బీసీసీఐకి ఎదురెళ్తే దెబ్బ పడుతుందని బంగ్లాదేశ్కు అర్థమైందా? నిన్నటి దాకా 'భారత్తో ఆడేదే లేదు.. చూసేదే లేదు' అంటూ భీష్మించుకుకూర్చున్న బంగ్లా.. ఇప్పుడు సడన్గా ఎందుకు యూటర్న్ తీసుకుంది? ఆ ఒక్క అడుగు ఆ దేశ క్రికెట్ బోర్డును ఆర్థిక పాతాళంలోకి నెట్టేస్తుందన్న భయమే ఈ మార్పుకు కారణమా? ఐపీఎల్ ప్రసారాలపై బంగ్లాదేశ్ తాజా ప్రకటన వెనుక ఉన్న అసలు కథ ఇదే!
ఉద్రిక్తతలు.. ఆ తర్వాత ఐపీఎల్ కట్!
గత కొంతకాలంగా భారత్-బంగ్లాదేశ్ దేశాల మధ్య దౌత్యపరమైన ఉద్రిక్తతలు ఏ స్థాయిలో భగ్గుమన్నాయో ప్రత్యేకంగా చెప్పాల్సిన పనిలేదు. ఈ సెగలు నేరుగా క్రికెట్ మైదానాన్ని తాకాయి. ఈ నేపథ్యంలోనే, మన దేశంలో జరుగుతున్న ఐపీఎల్ టోర్నీ నుంచి బంగ్లాదేశ్ స్టార్ ఫాస్ట్ బౌలర్ 'ముస్తాఫిజుర్ రహమాన్'ను తక్షణమే తొలగించాలంటూ భారత్లో పెద్ద ఎత్తున డిమాండ్లు వెల్లువెత్తాయి.
దేశ ప్రజల సెంటిమెంట్ను గౌరవించిన భారత క్రికెట్ నియంత్రణ మండలి (బీసీసీఐ) ఈ డిమాండ్లకు సానుకూలంగా స్పందించింది. తమ ఫ్రాంచైజీ జట్టులో ఉన్న ముస్తాఫిజుర్ను వెంటనే తొలగించాల్సిందిగా 'కోల్కతా నైట్ రైడర్స్' (కేకేఆర్) యాజమాన్యాన్ని బీసీసీఐ అధికారికంగా ఆదేశించింది.
వరల్డ్కప్ వేదికపై అభ్యంతరం.. ఐసీసీ రిజెక్ట్!
తమ ఆటగాడిని ఐపీఎల్ నుంచి గెంటేయడాన్ని అవమానంగా భావించిన బంగ్లాదేశ్ క్రికెట్ బోర్డు (బీసీబీ) తీవ్రస్థాయిలో రగిలిపోయింది. ఆ కోపాన్ని ఏకంగా 'టీ20 ప్రపంచకప్-2026' వేదికపైనే తీర్చుకునే ప్రయత్నం చేసింది. మా ఆటగాళ్లకు భారత్లో భద్రత లేదంటూ గగ్గోలు పెట్టింది. "భారత్లో మేము అడుగుపెట్టేదే లేదు.. పాకిస్తాన్ కోసం మీరు ఏర్పాటు చేసిన తటస్థ వేదికైన శ్రీలంకలోనే తాము కూడా మ్యాచ్లు ఆడతాం" అని పట్టుబట్టి కూర్చుంది.
కానీ, బంగ్లాదేశ్ ఆడిన ఈ మైండ్ గేమ్ను అంతర్జాతీయ క్రికెట్ మండలి (ఐసీసీ) ఏమాత్రం ఉపేక్షించలేదు. బీసీబీ చేసిన ఆ వింత అభ్యర్థనను నిర్దాక్షిణ్యంగా తిరస్కరించి చెంపచెల్లుమనిపించింది. ఐసీసీ నిర్ణయంతో అహం దెబ్బతిన్న బంగ్లాదేశ్.. ఏకంగా వరల్డ్కప్ టోర్నీ నుంచే అర్ధాంతరంగా తప్పుకుని పెద్ద సాహసమే చేసింది. ఈ క్రమంలోనే, అక్కడి అప్పటి తాత్కాలిక ప్రభుత్వం తమ దేశంలో ఐపీఎల్ ప్రసారాలను పూర్తిగా నిషేధిస్తూ ఒక సంచలన నిర్ణయం తీసుకుంది.
తగ్గిన బంగ్లా.. క్రీడల్లో రాజకీయాలు వద్దు!
