Vaibhav Suryavanshi vs Virat Kohli: 14 ఏళ్లకే కింగ్ రికార్డు బద్దలు! భారత క్రికెట్లో కొత్త శకం
క్రికెట్ రికార్డుల రారాజు విరాట్ కోహ్లీ (Virat Kohli) రికార్డులకే ఎసరు పెట్టాడు ఓ 14 ఏళ్ల కుర్రాడు. భారత క్రికెట్లో ఒక నూతన శకం మొదలైంది అనడానికి ఇంతకంటే నిదర్శనం ఏం కావాలి? అండర్-19 స్థాయిలో కోహ్లీ నెలకొల్పిన మైలురాళ్లను యువ సంచలనం వైభవ్ సూర్యవంశీ ఒక్కొక్కటిగా చెరిపివేస్తున్నాడు. కోహ్లీ 19 ఏళ్ల వయసులో సాధించిన ఘనతలను, వైభవ్ కేవలం 14 ఏళ్లకే అధిగమించి అందరినీ ఆశ్చర్యపరిచాడు. అసలు కోహ్లీకి, వైభవ్కు మధ్య ఉన్న పోలికలేంటి? గణాంకాలు ఏం చెబుతున్నాయి?
కోహ్లీని దాటేశాడు.. 20 మ్యాచ్ల్లోనే వెయ్యి!
విరాట్ కోహ్లీ తన యూత్ వన్డే కెరీర్లో 28 మ్యాచ్లు ఆడి 978 పరుగులు సాధించాడు. కానీ వైభవ్ సూర్యవంశీ మాత్రం కేవలం 20 మ్యాచ్ల్లోనే 1,047 పరుగులు సాధించి కోహ్లీని వెనక్కి నెట్టేశాడు. అండర్-19 వన్డేల్లో వెయ్యి పరుగులు పూర్తి చేసిన ఏడో భారతీయ బ్యాటర్గా రికార్డు సృష్టించాడు. వయసు పరంగా చూస్తే కోహ్లీ 17 ఏళ్లప్పుడు అండర్-19 లోకి వస్తే, వైభవ్ 14 ఏళ్లకే రికార్డుల దుమ్ము దులుపుతున్నాడు.
కోహ్లీది క్లాస్.. వైభవ్ది ఊర మాస్!
ఇద్దరి బ్యాటింగ్ శైలిలో చాలా తేడా ఉంది. కోహ్లీ తన యువ దశలో ఇన్నింగ్స్ను నిర్మించడంపై, స్ట్రైక్ రొటేట్ చేయడంపై ఎక్కువ దృష్టి పెట్టేవాడు. కానీ వైభవ్ మాత్రం పవర్ హిట్టింగ్నే నమ్ముకున్నాడు.
ఫాస్టెస్ట్ 50: 2026 ప్రపంచకప్లో బంగ్లాదేశ్పై వైభవ్ కేవలం 30 బంతుల్లోనే హాఫ్ సెంచరీ బాదాడు. ఆ టోర్నీ చరిత్రలోనే అతి పిన్న వయసులో ఈ ఘనత సాధించిన ఆటగాడు అతనే.
సిక్సర్ల మోత: ఇంగ్లండ్తో జరిగిన ఫైనల్లో 80 బంతుల్లో 175 పరుగులు సాధించడమే కాక, ఒక వరల్డ్ కప్ ఫైనల్ ఇన్నింగ్స్లో అత్యధిక సిక్సర్లు (15) కొట్టిన ప్లేయర్గా చరిత్ర సృష్టించాడు. కోహ్లీ కూడా అండర్-19లో ఇంత వైల్డ్ గా ఆడలేదు.
టెస్టుల్లో ఇంకా 'కింగ్' కోహ్లీనే..
వైట్ బాల్ క్రికెట్లో వైభవ్ హవా నడుస్తున్నప్పటికీ, రెడ్ బాల్ (యూత్ టెస్టులు) విషయానికొస్తే కోహ్లీనే టాప్. కోహ్లీ యూత్ టెస్టుల్లో 51.77 సగటుతో భారీ స్కోర్లు సాధించగా, వైభవ్ ఈ ఫార్మాట్లో కేవలం 28.28 సగటుతో ఇంకా నేర్చుకునే దశలోనే ఉన్నాడు. అయినప్పటికీ, ఆస్ట్రేలియా గడ్డపై 58 బంతుల్లోనే యూత్ టెస్ట్ సెంచరీ బాది తనలోని 'దూకుడు'ను వైభవ్ నిరూపించుకున్నాడు.
రికార్డులు కొట్టొచ్చు.. కానీ లెజెండ్ అవ్వాలంటే?
కోహ్లీ తన అండర్-19 వైభవాన్ని సీనియర్ టీమ్లోనూ కొనసాగించి లెజెండ్గా మారాడు. వైభవ్ కూడా తన అద్భుతమైన వేగానికి 'నిలకడ'ను జోడిస్తే.. భవిష్యత్తులో భారత క్రికెట్ను శాసించడం ఖాయం.
