సంక్రాంతి పందెంలో భారీ అంచనాలతో బరిలోకి దిగిన రెబల్ స్టార్ ప్రభాస్ సినిమా 'రాజాసాబ్' (The Raja Saab) బాక్సాఫీస్ వద్ద చతికిలపడింది. ఫ్యాన్స్ ఆశించిన మ్యాజిక్ రిపీట్ కాకపోవడంతో థియేటర్లలో ఫ్లాప్ టాక్ మూటగట్టుకుంది. అయితే వెండితెరపై నిరాశపరిచిన రాజాసాబ్, ఇప్పుడు డిజిటల్ స్క్రీన్ పై తన అదృష్టాన్ని పరీక్షించుకునేందుకు సిద్ధమయ్యాడు. థియేటర్లలో మిస్ అయిన ఆ 'మ్యాజిక్' ఓటీటీలో వర్కవుట్ అవుతుందా? స్ట్రీమింగ్ పార్ట్నర్ ఎవరు? శివరాత్రికి ప్రభాస్ ఇవ్వబోయే ట్రీట్ ఏంటి?
అంచనాలు తలకిందులు.. నష్టాల పాలు
మారుతి దర్శకత్వంలో హారర్ కామెడీగా తెరకెక్కిన ఈ చిత్రంపై రిలీజ్ కు ముందు విపరీతమైన హైప్ క్రియేట్ అయ్యింది. కానీ రిలీజ్ తర్వాత సీన్ రివర్స్ అయ్యింది. ముఖ్యంగా ప్రచార చిత్రాల్లో చూపించిన ప్రభాస్ 'ఓల్డ్ మ్యాన్ లుక్' సినిమాలో లేకపోవడంతో అభిమానులు తీవ్ర నిరాశకు గురయ్యారు. కథలో పట్టు లేకపోవడం, విమర్శల పాలవ్వడంతో కలెక్షన్లు ఆశించిన స్థాయిలో రాలేదు. దీంతో నిర్మాతలకు ఈ సినిమా నష్టాలను మిగిల్చినట్లు ట్రేడ్ వర్గాల టాక్. పీపుల్ మీడియా ఫ్యాక్టరీ ప్రతిష్టాత్మకంగా నిర్మించినా ఫలితం దక్కలేదు.
శివరాత్రికి ఓటీటీలో సందడి
థియేట్రికల్ రన్ ముగియడంతో ఇప్పుడు ఈ సినిమా ఓటీటీ రిలీజ్ పై ఆసక్తి నెలకొంది. విశ్వసనీయ సమాచారం ప్రకారం.. ఈ సినిమా డిజిటల్ హక్కులను ప్రముఖ ఓటీటీ సంస్థ 'జియో హాట్స్టార్' (Jio Hotstar) రికార్డు ధరకు సొంతం చేసుకుంది. మహా శివరాత్రి కానుకగా ఫిబ్రవరి 15 నుంచి ఈ సినిమా స్ట్రీమింగ్ కానుందని తెలుస్తోంది. తెలుగుతో పాటు తమిళ, కన్నడ, మలయాళ, హిందీ భాషల్లో ఒకేసారి అందుబాటులోకి రానుంది. నిధి అగర్వాల్, మాళవిక మోహనన్ గ్లామర్, తమన్ మ్యూజిక్ ఓటీటీ ఆడియన్స్ ను ఏమేరకు ఆకట్టుకుంటాయో చూడాలి.
స్పిరిట్ జోష్.. ఫ్యూచర్ లైనప్
రాజాసాబ్ ఫలితాన్ని పక్కనబెడితే, ప్రభాస్ తన తదుపరి చిత్రాలపై ఫుల్ ఫోకస్ పెట్టారు. ప్రస్తుతం సందీప్ రెడ్డి వంగా దర్శకత్వంలో 'స్పిరిట్' (Spirit), హను రాఘవపూడితో 'ఫౌజీ' (Fauji) షూటింగ్స్ లో బిజీగా ఉన్నారు. స్పిరిట్ చిత్రం వచ్చే ఏడాది (2027) మార్చి 5న విడుదల కానుందని మేకర్స్ ఇప్పటికే ప్రకటించారు. వీటితో పాటు సలార్-2, కల్కి-2 కూడా లైన్లో ఉండటంతో డార్లింగ్ ఫ్యాన్స్ ఆశలన్నీ ఈ ప్రాజెక్టులపైనే ఉన్నాయి.
వెండితెరపై వికటించినా.. బుల్లితెరపై మెరుస్తాడా?
బాక్సాఫీస్ వద్ద బోల్తా కొట్టిన రాజాసాబ్, ఓటీటీలో హిట్ కొట్టి పరువు నిలబెట్టుకుంటాడో లేదో ఫిబ్రవరి 15న తేలిపోనుంది.
