Bengaluru Cafe: నిమ్మకాయ జ్యూస్కి 'గ్యాస్ ఛార్జీ' వేసిన కేఫ్.. బిల్లు చూసి కస్టమర్లకు ఫ్యూజులౌట్!
ఎక్కడైనా హోటల్కు వెళ్లి ఏదైనా ఆర్డర్ ఇస్తే, బిల్లులో జీఎస్టీ (GST) లేదా సర్వీస్ ఛార్జ్ వేయడం సర్వసాధారణం. కానీ, కర్ణాటకలోని ఓ కేఫ్ ఏకంగా నిమ్మకాయ జ్యూస్కి 'గ్యాస్ ఛార్జీ' (Gas Crisis Charge) వేసి కస్టమర్ల జేబులకు చిల్లులు పెట్టింది. గ్యాస్ సిలిండర్ల కొరతను సాకుగా చూపి వినియోగదారులపై అదనపు భారం మోపిన ఈ వింత బిల్లు ఇప్పుడు సోషల్ మీడియాలో తీవ్ర దుమారం రేపుతోంది.
పొయ్యి వెలిగించని జ్యూస్కు గ్యాస్ ఛార్జీ!
ఆదివారం బెంగళూరులోని ఒక ప్రముఖ కేఫ్కు వెళ్లిన ఇద్దరు కస్టమర్లు రెండు గ్లాసుల నిమ్మరసం (Lemon Juice) ఆర్డర్ చేశారు. వాళ్లు తాగిన జ్యూస్ బిల్లు రూ. 358 అయింది. అయితే, చేతికొచ్చిన బిల్లును జాగ్రత్తగా గమనించిన కస్టమర్లకు దిమ్మతిరిగే షాక్ తగిలింది. ఆ బిల్లులో ఏకంగా 5 శాతం (రూ. 17.01) అదనంగా 'గ్యాస్ క్రైసిస్ ఛార్జ్' పేరిట వసూలు చేశారు. అసలు పొయ్యి వెలిగించాల్సిన అవసరమే లేని సాధారణ నిమ్మరసానికి గ్యాస్ ఛార్జీ ఎందుకు వేస్తారని కస్టమర్లు యాజమాన్యాన్ని నిలదీశారు.
నెట్టింట వైరల్.. అధికారుల ఎంట్రీ
కస్టమర్లు ఈ వింత బిల్లు ఫోటోను సోషల్ మీడియాలో పోస్ట్ చేయడంతో అది కాస్తా క్షణాల్లో వైరల్గా మారింది. "నిమ్మకాయ పిండటానికి కూడా గ్యాస్ వాడుతున్నారా?" అంటూ నెటిజన్లు హోటల్ యాజమాన్యంపై తీవ్ర స్థాయిలో సెటైర్లు వేస్తున్నారు. ఈ వ్యవహారం కాస్తా రాష్ట్ర ఆహార, పౌర సరఫరాలు మరియు వినియోగదారుల హక్కుల కమిషన్ దృష్టికి వెళ్లింది. వెంటనే స్పందించిన అధికారులు సదరు కేఫ్ యాజమాన్యానికి నోటీసులు జారీ చేసి వివరణ కోరారు.
వినియోగదారుల హక్కులను ఉల్లంఘిస్తూ ఇష్టారాజ్యంగా ఇలాంటి అదనపు ఛార్జీలు వసూలు చేయడం సరైంది కాదని అధికారులు స్పష్టం చేశారు. ప్రస్తుతం ఈ ఘటనపై లోతైన దర్యాప్తు కొనసాగుతోంది. హోటళ్లలో ఇష్టానుసారంగా వేస్తున్న అదనపు ఛార్జీలపై, ముఖ్యంగా ఈ 'గ్యాస్ క్రైసిస్' పేరుతో జరుగుతున్న వసూళ్లపై కఠిన చర్యలు తీసుకోవాలని ప్రజలు డిమాండ్ చేస్తున్నారు.
