వెనిజులాకు ట్రంప్ అల్టిమేటం: "చైనా, రష్యాలను గెంటేయండి.. ఆయిల్ మాకివ్వండి!" కొత్త ప్రభుత్వం ముందు కఠిన షరతులు!
వెనిజులాలో నికోలస్ మదురో శకం ముగిసిందని సంబరపడేలోపే.. అమెరికా అధ్యక్షుడు డొనాల్డ్ ట్రంప్ కొత్త ప్రభుత్వానికి చుక్కలు చూపిస్తున్నారు. "మా మాట వింటేనే సహాయం.. లేదంటే సంక్షోభమే" అంటూ ట్రంప్ యంత్రాంగం వెనిజులా తాత్కాలిక ప్రభుత్వం ముందు కఠినమైన షరతులు విధించింది. మదురోను గద్దె దించిన తర్వాత, ఇప్పుడు అక్కడి చమురు నిల్వలపై పూర్తి ఆధిపత్యం సాధించేందుకు అమెరికా పావులు కదుపుతోంది. చైనా, రష్యా, ఇరాన్, క్యూబాలతో ఉన్న బంధాన్ని తెంచుకుని, అమెరికా చెప్పినట్లు నడుచుకుంటేనే ఆర్థిక సాయం అందుతుందని తేల్చిచెప్పింది. ఇది వెనిజులా సార్వభౌమాధికారానికి పరీక్షా సమయం.
ఏబీసీ న్యూస్ కథనం ప్రకారం, ట్రంప్ విధించిన షరతులు వెనిజులా విదేశాంగ విధానాన్ని పూర్తిగా మార్చేసేలా ఉన్నాయి. వెనిజులాకు సహాయం అందాలంటే.. మొదటగా చైనా, రష్యా, ఇరాన్, క్యూబా దేశాలను తక్షణం బహిష్కరించాలి. వారితో ఉన్న ఆర్థిక, వాణిజ్య సంబంధాలను పూర్తిగా తెంచుకోవాలి. రెండోది, వెనిజులా చమురు ఉత్పత్తిలో ఇకపై కేవలం అమెరికాతోనే భాగస్వామ్యం కుదుర్చుకోవాలి. మూడోది, ఉత్పత్తి అయిన భారీ ముడి చమురు అమ్మకాల్లో అమెరికాకే మొదటి ప్రాధాన్యత (First Priority) ఇవ్వాలి. అంటే పరోక్షంగా వెనిజులా ఇంధన రంగాన్ని అమెరికా తన గుప్పిట్లోకి తీసుకుంటోందన్నమాట.
ప్రస్తుతం వెనిజులాలో పరిస్థితి దారుణంగా ఉంది. అమెరికా ఆంక్షల వల్ల ఉత్పత్తి అయిన చమురును నిల్వ చేయడానికి ట్యాంకర్లు ఖాళీ లేవని, అందుకే డిసెంబర్ నుంచి బావులను మూసివేస్తున్నారని సమాచారం. అమెరికా విదేశాంగ మంత్రి మార్కో రూబియో ఈ విషయాన్ని ధృవీకరించారు. వెనిజులా తన దగ్గర ఉన్న చమురును అమ్మకపోతే మరో కొన్ని వారాల్లోనే ఆర్థికంగా కుప్పకూలిపోతుంది. ఈ బలహీనతనే అమెరికా ఆసరాగా తీసుకుంటోంది. తాత్కాలిక అధ్యక్షురాలిగా ఉన్న డెల్సీ రోడ్రిగ్జ్.. ట్రంప్ షరతులకు తలొగ్గక తప్పని పరిస్థితి నెలకొంది. ఇప్పటికే 30 నుంచి 50 మిలియన్ బ్యారెళ్ల చమురును అమెరికాకు అప్పగించడానికి రంగం సిద్ధమైనట్లు, ఆ నిధులను ట్రంప్ స్వయంగా నియంత్రిస్తారని వార్తలు వస్తున్నాయి.
బాటమ్ లైన్..
ఇది సహాయం ముసుగులో జరుగుతున్న వ్యాపార, రాజకీయ ఆక్రమణ.
చైనాకు చెక్: ఇన్నాళ్లూ వెనిజులా చమురును చైనానే ఎక్కువగా కొనుగోలు చేసేది. ఇప్పుడు ఆ మార్గాన్ని మూసివేయడం ద్వారా డ్రాగన్ ఇంధన అవసరాలపై ట్రంప్ దెబ్బకొట్టారు.
ఆయిల్ కంట్రోల్: ప్రపంచంలోనే అతిపెద్ద చమురు నిల్వలు ఉన్న దేశాన్ని నియంత్రించడం ద్వారా.. గ్లోబల్ ఆయిల్ మార్కెట్ ధరలను అమెరికా శాసించగలదు.
సార్వభౌమాధికారం: ఒక దేశం ఎవరితో స్నేహం చేయాలి, ఎవరికి వస్తువులు అమ్ముకోవాలో మరో దేశం డిక్టేట్ చేయడం అంతర్జాతీయ సంబంధాల్లో కొత్త నిరంకుశత్వానికి నాంది. వెనిజులా ఇప్పుడు పేరుకే స్వతంత్ర దేశం, పెత్తనం మాత్రం అమెరికాదే.