కాలం మారింది, బంగ్లాదేశ్లో కొత్త ప్రభుత్వం వచ్చింది. బీసీసీఐ లాంటి ఆర్థిక సామ్రాజ్యంతో సంబంధాలు తెంచుకుంటే నష్టపోయేది మనమేనన్న కఠిన వాస్తవం ఆ కొత్త ప్రభుత్వానికి ఇట్టే అర్థమైపోయింది. అందుకే, భారత్తో మళ్లీ స్నేహం కావాలని, బీసీసీఐతో మునుపటి సత్సంబంధాలు కోరుకుంటున్నట్లు క్రీడా శాఖా మంత్రి అమినుల్ హక్ ఇటీవలే ప్రపంచానికి సంకేతాలు ఇచ్చారు.
తాజాగా, బంగ్లాదేశ్ సమాచార, ప్రసార శాఖా మంత్రి జాహిర్ ఉద్దీన్ స్వపన్ ఏకంగా ఒక అడుగు ముందుకేసి కీలక ప్రకటన చేశారు. "మా దేశంలో ఐపీఎల్ ప్రసారాలపై ప్రస్తుతం ఎలాంటి నిషేధం లేదు. రాజకీయాలను, క్రీడలను కలపాలని మేము ఏమాత్రం అనుకోవడం లేదు. వాణిజ్యపరంగా మా దేశానికి ఏది ప్రయోజనం చేకూరుస్తుందో ఆ అంశాలపైనే మేము ప్రధానంగా దృష్టి సారిస్తాం" అని ఆయన స్పష్టం చేశారు.
ఎవరొచ్చినా ఐపీఎల్కు పచ్చజెండానే!
అంతేకాదు, ఐపీఎల్ ప్రసారాల కోసం ఇంత వరకు బంగ్లాలో ఏ ఛానెల్ దరఖాస్తు చేయలేదని మంత్రి స్వపన్ వెల్లడించారు. "ఏదైనా ఛానెల్ గనక ఐపీఎల్ ప్రసారాల కోసం మా అనుమతి కోరితే.. తప్పకుండా సానుకూలంగా స్పందిస్తాం. ఎవరికీ మేము అడ్డుచెప్పే ప్రసక్తే లేదు. ఒకవేళ ఇండియాకు చెందిన 'స్టార్ స్పోర్ట్స్' నెట్వర్క్ స్వయంగా ఐపీఎల్ను ఇక్కడ ప్రసారం చేయాలనుకుంటే, అందుకు వారికి ఎలాంటి ఆటంకం లేకుండా అనుమతి లభిస్తుంది. ఏ ఛానెల్కైనా మేము పచ్చజెండా ఊపుతాం" అని ఆయన తేల్చిచెప్పారు.
ఒక్క మాటలో చెప్పాలంటే.. బీసీసీఐతో పంతానికి పోయి ఇప్పటికే టీ20 ప్రపంచకప్ నుంచి వైదొలిగిన బంగ్లా క్రికెట్ బోర్డు (బీసీబీ) కనీవినీ ఎరుగని స్థాయిలో భారీ మూల్యం చెల్లించింది. ఇక భవిష్యత్తులో కూడా ఇదే మంకుపట్టు పడితే.. ఆర్థికంగా బంగ్లా ఆటగాళ్లు, బోర్డు కోలుకోలేని దెబ్బతింటాయి. అందుకే, 'తెగేదాకా లాగితే మొదటికే మోసం వస్తుందేమోనన్న' భయంతోనే బంగ్లాదేశ్ ఇలా హఠాత్తుగా యూటర్న్లు తీసుకుంటోందని క్రీడా పండితులు విశ్లేషిస్తున్నారు. బీసీసీఐ పవర్ ఏంటో బంగ్లాకు ఇప్పుడు తెలిసొచ్చింది!
Also Read:
పంజాబ్ సీఎంపై నసీం షా కామెంట్స్.. పీసీబీ షోకాజ్ నోటీసు!క్రికెటర్ల రిటైర్మెంట్కు భార్యలే కారణం: యోగ్రాజ్ సింగ్
ఐపీఎల్ ఎఫెక్ట్: పీఎస్ఎల్ను వీడుతున్న ప్లేయర్లు, కామెంటేటర్లు!
ఐపీఎల్ 2026: ముంబై ఇండియన్స్కు బుమ్రా దూరం? ఆకాశ్ ఎంట్రీ!
క్యూలో నిలబడలేం.. ఎమ్మెల్యేల పంతం నెగ్గింది: ఐపీఎల్ ఫ్రీ టికెట్స్!
