కృత్రిమ మేధస్సు (AI).. ప్రపంచాన్ని గడగడలాడిస్తున్న కొత్త బ్రహ్మాస్త్రం! ఐటీ కంపెనీల నుంచి సామాన్యుడి దాకా.. ఎవరి నోట విన్నా ఒకటే మాట.. మా ఉద్యోగాలు ఏమైపోతాయి? ఏఐ దెబ్బకు మా బతుకులు రోడ్డున పడతాయా? అన్న భయం అందరినీ వెంటాడుతోంది. ఈ భయంకరమైన సందిగ్ధంలో, అమెరికాకు చెందిన ప్రముఖ డిఫెన్స్ టెక్నాలజీ దిగ్గజం 'పలాంటిర్ టెక్నాలజీస్' సీఈఓ అలెక్స్ కార్ప్ చేసిన తాజా వ్యాఖ్యలు ఇప్పుడు ప్రపంచవ్యాప్తంగా సంచలనంగా మారాయి. ఏఐ సృష్టించే ఈ మహా ప్రళయంలో సైతం చెక్కుచెదరకుండా నిలబడే ఆ ఇద్దరు వ్యక్తులు ఎవరో ఆయన కుండబద్దలు కొట్టారు!
ప్రళయం వచ్చినా.. వీళ్లకు ఢోకా లేదు!
ఏఐ రాకతో ప్రపంచంలో ఎన్ని లక్షల ఉద్యోగాలు గల్లంతైనా సరే, కేవలం రెండు రకాల వ్యక్తులు మాత్రం భవిష్యత్తు గురించి కించిత్ కూడా ఆందోళన చెందాల్సిన అవసరమే లేదని అలెక్స్ కార్ప్ స్పష్టం చేశారు. అందులో మొదటివారు.. అచ్చమైన 'వృత్తి ఆధారిత నైపుణ్యాలు' (Vocational Skills) కలిగిన వారు. ఉదాహరణకు.. మన కార్లు బాగుచేసే మెకానిక్లు, కరెంటు పనులు చేసే ఎలక్ట్రీషియన్లు, యంత్రాలను నడిపే టెక్నీషియన్లు. వీరంతా తమ చేతులతో చేసే ప్రాక్టికల్ పనులను ఏఐ ఎంత ఎదిగినా పూర్తిగా భర్తీ చేయలేదని, వీరికి భవిష్యత్తులో తిరుగులేదని ఆయన భరోసా ఇచ్చారు.
రెండో వర్గం.. బ్రెయిన్తో ఆడుకునే వాళ్లు!
ఇక ఏఐ గండం నుంచి బయటపడే రెండో వర్గం.. 'న్యూరోడైవర్జెంట్' (Neurodivergent) వ్యక్తులు. వీళ్లు సామాన్యుల్లా ఆలోచించరు. గుంపులో గోవిందా అన్నట్లు కాకుండా, ప్రపంచాన్ని పూర్తిగా భిన్నమైన కోణంలో చూస్తారు. నలుగురు వెళ్లే దారిలో కాకుండా ఎవరూ ఊహించని కొత్త మార్గాలను అన్వేషిస్తారు. ఎంతటి క్లిష్టమైన సమస్యనైనా సరే అత్యంత సృజనాత్మకంగా, చిటికెలో పరిష్కరించే సామర్థ్యం వీరి సొంతం. ఇలాంటి భిన్నమైన ఆలోచనా విధానం ఉన్న 'న్యూరోడైవర్సిటీ' వర్గం వారిని ఏఐ వెంట్రుక కూడా పీకలేదని కార్ప్ కుండబద్దలు కొట్టారు.
ఆ ఉద్యోగాలకు డేంజర్ బెల్స్ మోగినట్లే!
