసారి ఇంధనం నింపితే చాలు, ఆగకుండా 13 వేల కిలోమీటర్లు ప్రయాణించగల సత్తా దీని సొంతం. మొత్తానికి, ఆకాశంలో గందరగోళం సృష్టిస్తూ, శత్రువుల కళ్లుగప్పి పుతిన్ అత్యంత సురక్షితంగా భారత్లో అడుగుపెడుతున్నారు.
