కొత్త ఏడాది వస్తూ వస్తూనే అమెజాన్ (Amazon) ఉద్యోగులకు చేదు వార్తను మోసుకొచ్చింది. ప్రపంచం మొత్తం ఏఐ (Artificial Intelligence) జపంలో మునిగిపోతుంటే, ఆ ప్రభావం ఇప్పుడు నేరుగా ఉద్యోగుల పొట్ట కొడుతోంది. అంతర్జాతీయ ఈ-కామర్స్ దిగ్గజం అమెజాన్ ఏకంగా 16 వేల మందిని ఇంటికి సాగనంపుతున్నట్లు ప్రకటించింది. ఇందులో భారతీయులు కూడా ఉండటం గమనార్హం. అసలు అమెజాన్ ఎందుకింత పెద్ద నిర్ణయం తీసుకుంది? ఇది కేవలం పొదుపు చర్యేనా లేక ఏఐ విప్లవమా? ఉద్యోగం కోల్పోయిన వారికి కంపెనీ ఇస్తున్న ఆఫర్ ఏంటి?
16 వేల మంది ఔట్.. ఏఐ వైపే రూట్!
అమెజాన్ తీసుకున్న తాజా నిర్ణయం ఐటీ, ఈ-కామర్స్ వర్గాల్లో కలకలం రేపుతోంది. కృత్రిమ మేధ (AI) వైపు వేగంగా అడుగులు వేస్తున్న అమెజాన్, సంస్థను పునర్నిర్మించే (Restructuring) పనిలో పడింది. ఇందులో భాగంగా గ్లోబల్ గా 16 వేల మంది ఉద్యోగులను తొలగిస్తున్నట్లు అధికారికంగా ప్రకటించింది. గత అక్టోబర్ లోనే సంస్థ మేనేజ్మెంట్ లేయర్స్ ను తగ్గించి, సామర్థ్యాన్ని పెంచుతామని చెప్పింది. ఆ ప్లాన్ లో భాగంగానే ఇప్పుడు ఈ భారీ లేఆఫ్స్ జరుగుతున్నాయి. చాలా టీమ్స్ లో మార్పులు పూర్తయినా, ఇంకా కొన్ని విభాగాల్లో సర్దుబాట్లు జరుగుతున్నాయని సంస్థ వైస్ ప్రెసిడెంట్ బెత్ గలెట్టి వెల్లడించారు.
బాధితులకు కంపెనీ భరోసా.. ఆఫర్స్ ఇవే
ఉద్యోగం పోయినంత మాత్రాన రోడ్డున పడేయబోమని అమెజాన్ చెబుతోంది. ప్రభావితమైన ఉద్యోగులకు సంస్థలో అంతర్గతంగా వేరే కొత్త పాత్ర (New Role) వెతుక్కోవడానికి 90 రోజుల గడువు ఇచ్చింది. ఒకవేళ ఆ సమయంలోపు వేరే జాబ్ దొరక్కపోయినా, లేదా కంపెనీలో కొనసాగడం ఇష్టం లేకపోయినా వారికి ప్రత్యేక ప్యాకేజీలను ప్రకటించింది.
సెవరెన్స్ పే (Severance Pay): ఉద్యోగం పోయినందుకు పరిహారం.
హెల్త్ ఇన్సూరెన్స్: ఆరోగ్య బీమా ప్రయోజనాలు కొనసాగింపు.
అవుట్ప్లేస్మెంట్ సేవలు: వేరే కంపెనీలో ఉద్యోగం దొరకడానికి సహాయం.
భవిష్యత్తు మొత్తం ఏఐ మయం!
ఈ లేఆఫ్స్ తాత్కాలికమేమీ కాదు. అమెజాన్ తన భవిష్యత్ వ్యూహాల్లో ఏఐకి పెద్ద పీట వేస్తోంది. వ్యూహాత్మక ప్రాంతాల్లో (Strategic Areas) మాత్రమే కొత్త నియామకాలు, పెట్టుబడులు ఉంటాయని స్పష్టం చేసింది. అంటే రొటీన్ వర్క్ చేసే వారి స్థానంలో ఏఐని ప్రవేశపెట్టి, కేవలం కీలకమైన నిపుణులను మాత్రమే తీసుకోవాలన్నది అమెజాన్ ప్లాన్ గా కనిపిస్తోంది.
ఇది ఆరంభం మాత్రమే!
అమెజాన్ వంటి దిగ్గజ కంపెనీయే ఏఐ కోసం వేల మందిని తీసేస్తుంటే, రాబోయే రోజుల్లో మిగతా కంపెనీల పరిస్థితి ఎలా ఉంటుందో ఊహించుకోవచ్చు. ఇది టెక్ ఉద్యోగులకు ఒక డేంజర్ బెల్. ఇకపై 'స్కిల్' లేకపోతే 'కిల్' అయిపోవడం ఖాయం!