ఒకవైపు నైపుణ్యం ఉన్నవారికి భరోసా ఇస్తూనే, మరోవైపు సంప్రదాయ ఉద్యోగుల గుండెల్లో కార్ప్ బాంబు పేల్చారు. ఆఫీసుల్లో కూర్చుని చేసే సాధారణ కోడింగ్, రొటీన్ లా వర్క్, లేదా మామూలు రీడింగ్, రైటింగ్ (చదవడం, రాయడం) వంటి పనులను ఏఐ ఇప్పటికే చాలా సులభంగా, వేగంగా చేసేస్తోంది. అంటే ఇలాంటి రొటీన్ ఉద్యోగాలు చేసేవారి భవిష్యత్తు అత్యంత తీవ్రమైన ప్రమాదంలో పడినట్లే! వీరు ఏ క్షణంలోనైనా తమ ఉద్యోగాలు కోల్పోయే ముప్పు పొంచి ఉందని ఆయన హెచ్చరించారు. అందుకే, ఈ రంగాల్లో పనిచేస్తున్న వారు కాలగర్భంలో కలిసిపోకూడదంటే.. తక్షణమే తమ నైపుణ్యాలను అప్గ్రేడ్ చేసుకోవాల్సిందేనని తేల్చిచెప్పారు.
సృజనాత్మకతే మీ ఆయుధం.. భవిష్యత్తు మీదే!
రాబోయే రోజుల్లో డిగ్రీలు, సర్టిఫికెట్ల కంటే.. సృజనాత్మకత (Creativity), ఎవరికీ రాని ఒరిజినల్ ఆలోచన, కొత్తదనాన్ని సృష్టించే అసలైన సామర్థ్యానికే ప్రపంచం బ్రహ్మరథం పడుతుందని అలెక్స్ కార్ప్ స్పష్టం చేశారు. "మనమంతా ఒక ఆర్టిస్ట్ (కళాకారుడు) మాదిరిగా ఆలోచించడం నేర్చుకోవాలి. ప్రతి విషయాన్నీ భిన్నమైన కోణాల్లో చూడగలగాలి, ఎప్పటికప్పుడు కొత్త పరిష్కారాలను కనుగొనడం మన రక్తంలో కలిసిపోవాలి" అని ఆయన పిలుపునిచ్చారు.
సరిగ్గా ఇలాంటి అద్భుతమైన సృజనాత్మకత ఉన్నవాళ్లను ఏఐ కూడా ఏమీ చేయలేదని ఆయన ధీమా వ్యక్తం చేశారు. కాబట్టి చేతుల్లో పదునైన వృత్తి నైపుణ్యాలు కలిగిన వారు, మెదడుతో భిన్నంగా ఆలోచించే వ్యక్తులు మాత్రమే ఏఐ శాసించే ఈ కొత్త ప్రపంచంలో రారాజుల్లా ముందంజలో ఉంటారని ఆయన ఒక స్పష్టమైన విజన్ను ప్రపంచం ముందు ఉంచారు!
ఏఐ అనేది ఒక సునామీ.. రొటీన్గా బతికేవాళ్లను అది ముంచేస్తుంది, కానీ కొత్తగా ఆలోచించేవాళ్లకు అది సర్ఫింగ్ బోర్డులా మారి శిఖరాగ్రానికి చేరుస్తుంది. ఎంపిక మీదే!
Also Read:
గ్లోబల్ ఎనర్జీ క్రైసిస్: హార్మూజ్ జలసంధి మూసివేతతో దద్దరిల్లిన ప్రపంచం!ఇరాన్పై దాడులకు అమెరికా స్కెచ్.. రంగంలోకి యూఎస్ఎస్ ట్రిపోలీ!
నో కింగ్స్: అమెరికా చరిత్రలోనే అతిపెద్ద అహింసాత్మక నిరసన
అమెరికా సంచలన రిపోర్ట్: ఉగ్రవాదులకు పాకిస్థానే స్వర్గధామం!
అమెరికాకు ఇరాన్ వార్నింగ్.. పశ్చిమాసియాలో మహా సంగ్రామం!
