చికెన్ అంటే లొట్టలేసుకుని తినేవాళ్లు మనలో చాలామందే ఉంటారు. సండే వచ్చిందంటే చాలు చికెన్ లేనిదే ముద్ద దిగదు. కొంతమంది అయితే జిమ్ కోసమో, రుచి కోసమో రోజూ చికెన్ లాగించేస్తుంటారు. ఇది 'సూపర్ ప్రోటీన్' అని, కండరాలు పెంచుతుందని అందరూ నమ్ముతారు. కానీ.. "అతి సర్వత్ర వర్జయేత్" అన్నట్లు, రోజూ చికెన్ తినడం నిజంగానే ఆరోగ్యానికి మంచిదా? లేక మనం తెలియకుండానే పోషక లోపాలకు దారి తీస్తున్నామా? ప్రముఖ పోషకాహార నిపుణులు చెబుతున్న ఈ షాకింగ్ నిజాలు తెలుసుకుంటే మీ ప్లేట్ లో మార్పులు ఖాయం.
చికెన్ ఎందుకు 'సూపర్ ప్రోటీన్'?
చికెన్ ను 'హై-క్వాలిటీ ప్రోటీన్' అని పిలుస్తారు. మన శరీరానికి అవసరమైన 9 ముఖ్యమైన అమైనో ఆమ్లాలు (Amino Acids) ఇందులో పుష్కలంగా ఉంటాయి.
శక్తి కేంద్రం: కేవలం 4 ఔన్సుల చికెన్ తింటే 35 గ్రాముల లీన్ ప్రోటీన్ లభిస్తుంది. ఇది కండరాల పెరుగుదలకు, కణాల మరమ్మత్తుకు చాలా ముఖ్యం.
బరువు తగ్గడం: ప్రోటీన్ ఎక్కువగా ఉండటం వల్ల కడుపు నిండుగా అనిపించి, అనవసరమైన చిరుతిళ్లు తినకుండా ఉంటాం. దీంతో బరువు తగ్గడానికి (Weight Loss) సహాయపడుతుంది.
బ్రెస్ట్ పీస్ vs లెగ్ పీస్
చాలామంది జ్యూసీగా ఉంటుందని లెగ్ పీస్ (Leg Piece) ఇష్టపడతారు. కానీ ఆరోగ్య పరంగా చూస్తే బ్రెస్ట్ పీస్ (Breast Piece) బెస్ట్.
చికెన్ బ్రెస్ట్: ఇందులో కేలరీలు తక్కువ, ప్రోటీన్ ఎక్కువ. గుండె ఆరోగ్యానికి చాలా మంచిది.
చికెన్ లెగ్: ఇందులో సోడియం, కొవ్వు ఎక్కువగా ఉంటాయి. రుచి బాగున్నా, ఆరోగ్యానికి బ్రెస్ట్ పీస్ అంత మంచిది కాదు.
రోజూ తింటే వచ్చే సమస్యలేంటి?
చికెన్ మంచిదే అయినా, కేవలం దీనిపైనే ఆధారపడితే (Only Chicken Diet) కొన్ని సమస్యలు తప్పవు.
పోషక లోపం: చికెన్ లో ఫైబర్ (పీచు పదార్థం) ఉండదు. దీనివల్ల జీర్ణ సమస్యలు రావచ్చు. అలాగే ఐరన్, పొటాషియం వంటివి కూడా సరిపడా అందవు.
మంచి కొవ్వులు: చికెన్ బ్రెస్ట్ లో కొవ్వు తక్కువగా ఉంటుంది కాబట్టి, శరీరానికి అవసరమైన ఒమేగా-3 వంటి మంచి కొవ్వుల కోసం ఆలివ్ ఆయిల్ లేదా అవకాడోలను జత చేసుకోవాలి.
వైవిధ్యం ముఖ్యం: వారమంతా చికెన్ తినడం కాకుండా.. చేపలు (Fish), గుడ్లు (Eggs), పప్పుధాన్యాలు, టోఫు వంటివి కూడా డైట్ లో చేర్చుకుంటేనే సంపూర్ణ ఆరోగ్యం లభిస్తుంది.
బ్యాలెన్స్ ఉంటేనే బలం!
చికెన్ తినొచ్చు, కానీ అది ఒక్కటే సర్వస్వం అనుకోవద్దు. మీ ప్లేట్ లో ఆకుకూరలు, పప్పులు, ఇతర ప్రోటీన్ సోర్స్ లు కూడా ఉండేలా చూసుకోండి. అప్పుడే కండరాలతో పాటు ఆరోగ్యం కూడా మీ సొంతం అవుతుంది.
