US Worst of the Worst List: ట్రంప్ హిట్ లిస్ట్లో 89 మంది భారతీయులు.. నేరాలు చూస్తే షాక్!
అమెరికాలో ఉండాలనే ఆశతో వెళ్లిన వారికి ఇప్పుడు నిద్రలేకుండా పోయింది. అక్రమ వలసదారులపై ఉక్కుపాదం మోపుతున్న అధ్యక్షుడు డొనాల్డ్ ట్రంప్ (Donald Trump) ఇప్పుడు మరో అడుగు ముందుకేసి 'రాక్షసుల' జాబితాను బయటపెట్టారు. 'వరెస్ట్ ఆఫ్ ది వరెస్ట్' (WOW) పేరుతో విడుదలైన ఈ లిస్ట్లో మన దేశానికి చెందిన 89 మంది పేర్లు ఉండటం ఇప్పుడు ప్రవాస భారతీయుల్లో కలకలం రేపుతోంది. హత్యలు, లైంగిక దాడుల నుంచి భారీ ఆర్థిక మోసాల వరకు.. వీళ్లు చేసిన నేరాల చిట్టా చూస్తే భయం వేయకమానదు. అసలు ట్రంప్ సర్కార్ ఈ లిస్ట్ను ఎందుకు పబ్లిక్ చేసింది? దీనివల్ల సామాన్య ఎన్నారైలకు వచ్చే ముప్పేంటి?
'వరెస్ట్ ఆఫ్ ది వరెస్ట్'.. రాక్షసుల చిట్టా!
అమెరికా అంతర్గత భద్రతా విభాగం (DHS) తాజాగా 25,000 మంది 'క్రిమినల్ ఏలియన్స్' (Criminal Aliens) డేటాబేస్ను బహిర్గతం చేసింది. దీన్నే 'వరెస్ట్ ఆఫ్ ది వరెస్ట్' (WOW) అని పిలుస్తున్నారు. అమెరికన్ల భద్రతకు ముప్పుగా మారిన ఈ నేరగాళ్లను తాము వీధుల నుంచి ఎలా ఏరివేస్తున్నామో ప్రజలకు చూపించడానికే ఈ ప్రత్యేక వెబ్సైట్ను (WOW.DHS.GOV) ప్రారంభించారు. ఇందులో నేరగాళ్ల పేర్లు, ఫోటోలు, వారు ఏ దేశానికి చెందినవారు, చేసిన నేరం ఏంటి అనే వివరాలను ఎవరైనా చూడొచ్చు.
భారతీయులపై మాయని మచ్చ.. ఆ 89 మంది ఎవరు?
ఈ జాబితాలో 89 మంది భారత సంతతి వ్యక్తులు ఉండటం గమనార్హం. వీరిలో అత్యధికులు ఆర్థిక నేరాల్లో (Financial Frauds) ఆరితేలినవారే కావడం విచారకరం. వైర్ ఫ్రాడ్, ట్యాక్స్ ఫ్రాడ్ వంటి భారీ కుంభకోణాలతో పాటు.. హింసాత్మక దాడులు, లైంగిక వేధింపుల వంటి తీవ్రమైన కేసుల్లో వీరు నిందితులుగా ఉన్నారు. ఇలాంటి వారి వల్ల నిజాయితీగా ఉండే భారతీయుల పరువు కూడా పోతోందని ఎన్నారైలు వాపోతున్నారు.
7 లక్షల మందికి దడ.. క్లీన్-అప్ ఆగేది లేదు!
ప్రస్తుతం అమెరికాలో సుమారు 7.25 లక్షల మంది భారతీయులు అక్రమంగా నివసిస్తున్నట్లు అంచనా. ట్రంప్ చేపట్టిన ఈ బహిష్కరణ (Deportation) ప్రక్రియ వేగవంతం కావడంతో వారిలో ఆందోళన మొదలైంది. డెమొక్రాట్లు ఈ చర్యలను తీవ్రంగా వ్యతిరేకిస్తున్నా.. దేశాన్ని నేరరహితంగా మార్చే వరకు ఈ 'క్లీన్-అప్' ఆపరేషన్ ఆగేది లేదని ట్రంప్ యంత్రాంగం తేల్చిచెప్పింది.
నేరం చేస్తే దాక్కోలేరు!
ట్రంప్ చర్యలు కఠినంగా ఉన్నా.. అవి చట్టాన్ని అతిక్రమించిన వారికి, నేరస్థులకే ప్రమాదం. సక్రమ మార్గంలో వెళ్లిన వారికి భయం లేదు. కానీ, ఈ పరిణామాలు వీసా నిబంధనలను మరింత కఠినతరం చేసే అవకాశం ఉంది.
